Kapitujt

Dalja: 26. Banesa. Pëlhurat dhe mbuloja

¹ “Kurse Banesën punoje kështu: punoji dhjetë koltrina me pëlhurë liri të tjerrë ngjyrë viollce, të kuqe e të kuqe të mbyllur të qendisura me figura kerubinësh artistikisht. ² Gjatësia e njërës pëlhurë: njëzet e tetë kutë; gjerësia katër kutë e njërës pëlhurë; masa e njëjtë e të gjitha koltrinave. ³ Pesë koltrina le të bashkohen njëra me tjetrën, e pesë tjerat po ashtu duhet të bashkohen njëra me tjetrën. ⁴ Punoji edhe vjegëzat prej leshit ngjyrë viollce në kindin e njërës koltrinë në fund në vend ku përpiqen, po kështu puno edhe në koltrinën tjetër në kindin ku duhet të përpiqen. ⁵ Punoji pesëdhjetë vjegëza në kindin e njërës koltrinë e pesëdhjetë vjegëza në kindin e koltrinës tjetër. Vjegëzat le të punohen njëra kundrejt tjetrës. ⁶ Punoji edhe pesëdhjetë komçarë ari, me të cilët do të lidhen pëlhurat e koltrinave, që Banesa të bëhet një tërësi.

⁷ Punoji edhe njëmbëdhjetë çulla me lesh dhish për Tendën mbi Banesën. ⁸ Gjatësia e çullit të jetë tridhjetë kutë, kurse gjerësia të jetë katër kutë; të gjithë çullat të kenë të njëjtën masë. ⁹ Përpiqi pesë çulla veçmas e pastaj edhe gjashtë të tjerët veçmas, por ashtu që çulli i gjashtë të bëhet dyfish në ballë të Tendës. ¹⁰ Punoj pesëdhjetë vjegëza në buzë të çullit të fundit në vend të përpjekjes të të parit e pesëdhjetë në buzë të çullit në vend të përpjekjes së tjetrit. ¹¹ Punoji edhe pesëdhjetë komçarë bronzi, me të cilët të mbërthehen vjegëzat që prej të gjithëve të bëhet Banesa një tërësi. ¹² E sa tepron prej çullave të përgatitur për mbulojë, d. m. th. një çull i dyfishuar, me gjysmën e tij mbuloje pjesën e sprasme të Banesës; ¹³ një kut që tepron në njërën anë e një kut që tepron në anën tjetër për gjatësi të çullave të Tendës, le të bien mbi dy krahët e Banesës për ta mbrojtur nga njëra anë e nga ana tjetër.

¹⁴ Punoje pastaj edhe një mbulesë tjetër për Banesën. Të jetë prej lëkurave të regjura e të ngjyrosura kuq deshësh dhe edhe një mbulesë tjetër me lëkura delfinësh.

Lënda drusore

¹⁵ Prej drurit të akacies punoji dërrasat pingule të Banesës. ¹⁶ Secila të jetë e gjatë dhjetë kutë dhe e gjerë një kut e gjysmë. ¹⁷ Çdo dërrasë t’i ketë dy kunja me të cilët të lidhet dërrasa me dërrasë; kështu punoji të gjitha dërrasat e Banesës. ¹⁸ Këso dërrasash të jenë për krahun e jugut që kthen prej mesditës njëzet. ¹⁹ Për ta shkrij dyzet fundra argjendi, dy baza për dy kunjat e dërrasës së parë, e kështu rëndom dy baza për dy kunja të secilës dërrasë. ²⁰ Po ashtu në krahun e dytë të Banesës që është në anë të veriut, punoj njëzet dërrasa, ²¹ dhe të kenë dyzetë fundra argjendi: nga dy fundra duhet t’i vihen secilës dërrasë. ²² Në anën e fundme të Banesës, në perëndim, vëri gjashtë dërrasa. ²³ Punoji edhe dy dërrasa për të tjera që do të ngulen në kënde të Banesës përpas. ²⁴ Kështu le të jenë binjake prej poshtë e deri lart të bashkuara në një tërësi; të tilla le të jenë këto të dyja për të dy këndet. ²⁵ Pra, le të jenë tetë dërrasa me fundrat e tyre të argjendta: gjashtëmbëdhjetë fundra të argjendta, vëri nga dy fundra secilës dërrasë. ²⁶ Punoji edhe tërthorcat prej drurit të akacies: pesë për t’i mbajtur dërrasat në njërën anë ²⁷ e pesë për anën tjetër të Banesës e pesë për pjesën pas në krahun e perëndimit. ²⁸ Tërthorca e mesme le të shkojë për mjedis të dërrasave prej njërit skaj në tjetrin. ²⁹ Dërrasat veshi me ar dhe shkrij për to rrathë ari, ³⁰ nëpër të cilët tërthorcat do të përshkohen; punoji prej ari”.

Tisi

³¹ Punoje edhe koltrinën prej pëlhure ngjyrë viollce, të kuqe e të kuqe të mbyllur dhe prej lirit të tjerrë me kerubina të qendisur në të me mjeshtri. ³² Vare në katër shtyllakë prej drurit të akacies. Edhe këta duhet të jenë të praruar, komçarët t’i kenë të artë e fundrat të argjendta. ³³ Vare koltrinën në varëse e pas saj fute Arkën e Dëshmisë. Kështu tisi do ta ndajë Shenjtëroren nga Shenjtërorja e shenjtërve.

³⁴ Vëre edhe Pajtimoren mbi Arkën e Dëshmisë në Shenjtëroren e shenjtërve, ³⁵ kurse tryezën jashtë koltrinës e shandanin në anën e jugut të Banesës, përballë tryezës. Tryezën vendoje në anë të veriut.

³⁶ Për në hyrje të tendës punoje dhe një napë prej pëlhure ngjyrë viollce, të kuqe e të kuqe të mbyllur me li të përpunuar të qendisur me mjeshtri. ³⁷ Për napën punoji pesë shtyllakë prej drurit të akacies të praruar, para të cilëve do të vihet napa. Komçarët le të punohen prej arit, e bazat prej bronzit”.

Kapitujt