Kapitujt

1 i Samuelit: 8. Populli kërkon një mbret

¹ Si u plak Samueli, i vuri bijtë e vet për gjyqtarë të Izraelit. ² Djali i tij i madh quhej Joel e i dyti quhej Abia. Detyrën e gjyqtarit e ushtronin në Bersabé. ³ Porse bijtë e tij nuk shkonin udhëve të tija. Të prirur pas fitesës, merrnin dhurata dhe shtrembëronin të drejtën. ⁴ Atëherë u bashkuan të gjithë pleqtë e Izraelit e shkuan te Samueli në Ramë. ⁵ I thanë: “Ja, ti u plake e fëmijët e tu nuk ecin udhëve të tua. Tani pra, na cakto një mbret, siç e kanë të gjitha kombet e tjera, që të na gjykojë”. ⁶ Aspak nuk i pëlqeu Samuelit që i thanë: “Na cakto një mbret që të na gjykojë”. Por Samueli iu lut Zotit.

⁷ E Zoti i tha Samuelit: “Dëgjoje zërin e popullit për gjithçka që të thonë. Ata nuk të përbuzën ty, por më përbuzën mua që të mos sundoj mbi ta. ⁸ Po bëjnë me ty ashtu si kanë vepruar me mua që prej ditës që i nxora nga Egjipti deri në ditën e sotme ‑ më lanë mua e u shërbyen zotave të huaj. ⁹ Por tani dëgjoje zërin e tyre. Megjithatë assesi mos e lër pa ua sjellë ndër mend: mësojua të drejtën e mbretit që do të sundojë mbi ta”.

Vështirësitë që sjell mbretëria

¹⁰ Popullit që i kishte kërkuar mbretin, Samueli ia tregoi të gjitha fjalët e Zotit. ¹¹ U tha: “Ja e drejta e mbretit që do t’ju sundojë: bijtë tuaj do t’i marrë e do t’i vërë në karrocat e tija. Do t’i bëjë kalorës e do të vrapojnë para karrocave të tija. ¹² Do të caktojë ja e ja. Do të lëvrojnë tokat e tija, do të korrin të mbjellat e tija. Do t’i bëjë mjeshtër për armë e për karroca të tija. ¹³ Po edhe vajzat tuaja do t’i marrë për t’i përgatitur erëra të mira, për t’i zier e për t’i pjekur atij bukë. ¹⁴ Do t’i marrë tokat tuaja më të mirat, vreshtat dhe ullishtat e do t’ua japë oborrtarëve të vet. ¹⁵ Ai do t’ju marrë edhe të dhjetat e të mbjellave tuaja, të prodhimit të vreshtave tuaja e do t’ua japë oborrtarëve dhe zyrtarëve të vet. ¹⁶ Do t’i marrë edhe shërbëtorët e shërbëtoret tuaja, qetë tuaj më të mirët dhe gomarët tuaj do t’i marrë për të punuar punën e tij. ¹⁷ Do të marrë të dhjetën e grigjave tuaja dhe ju do të bëheni skllevërit e tij. ¹⁸ Atë ditë do të kërkoni ndihmë për shkak të mbretit që vetë do ta keni zgjedhur, por më kot se atëherë Zoti nuk do t’ju vështrojë”.

¹⁹ Por populli nuk deshi t’ia dëgjonte fjalën Samuelit e i tha: “Assesi! Ne duam mbret! ²⁰ Duam edhe ne të jemi si popujt e tjerë! Do të na gjykojë mbreti ynë, para nesh do të dalë në luftë e do t’i luftojë luftërat tona”!

²¹ Kur Samueli i dëgjoi të gjitha fjalët e popullit, të gjitha ia tregoi Zotit. ²² E Zoti i tha Samuelit: “Dëgjoje zërin e popullit dhe jepu mbretin”.

Atëherë Samueli u tha izraelitëve: “Le të shkojë secili në qytetin e vet”.

Kapitujt