Kapitujt

Dalja: 29. Shugurimi i Aronit dhe i bijve të tij. Përgatitja

¹ “Dhe, ja, si do të bësh për t’i shuguruar për priftërinë time: merre një mëzat dhe dy desh pa të meta, ² bukë të pabrume dhe kuleç të pabrumë të ngjeshur në vaj po dhe pite të pabrume të lyera me vaj. Gatuaj me miell të bardhë gruri, ³ futi në shportë e kushtoj bashkë me mëzat e me dy deshtë”.

Pastrimi, të veshurit dhe lyerja

⁴ “Bjeri Aronin dhe bijtë e tij te dera e Tendës së takimit. Pasi t’i kesh larë atë e bijtë e tij me ujë, ⁵ veshe Aronin me petkat e tij, d. m. th. me këmishë, me gunën e shpinores, vëri shpinoren dhe parzmoren, të cilën shtrëgoja me lidhëzën e shpinores; ⁶ vëri kësulën në kokë dhe kezën e shenjtë ‑ shenjën e shugurimit mbi kësulë ⁷ dhe zbraz mbi kokën e tij vajin e shugurimit, dhe do të jetë i shuguruar. ⁸ Afroji edhe bijtë e tij dhe veshi me këmisha të linjta, ngjeshi me brez, ⁹ vëru kësulat dhe do të jenë priftërinj të mi me të drejtë të përhershme”.

Flitë

“Pasi t’ua kesh mbushur duart me pushtet Aronit dhe bijve të tij, ¹⁰ sille mëzatin para Tendës së takimit. Atëherë Aroni dhe të bijtë le t’ia vënë duart mëzatit mbi kokë ¹¹ e preje në praninë e Zotit në hyrje të Tendës së takimit. ¹² Merr prej gjakut të mëzatit e me gishtin tënd vëre në brirë të lterit, kurse pjesën tjetër të gjakut zbraze nën lter. ¹³ Merre edhe tërë dhjamin e zorrëve dhe rizën e mëlçisë e dy veshkat me dhjamin që është mbi to dhe shkrumboji mbi lter si fli, ¹⁴ kurse mishin e mëzatit, lëkurën dhe jashtëqitjet e tija, digji përjashta zemërimiës, sepse është fjala për fli pendestare.

¹⁵ Pastaj merre njërin dash dhe mbi kokë të tij Aroni dhe bijtë e tij t’i vënë duart. ¹⁶ Atëherë preje e merre gjakun e tij e derdhe mbi lter gjithkund përreth tij. ¹⁷ Dashin preje copa‑copa, laja zorrët dhe këmbët e vëri mbi mishin e coptuar dhe mbi kokën e tij. ¹⁸ Atëherë digje mbi lter krejt dashin: është fli e bërë shkrumb në nder të Zotit, erë e këndshme, fli e djegur në zjarr në nder të Zotit.

¹⁹ Merre edhe dashin tjetër e mbi kokë të tij t’i vënë duart Aroni e bijtë e tij. ²⁰ Preje dashin, merr prej gjakut të tij dhe lyeje bulën e veshit të djathtë të Aronit e të bijve të tij dhe pëlqyerin e dorës e të këmbës së djathtë të tyre. Gjakun që tepron derdhe në lter gjithkund përreth. ²¹ Atëherë merr prej gjakut që do të mbesë në lter dhe prej vajit të shugurimit stërpike Aronin e petkat e tija, e me të bijtë e tij e petkat e tyre”.

Hyrja në shërbesë të priftërinjve

²² “Merre pastaj dhjamin e dashit, bishtin dhe dhjamin rreth zorrëve, rizën e mëlçisë, dy veshkat dhe dhjamin që i mbështjell ato dhe shpatullën e djathtë ‑ sepse është dashi i flijuar për shugurimin e priftërinjëve, ²³ një bukë të rrumbullaktë, një kulaç në vaj dhe një pite prej shportës së pabrumeve që është e vënë në praninë e Zotit. ²⁴ Vëri të gjitha në duar të Aronit e të bijve të tij e bëri t’i kushtojnë me sjellje të paraqitjes para Zotit. ²⁵ Merri të gjitha prej duarve të tyre dhe digji mbi lter përmbi flinë e shkrumbimit, në erë të këndshme në praninë e Zotit: është fli i djegur në zjarr për Zotin.

²⁶ Merre edhe gjoksin e dashit me të cilin hyri në shërbesë Aroni dhe kushtoje si fli paraqitjeje Zotit: kjo pjesë të takon ty. ²⁷ Shenjtëroje gjoksin që qe paraqitur dhe shpatullën që qe kushtuar, të ndara nga dashi, ²⁸ me të cilin hynë në shërbesë Aroni dhe bijtë e tij. Këto pjesë i takojnë Aronit dhe bijve të tij, e drejtë e pandryshueshme mbi bijtë e Izraelit përgjithmonë; sepse është shpërblim dhe do të mbetet shpërblim prej bijve të Izraelit për flitë e pajtimit, shpërblim i tyre që i takon Zotit.

²⁹ Petkat e shenjta të Aronit u takojnë bijve të tij pas tij, që të shugurohen në to dhe duart e tyre të mbushen me pushtet në to. ³⁰ Ai që prej bijve të tij do të bëhet kryeprift në këmbë të tij, që do të hyjë në Tendën e Takimit për të shërbesuar në shenjtërore, le t’i përdorë për shtatë ditë”.

Ngrënia e shenjtë

³¹ “Merre pastaj dashin e shugurimit dhe zije mishin e tij në vendin e shenjtë. ³² Aroni e bijtë e tij le ta hanë mishin e këtij dashi dhe bukën që është në shportë në hyrje të Tendës së takimit. ³³ Le të hanë prej atyre që shërbyen si fli pendestare që t’ju mbushen duart me pushtet e të shugurohen. S’guxon të hajë prej tyre asnjë i jashtëm. ³⁴ Nëse mbetet mish prej flisë së shugurimit të priftërinjve ose prej bukës deri në mëngjes, digje: nuk guxohet të hahet, sepse është e shuguruar.

³⁵ Bëj, pra, kështu gjithçka me Aronin e me bijtë e tij siç të kam urdhëruar. Gjatë shtatë ditëve vazhdo t’i shugurosh duart e tyre”.

Shugurimi i lterit të flisë së shkrumbimit /holokaustit/

³⁶ “Çdo ditë flijoje një mëzat për shpërblim që duhet dhënë për mëkat; duke kushtuar fli shpërblimi për të do ta heqësh mëkatin prej lterit dhe lyeje që të shugurohet. ³⁷ Shtatë ditë rresht kushto fli shpërblimi për lterin dhe shuguroje. Kështu lteri do të jetë tejet i shenjtë: e kushdo që ta prekë do të jetë i shenjtë”.

Flia e shkrumbimit e përditshme

³⁸ “Dhe, ja, çka do të kushtosh mbi lter: çdo ditë vazhdimisht nga dy qengja vjetakë, ³⁹ njërin qengj në mëngjes e tjetrin në mbrëmje. ⁴⁰ Kushtoje me qengjin e parë edhe një të dhjetën e ef-it miell të bardhë të ngjeshur me një të katërt të hin-it vaj të shtypur dhe një fli njomjeje me një të katërt të hin-it verë. ⁴¹ Kurse qengjin tjetër kushtoje në mbrëmje sipas ritit të flisë mëngjesore e të njomjes në erë të këndshme, fli të djegur në nder të Zotit, ⁴² le të jetë kjo fli shkrumbimi e përhershme brezni në brezni në hyrje të Tendës së takimit, në praninë e Zotit, ku do të takohem me ju për të biseduar me ty.

⁴³ Këtu do të takohem edhe me bijtë e Izraelit e do ta shenjtëroj këtë vend me anë të lavdisë sime. ⁴⁴ Do ta shenjtëroj edhe Tendën e takimit me lter dhe Aronin me të bijtë që të më shërbejnë si priftërinj. ⁴⁵ Unë do të banoj ndër izraelitë e do të jem Hyji i tyre. ⁴⁶Atëherë ata do ta marrin vesh se jam unë Zoti, Hyji i tyre, që i nxora nga dheu i Egjiptit, që të banoj me ta ‑ unë Zoti, Hyji i tyre”.

Kapitujt