Kapitujt

Jozuehu: 10. Pesë mbretër fillojnë luftën kundër Gabaonit

¹ Kur mori vesh Adonisedeku, mbreti i Jerusalemit, se Jozuehu e kishte shkatërruar Hajin ‑ siç ia kishte bërë Jerikut dhe mbretit të tij, po ashtu ia bëri edhe Hajit e mbretit të tij ‑ dhe se gabaonasit kishin bërë paqe me izraelitët dhe tashmë ishin bashkuar me ta, ² e kapi tmerr i madh. E njëmend, Gabaoni ishte qytet i madh, si një ndër qytetet mbretërore, më i madh se Haji, dhe burrat e tij trima shumë të fortë, ³ prandaj Adonisedeku, mbreti i Jerusalemit, çoi lajmëtarë tek Ohami, mbreti i Hebronit, te Farami, mbreti i Jerimotit, tek Jafjai, mbreti i Lakisit dhe te Dabiri, mbreti i Eglonit. U tha: ⁴ ”Ejani tek unë e më ndihmoni ta shpartallojmë Gabaonin, sepse bëri paqe me Jozuehun dhe me izraelitët. ⁵ Si u bashkuan, pra, pesë mbretërit amorrenj ‑ mbreti i Jerusalemit, mbreti i Hebronit, mbreti i Jerimotit, mbreti i Lakisit, mbreti i Eglonit u ngjitën së bashku me ushtritë e tyre, ngulën fushimin përballë Gabaonit për ta luftuar.

Jozuehu i vjen në ndihmë Gabaonit

⁶ Tashti gabaonasit dërguan tek Jozuehu, që tani gjendej në ja pranë Galgalës, dhe i thanë: “Mos hiq dorë t’i ndihmosh shërbëtorët e tu! Hiq e eja sa më parë, na shpëto e na eja në ndihmë: sepse janë bashkuar kundër nesh të gjithë mbretërit amorenj që banojnë në Malësi.”

⁷ U nis Jozuehu prej Galgalës e me të të gjithë luftëtarët ‑ njëri më trim se tjetri! ⁸ Zoti i tha Jozuehut: “Aspak mos i druaj! Të gjithë t’i kam lëshuar në dorë! Asnjëri prej tyre s’do të mund të të bëjë ballë”!

⁹ Jozuehu u sul mbi ta papritmas pasi kishte udhëtuar prej Galgalës gjithë natën e lume.

Ndihma prej së larti

¹⁰ Zoti lëshoi pështjellim mes tyre posa e panë Izraelin që i shpartalloi duke u bërë dëme të shumta në Gabaon. I ndoqi udhës që shpie përpjetë drejt Betoronit dhe i vrau deri në Azekë e në Macedë. ¹¹ Ndërsa po iknin prej bijve të Izraelit dhe gjendeshin në teposhten e Betoronit, Zoti flaku mbi ta gurë të mëdhenj prej qiellit deri në Azekë dhe mbetën të vrarë shumë më shumë prej breshrit të gurëve se prej shpatës së bijve të Izraelit.

¹² Atëherë, po atë ditë, kur Zoti ia dorëzoi Amorreun në sy të bijve të Izraelit, Jozuehu iu drejtua Zotit e para bijve të Izraelit tha me zë të lartë:

“Ndalu, o diell, mbi Gabaonin,

e ti, o hënë, mbi luginën Ajalon”!

¹³ U ndal dielli edhe hëna,

derisa populli iu hakmor armiqëve të vet.

Pse, a nuk shkruan në librin e të Drejtit? “Zuri vend dielli në mes të qiellit e s’u ngut të perëndojë gati për një ditë të tërë.

¹⁴ Dhe as më parë as pas nuk pati një ditë tjetër porsi ajo, në të cilën Zoti të dëgjojë zërin e një njeriu, sepse Zoti luftoi për Izraelin”.

¹⁵ Pastaj Jozuehu së bashku me të gjithë izraelitët u kthye në zemërimië në Galgalë.

Pesë mbretërit në shpellën Maceda

¹⁶ Porse pesë mbretërit kishin ikur dhe ishin fshehur në shpellën e qytetit Macedë. ¹⁷ E lajmëruan Jozuehun se ishin gjetur të fshehur pesë mbretërit në shpellën e qytetit të Macedës. ¹⁸ Jozuehi dha urdhër: “Rrotulloni gurë të mëdhenj në grykën e shpellës dhe vini njerëz t’i ruajnë të fshehurit”. ¹⁹ Por ju mos zini vend, veçse ndiqni armiqtë, suljuni prapavijës e vritini: mos lejoni që të hyjnë në qytetet e tyre, sepse Zoti, Hyji juaj, i la në duar tuaja”.

²⁰ Pasi i vranë armiqtë dhe i zhdukën deri në shfarosje ‑ shpëtuan një pakicë që u strehuan në qytete të fortifikuara ‑ ²¹ mbarë ushtria e Izraelit u kthye shëndoshë e mirë në llogor në Macedë tek Jozuehu. Askush më s’guxoi as të fliste kundër bijve të Izraelit.

²² Atëherë Jozuehu dha urdhër: “Hapeni grykën e shpellës dhe m’i nxirrni pesë mbretërit që fshihen në të”. ²³ Ashtu bënë: i nxorën pesë mbretërit prej shpellës e i sollën para tij: mbretin e Jerusalemit, mbretin e Hebronit, mbretin e Jerimotit, mbretin e Lakisit, mbretin e Eglonit. ²⁴ Pasi u nxorën para tij, i grishi të gjithë trimat e Izraelit dhe u tha prijësve ushtarakë që ishin me të: “Afrohuni dhe vini këmbët në qafën e këtyre mbretërve”! Pasi u afruan këta dhe i vunë këmbët mbi zverkun e tyre, ²⁵ përsëri u tha: “Mos u trembni as mos kini frikë! Merrni zemër e kini guxim! Kështu do t’ua bëjë Zoti të gjithë armiqëve tuaj, kundër të cilëve do të luftoni”!

²⁶ Pastaj Jozuehu i goditi dhe i vrau. I vari në pesë lisa. Qëndruan të varur deri në mbrëmje. ²⁷ Kur po perëndonte dielli, Jozuehu dha urdhër të uleshin prej lisave. Si u ulën, i flakën në shpellë, ku ishin fshehur. Në grykën e saj rrotulluan gurë të mëdhenj: aty janë edhe sot.

Pushtimi i qyteteve jugore të Kanaanit

²⁸ Po atë ditë Jozuehu e pushtoi edhe Macedën: e goditi qytetin me teh të shpatës, e vrau mbretin e saj dhe të gjithë banorët e saj e s’la të shpëtojë askush. Mbretit të Macedës ia bëri siç ia kishte bërë mbretit të Jerikut.

²⁹ Pastaj Jozuehu me mbarë Izraelin shkoi prej Macedës në Lebnë dhe e sulmoi. ³⁰Zoti e lëshoi qytetin dhe mbretin e tij në duar të Izraelit: e goditën qytetin me tehun e shpatës e me të të gjithë banorët. Nuk lanë gjallë asnjë për be dhe mbretit të Lebnës ia bënë siç ia patën bërë mbretit të Jerikut.

³¹ Prej Lebnës Jozuehu kaloi në Lakis me mbarë Izraelin: pasi e rrethoi me ushtri, nisi ta sulmojë. ³² Po edhe Lakisin Zoti ia lëshoi në dorë Izraelit, që e pushtoi të nesërmën. I preu me shpatë gjithsa ndodheshin në të, siç ia pat bërë Lebnës. ³³ Asohere u ngrit mbreti i Gazerit, Horami, për t’i ndihmuar Lakisit: por Jozuehu e goditi me mbarë popullin e tij deri në shfarosje.

³⁴ Prej Lakisit Jozuehu kaloi bashkë me mbarë Izraelin në Eglon, e rrethoi ³⁵ dhe po atë ditë e pushtoi dhe me shpatë i preu gjithsa ishin në të, po ashtu siç bëri në Lakis.

³⁶ Po ashtu me mbarë Izraelin u ngjit nga Egloni në Hebron dhe luftoi kundër tij. ³⁷ E pushtoi edhe atë. Me teh të shpatës e goditi mbretin e tij, të gjitha fshatrat e banorët e tij që u gjetën aty: nuk u la asnjë shenjë: siç ia bëri Eglonit, po ashtu ia bëri edhe Hebronit: gjithçka gjeti në të, vuri nën shpatë.

³⁸ Si u kthye me mbarë Izraelin prej andej, e sulmoi Dabirin. ³⁹ E pushtoi edhe atë. Mbretin e fshatrat e tij i copëtoi me shpatë: s’la gjallë asnjë për be: siç ua kishte bërë Hebronit e Lebnës dhe mbretërve të tyre, po kështu ia bëri edhe Dabirit e mbretit të tij.

Përsëritje e pushtimit të Jugut

⁴⁰ Kështu pra, Jozuehu e pushtoi mbarë atë vend: Malësitë, Nagebin, Sefelën dhe Rrafshin me mbretërit e tyre. Nuk la në to asnjë të gjallë që merrte frymë, por i vrau siç kishte urdhëruar Zoti, Hyji i Izraelit. ⁴¹ I vrau të gjithë prej Kadesbarnesë deri në Gazë, mbarë vendin Gosen deri në Gabaon. ⁴² Të gjithë mbretërit dhe krahinat e tyre i pushtoi me një sulm të rrufeshëm të vetëm: sepse Zoti, Hyji i Izraelit, luftonte për Izraelin.

⁴³ Atëherë Jozuehu bashkë me mbarë Izraelin u kthye në ja në Galgalë.

Kapitujt