Kapitujt

Dalja: 25. Ndihmat për shenjtëroren

¹ Zoti i tha Moisiut: ² “Thuaju bijve të Izraelit të më sjellin dhurata. Pranoni prej secilit njeri që i jep vullnetarisht. ³ Merrni këto dhurata: ar, argjend dhe bronz, ⁴ pëlhurë viollce, të kuqe e të kuqe të mbyllur, li të tjerrë dhe lesh dhie, ⁵ lëkura të regjura deshësh të ngjyrosura kuq, lëkura delfini e dru akacie, ⁶ vaj për ndriçim, erëra të mira për vajra lyerjeje e kemimi të erëndshëm, ⁷ gurë oniksi dhe të tjerë gurë të paçmueshëm për të stolisur shpinoren dhe parzmoren. ⁸ Le të ma punojnë Shenjtëroren që të mund të banoj në mesin e tyre. ⁹ Në ndërtimin e Banesës dhe të të gjitha gjërave që i përkasin kultit, duhet t’i ndërtoni pikë për pikë sipas gjedhes që do ta tregoj ty”.

Tenda dhe orenditë e saja: Arka

¹⁰ “Le ta punojnë Arkën prej drurit të akacies: dy kutë e gjysmë të gjatë, të gjerë një kut e gjysmë, të lartë po ashtu një kut e gjysmë. ¹¹ Praroje me ar të pastër përbrenda e përjashta; sipër bëji përreth një brez ari. ¹² Shkrij për të katër rrathë ari dhe mbërthej në katër këmbët e arkës: dy rrathë në njërin krah e dy të tjerë në krahun tjetër. ¹³ Punoj gjithashtu edhe shtagat druri të akacies dhe veshi me ar; ¹⁴ atëherë shtjeri në rrathë që janë në krahët e Arkës që të mbaret në to. ¹⁵Shtagat le të jenë gjithmonë në rrathë dhe të mos hiqen askurrë prej tyre. ¹⁶ Në Arkë brenda vendoje Dëshminë që do ta jap.

¹⁷ Punoje kapakun ‑ Pajtimoren prej arit të pastër: le të jetë e gjatë dy kutë e gjysmë e gjerë një kut e gjysmë. ¹⁸ Punoj edhe dy kerubinë të artë: farkoj në dy skajet e Pajtimores; ¹⁹ njëri kerubin të jetë në njërin skaj, e tjetri në tjetrin: mbërthej në dy skajet e Pajtimores, kështu që të përftojnë një tërësi. ²⁰ Le t’i shtrijnë krahët përmbi që me krahët e tyre ta mbulojnë Pajtimoren; le të jenë fytyrë për fytyrë, me fytyrë mbi Pajtimoren, ²¹ me të cilën mbulohet Arka, në të cilën vendose Dëshminë që do ta jap ty.

²² Aty do të takohem me ty, e përmbi Pajtimoren ndërmjet dy kerubinëve që do të jenë mbi Arkën e Dëshmisë, do t’i jap të gjitha urdhërimet lidhur me izraelitët”.

Tryeza e bukëve të kushtimit

²³ “Punoje edhe një tryezë prej drurit të akacies të gjatë dy kutë, të gjerë një kut e të lartë një kut e gjysmë. ²⁴ Praroje me ar krejtësisht të pastër e përreth punoje një brez ari. ²⁵ Bëje pastaj buzën të gjerë katër gishta rreth e rreth e mbi të rreth e rreth një brez ari. ²⁶ Punoj edhe katër rrathë të artë e vëri në katër këndet e tryezës te secila këmbë. ²⁷ Përbri buzës do të jenë rrathët e artë për t’i futur nëpër ta shtagat për ta mbartur tryezën.

²⁸ Edhe shtagat punoji prej drurit të akacies dhe veshi me ar. Me anë të tyre do të mbaret tryeza. ²⁹ Puno edhe mashtka, gota, enë e kupa për t’i njomur kushtet; le të jenë prej arit të pastër. ³⁰ Mbi tryezë vendosi bukët e kushtimit që të jenë në praninë time përgjithmonë”.

Shandani

³¹ “Punoje edhe një shandan ari të kulluar. Shandani të jetë i farkuar. Baza e shtiza e tij, gotat e burbuqet dhe fletët le të jenë të shkrira një me të. ³² Të ketë gjashtë krahë: tre nga njëra anë e shtizës e tre nga ana tjetër. ³³ Në njërin krah le të jenë tri gota në trajtë të lules së bajames si dhe burbuqet e fletët; po ashtu edhe tri gota në trajtë të lules së bajames si dhe burbuqet e gotat në krahun tjetër: kështu duhet të jenë të gjashtë krahët që dalin nga shtiza e shandanit. ³⁴ Në vetë shtizën e shandanit të jenë katër gota në trajtë të lules së bajames po edhe burbuqet e fletët. ³⁵ Çdo burbuqe nën dy krahët në tri vende e që janë gjashtë krahë që dalin nga e njëjta shtizë. ³⁶ Burbuqet e krahët duhet të jenë një me shandanin që duhet të jetë i punuar prej arit të pastër, të farkuar. ³⁷ Punoji edhe shtatë dritëza dhe vendosi mbi të që të ndiçojnë para tij. ³⁸ Lotheqësit dhe lotpritësit e tyre le të jenë prej arit të kulluar. ³⁹ Shandani me të gjitha pjesët përkatëse të tija le të jetë i rëndë një talent ari të kulluar. ⁴⁰ Pra, kujdes, e punoje sipas gjedhes që të është dëftuar në mal”.

Kapitujt