Kapitujt

Jozuehu: 21. Qytetet e levitëve

¹ Kryetarët e familjeve të Levit shkuan tek Eleazari prift, te Jozuehu, biri i Nunit, e te prijësit e vëllazërive të të gjitha fiseve të bijve të Izraelit ² biseduan me ta në Silo, në tokën e Kanaanit. U thanë: “Zoti urdhëroi me anë të Moisiut që të na jepen qytetet për të banuar dhe rrethinat e tyre për të kullotur bagëtitë”.

³ Bijtë e Izraelit ua dhanë levitëve prej pronave të veta, siç kishte urdhëruar Zoti, ato qytete me rrethinat e tyre.

⁴ U hodh shorti për familjet e Kaatit: bijve të Aronit prift, u ranë me short trembëdhjetë qytete prej fiseve të Judës, të Simonit e të Beniaminit. ⁵ Të tjerëve bijve të Kaatit, d. m. th. levitëve, u ranë me short dhjetë qytete prej fiseve të Efraimit, të Danit e të gjysmës së fisit të Manaseut. ⁶ Kurse bijve të Gersonit shorti u ra të marrin trembëdhjetë qytete prej fiseve të Isaharit, të Aserit e të Neftaliut dhe të gjysmës së fisit të Manaseut në Basan. ⁷ Bijve të Merariut, sipas vëllazërive të tyre, u takuan dymbëdhjetë qytete prej fiseve të Rubenit, të Gadit e të Zabulonit. ⁸ Bijtë e Izraelit ua dhanë levitëve ato qytete me rrethinat e tyre, siç kishte urdhëruar Zoti me anë të Moisiut, me short.

Pjesa e Kaatasve

⁹ Prej fiseve të bijve të Judës e të Simonit iu dhanë qytetet si më poshtë, të caktuara me emër, ¹⁰ bijve të Aronit, prej familjeve të Kaatasve të fisit të Levit, ‑ sepse shorti i parë ra mbi ta.

¹¹ Kariatarbe /d. m. th. Qyteti i Arbeut/, babait të Enakut, që quhet Hebron, në malin e Judës, me kullotat e rrethinës së tij. ¹² Kurse fusha me fshatrat e saj i ishte dhënë më parë për pronë Kalebit, birit të Jefoneut. ¹³ Të bijve të Aronit prift u ra qyteti strehim i Hebronit dhe rrethinat e tija, Lebnami me rrethinat e tija, ¹⁴ Jeteri e Estemoja, ¹⁵ Holoni, Dabiri, ¹⁶ Aini, Jeta, Betsamesi me rrethinat e tyre: nëntë qytete prej këtyre dy fiseve. ¹⁷ Kurse prej fisit të Beniaminit: Gabaoni, Gabaja, ¹⁸ Anatoti, Almti me rrethinat e tyre: katër qytete.

¹⁹ Të gjitha qytetet e bijve të Aronit prift: trembëdhjetë me rrethinat e tyre.

²⁰ Kurse levitëve të tjerë prej familjeve të bijve të Kaatit, u qe dhënë kjo pronë:

²¹ Prej fisit të Efraimit: qyteti strehim i Sikemit me rrethinat e tija në malet e Efraimit dhe Gazeri, ²² Cibsaimi, Betoroni me rrethinat e tyre: katër qytete. ²³ Kurse prej fisit të Danit: Eltecja, Gebatoni, ²⁴ Ajaloni, Getremoni me rrethinat e tyre: katër qytete. ²⁵ Kurse prej gjysmës së fisit të Manaseut: Tanaku e Getremoni me rrethinat e tyre: dy qytete.

²⁶ Bijve të Kaatit, të shkallës më të ulët, u dhanë të gjitha së bashku dhjetë qytete me rrethinat e tyre.

Pjesa e Gersonajve

²⁷ Kurse bijve të Gersonit, familjeve levite, u dhanë prej gjysmës së fisit të Manaseut: qytetin strehim Gaulonin, në Basan, dhe Astarotin me rrethinat e tyre: dy qytete. ²⁸ Kurse prej fisit të Isaharit: Cezionin, Daberetin, ²⁹ Jaramotin, Enganimin me rrethinat e tyre: katër qytete. ³⁰ Prej fisit të Aserit: Masalin, Abdonin, ³¹ Helkatin e Rohobin me rrethinat e tyre: katër qytete. ³² Prej fisit të Neftaliut: qytetin strehim Cedesin, në Galile, Amotdorin, Kartanin me rrethinat e tyre: tri qytete.

³³ Të gjitha qytetet e familjeve të Gersonit: trembëdhjetë me rrethinat e tyre.

Pjesa e bijve të Merariut

³⁴ Bijve të Merariut, levitëve të shkallës më të ulët, sipas vëllazërive të tyre, u qenë dhënë prej fisit të Zabulonit: Jeknaami, Karta, ³⁵ Remona, Naaloli: katër qytete me rrethinat e tyre. ³⁶ Prej fisit të Rubenit, përtej Jordanit, përballë Jerikut, qyteti strehim i Bosorit në rrafshinën e shkretëtirës, Jasa, Kademoti, e Mefaati: katër qytete me rrethinat e tyre. ³⁷ Prej fisit të Gadit qyteti strehim i Ramotit, në Galaad, Mahanaimi, Heseboni e Jazeri: katër qytete me rrethinat e tyre.

³⁸ Të gjitha qytetet e bijve të Merariut sipas vëllazërive të tyre, levitëve të tjerë, dymbëdhjetë qytete.

³⁹ Kështu, pra, të gjitha qytetet e levitëve në pronën e bijve të Izraelit qenë dyzet e tetë ⁴⁰ me rrethinat e tyre, secili qytet me kullotat e veta përreth.

⁴¹ Zoti ia dha Izraelit mbarë tokën për të cilën u ishte përbetuar etërve të tyre se do t’ua jepte dhe e bënë pronë të veten e banuan në të. ⁴² Dhe Zoti u dha qetësi sipas të gjitha përbetimeve që ua kishte bërë etërve të tyre. Asnjë prej armiqve të tyre nuk pati guximin t’u dilte përballë, por të gjithë i vuri nën sundimin e tyre. ⁴³ Asnjë prej të gjitha premtimeve që i bëri Zoti shtëpisë së Izraelit, nuk mbeti pa shkuar në vend: u plotësuan që të gjitha.

Kapitujt