Kapitujt

1 i Samuelit: 29. Krerët e filistenjve e largojnë Davidin prej ushtrisë

¹ Filistenjtë i mblodhën të gjitha trupat e veta në Afek. Po edhe izraelitët ngulën fushimin e tyre mbi burimin që ishte në Jezrahel. ² Prijësit filistenj parakalonin me njësitë ushtarake të tyre nga njëqind e nga një mijë, kurse Davidi e njerëzit e tij shkonin të fundit me ushtrinë e Akisit. ³ Krerët e filistenjve pyetën: “Çka bëjnë këta hebrenj këtu”. Akisi iu përgjigj prijësve filistenj: “Është Davidi, shërbëtori i mbretit Saul! Është tek unë Tani sa kohë, madje me vjet, dhe nuk gjeta në të kurrgjë të keqe prej ditës që iku dhe u strehua tek unë deri më sot”. ⁴ U hidhëruan prijësit e filistenjve kundër tij dhe i thanë: “Le të kthehet ky njeri dhe le të rrijë në vendin që ia ke caktuar e të mos vijë assesi me ne në luftë, sepse mund të bëhet kundërshtari ynë kur të fillojmë betejën. E si do të mund të pajtohej ndryshe ky me zotërinë e vet më lehtë se me kokat e këtyre njerëzve? ⁵ Pse, a nuk është ky ai Davidi, të cilit i këndonin në valle e i thoshin:

‘I vrau Sauli me mijëra,

i vrau Davidi me dhjetëra mijëra’”?

⁶ Atëherë Akisi e thirri Davidin e i tha: “Pasha Zotin, ti je njeri i drejtë dhe ndër sytë e mi je i mirë dhe unë do të doja të ishe me mua në ushtri. Unë nuk gjeta në ty asnjë të keqe që ditën që erdhe tek unë deri në ditën e sotme. Por nuk u pëlqen prijësve. ⁷ Kthehu, pra, në paqe që të mos i fyesh prijësit e filistenjve”.

⁸ Davidi iu përgjigj Akisit: “Por ç’kam bërë se e ç’ke gjetur të keqe në shërbëtorin tënd prej ditës që erdha tek ti e deri në këtë ditë që të mos vij e të mos luftoj kundër armiqve të zotërisë sim mbretit”? ⁹ Akisi iu përgjigj kështu Davidit: “Unë e di se ti je i mirë për sytë e mi si engjëlli i Hyjit, por prijësit e filistenjve thanë: ‘Të mos dalë me ne në luftë’! ¹⁰ Prandaj çohu herët në mëngjes ti dhe shërbëtorët e zotërisë sate që kanë ardhur me ty dhe, pasi të ngriheni menatë, nisuni pasi të ketë filluar të dalë drita”.

¹¹ U çua, pra, Davidi herët, ai dhe njerëzit e tij, për t’u nisur herët në mëngjes e për t’u kthyer në tokën e filistenjve. Kurse filistenjtë u nisën për Jezrahel.

Kapitujt