Kapitujt

1 i Samuelit: 23. Davidi në Cejlë

¹ I lajmëruan Davidit e i thanë: “Ja, filistenjtë e kanë rrethuar Cejlën dhe po i plaçkitin lëmenjtë”. ² Davidi e pyeti Zotin e tha: “A të shkoj e t’i godas këta filistenj”? Zoti i tha: “Shko, se do t’i mundësh filistenjtë e do ta shpëtosh Cejlën”. ³ Njerëzit që ishin me Davidin, i thanë: “Shiko: ne jemi në frikë të vazhdueshme edhe këtu në Judë! Po si do të jetë nëse do të shkojmë në Cejlë kundër çetave të filistenjëve”?

⁴ Davidi përsëri kërkoi këshillë prej Zotit, i cili iu përgjigj:

“Ngrihu e shko në Cejlë, sepse unë do t’i lëshoj filistenjtë në dorë tënde”.

⁵ Atëherë Davidi u nis me njerëzit e vet e shkoi në Cejlë, luftoi kundër filistenjve, i dëboi bagëtitë e tyre dhe i mundi keqas. Kështu Davidi i shpëtoi banorët e Cejlës. ‑ ⁶ Asohere kur Abiatari u strehua te Davidi, edhe ai zbriti me Davidin në Cejlë duke marrë me vete shpinorin.

⁷ E lajmëruan Saulin se Davidi kishte zbritur në Cejlë. Sauli tha: “E lëshoi Zoti në duar të mia: ai vetë e qiti veten në lak pasi ka hyrë në qytet të mbyllur me dyer e me shula”! ⁸ Sauli mblodhi mbarë popullin për të zbritur në luftë në Cejlë për ta rrethuar Davidin dhe njerëzit e tij. ⁹ Kur e mori vesh Davidi se Sauli po bëhej gati për t’ia bërë të zezën tinëz, i tha Abiatarit prift: “Bjere shpinorin”! ¹⁰ Atëherë Davidi tha: “O Zot, Hyji i Izraelit! Shërbëtori yt dëgjoi se Sauli po bëhet gati që të vijë kundër Cejlës për ta shkatërruar qytetin për shkakun tim. ¹¹ A do të më lëshojnë njerëzit e Cejlës në dorë të Saulit? A do të zbresë Sauli siç dëgjoi shërbëtori yt? O Zot, Hyji i Izraelit, dëftoji shërbëtorit tënd”! E Zoti i tha: “Do të zbresë”! ¹² E Davidi vazhdoi: “A do të më dorëzojnë mua dhe njerëzit e mi te Sauli këta, njerëzit e Cejlës”? Zoti iu përgjigj: “Do të të dorëzojnë”!

¹³ U çua, pra, Davidi dhe njerëzit e tij ‑ ishin gjashtëqind vetë ‑ dolën prej Cejlës dhe endeshin andej ‑ këndej, pa qëllim. E lajmëruan edhe Saulin se Davidi kishte dalë prej Cejlës, prandaj as nuk doli për sulm.

¹⁴ Davidi shkoi për të jetuar në shkretëtirë, në vende të pakalueshme dhe qëndroi në male në shkretëtirën Zif. Sauli e kërkonte vazhdimisht, por Hyji nuk e lëshoi kurrë në duar të tija.

Davidi në Horesë. Jonatani vjen për ta parë

¹⁵ Davidi e mori vesh se Sauli kishte dalë që ta kërkonte për t’ia marrë jetën. Davidi gjendej në shkretëtirën e Zifit, në Horesë. ¹⁶ U çua Jonatani, biri i Saulit, dhe shkoi te Davidi në Horesë. Ai i dha zemër Davidit në emër të Zotit. I tha: ¹⁷ “Mos ki frikë! Ti s’do të biesh në duar të Saulit, tim eti. Ti do të mbretërosh mbi Izrael e unë do të jem i dyti pas teje. Këtë e di edhe im atë, Sauli”. ¹⁸ U lidhën, pra, besa ‑ besë me njëri ‑tjetrin para Zotit. Davidi qëndroi në Horesë, kurse Jonatani u kthye në shtëpinë e vet.

Davidi shpëton prej Saulit

¹⁹ Zifasit shkuan te Sauli në Gaba e i thanë: “Davidi fshihet ndër ne në vende të sigurta në Horesë, në malin Hakilë, që është në jug të shkretëtirës. ²⁰ Tani, pra, po deshi zemra jote, o mbret, që të zbresë atje, zbrit; është puna jonë që ta shtiem në duar të mbretit”. ²¹ Sauli u tha: “Qofshi bekuar prej Zotit, pasi po ankoni gjendjen time! ²² Shkoni, po ju lutem, e përgatitni gjithçka me kujdes, shikoni me vëmendje e vëreni vendin nga kalon ai dhe merrni hetime kush e ka parë aty: po më thonë se është shumë dinak. ²³ Gjeni e vëreni të gjitha strehimet e tija ku fshihet e, kur t’ia gjeni vendin e sigurt, kthehuni tek unë që të vij edhe vetë me ju. E në qoftë se ecën nëpër tokë, do ta kërkoj në çdo vend të Judës”.

²⁴ Ata atëherë u ngritën e shkuan në Zif para Saulit.

Davidi e njerëzit e tij ishin në shkretëtirën Maon, në Arabë, në jug të shkretëtirës. ²⁵ Atëherë doli edhe Sauli me njerëzit e vet për ta kërkuar Davidin. E lajmëruan për këtë Davidin. Davidi zbriti në Qetë e qëndronte në Maon. Kur e mori vesh Sauli, iu vu pas Davidit në shkretëtirën e Maonit. ²⁶ Sauli ecte njërit shpat të malit, kurse Davidi me njerëzit e vet shkonte shpatit tjetër të malit. Davidi u jepte sa ku mundte këmbëve për t’i ikur Saulit. E Sauli me njerëzit e vet po krijonte rrethin për ta zënë Davidin me gjithë ta, ²⁷ kur ja, arriti lajmëtari që tha: “Shpejto e eja se filistenjtë e vërshuan tokën!” ²⁸ Atëherë Sauli e la ndjekjen e Davidit e u kthye për t’u ndeshur me filistenjtë. Për këtë arsye ai vend u quajt: “Qeta e shpërndarjes”.

Kapitujt