Kapitujt

Levitiku: 26. Përmbledhje. Përfundim

¹ “Mos bëni idhuj e trupore as mos ngulni gur as mos vendosni në gurë fytyra të gdhendura për t’i adhuruar në vendin tuaj. Sepse unë jam Zoti, Hyji juaj.

² Ruani të shtunat e mia e nderojeni Shenjtëroren time. Unë jam Zoti”.

Bekimet

³ “Nëse do të jetoni sipas ligjeve të mia dhe nëse do t’i mbani urdhërimet e mia e do t’i shtini në veprim ato, ⁴ do t’ju jap shira në stinën e tyre dhe toka do të japë prodhimet e veta dhe pemët do të mbushen me fruta. ⁵ Shirja e të korrave do ta zërë vjeljen e vjelja mbjelljen. Do të hani bukën tuaj e do të ngopeni. Do të jetoni në vendin tuaj pa farë frike.

⁶ Do ta vendos paqen brenda kufijve tuaj, do të flini e s’do të ketë kush t’ju trembë. Kafshët dëmtuese do t’i zhduk nga vendi juaj dhe shpata nuk do të përshkojë brenda kufijve tuaj. ⁷ Do t’i vini në ikje armiqtë tuaj dhe ata do të bien para jush nga shpata. ⁸ Pesë prej jush do t’i ndjekin njëqind prej tyre, ndërsa njëqind jush dhjetë mijë të tilla: armiqtë tuaj do të bien nga shpata para syve tuaj.

⁹ Unë do t’ju këqyr ju e do të bëj të shtoheni e ju do të shumoheni dhe do ta përforcoj besëlidhjen time me ju.

¹⁰ Do të hani prodhimet e vjetra të grumbulluara prej të korrave të mëparshme; e kur të vijnë të rejat, do t’i hidhni prodhimet e vjetra.

¹¹ Ndër ju do ta ngul Banesën time dhe nuk do t’ju përbuz. ¹² Do të jetoj ndër ju dhe do të jem Hyji juaj e ju do të jeni populli im. ¹³ Jam unë Zoti, Hyji juaj, që ju nxora prej dheut të Egjiptit që të mos jeni më skllevërit e tyre. Unë e theva zgjedhën tuaj që të ecni kryelartë”.

Mallkimet

¹⁴ “Por, nëse nuk do të më dëgjoni e nuk do t’i zbatoni të gjitha këto urdhërime, ¹⁵ nëse do t’i përbuzni ligjet e mia e do t’i vini nën këmbë vendimet e mia për të mos i vënë në veprim urdhërimet e mia e do ta zhbëni besëlidhjen time, ¹⁶ por, ja, edhe çka do t’ju bëj unë juve: do t’jua fus frikën në palcë, do t’ju çoj rraskapitje dhe ethe që t’jua shterin sytë e t’jua brejnë jetën. Kot do të mbillni farën tuaj, armiqtë do t’jua hanë! ¹⁷ Unë vetë do të jem kundër jush: do të bini para armiqëve tuaj, do t’ju nënshtroheni atyre që ju urrejnë e do të ikni pa ju pasë ndjekur kush.

¹⁸ E në qoftë se edhe kështu nuk do të më dëgjoni, do t’i shtoj shtatëfish ndëshkimet ndaj jush për shkak të mëkateve tuaja ¹⁹ e do ta përul madhështinë e kryeneçësisë tuaj. Hekur do ta bëj qiellin përmbi ju e tokën bronz. ²⁰ Kot do të shkojë fuqia juaj: toka s’do të japë prodhime e pemët nuk do të japin fruta.

²¹ E nëse do të jetoni kundër meje e nuk do të doni të më dëgjoni, shtatëfish do t’jua shtoj varrët tuaja për shkak të mëkateve tuaja: ²² do t’i lëshoj mbi ju egërsirat e malit, të cilat do t’ju lënë pa fëmijë, do t’i shfarosin bagëtitë tuaja edhe ju do t’ju pakësojnë që udhët tuaja të mbeten shkretë.

²³ Po në qoftë se as kështu nuk do t’ju bjerë në fije qortimi im, por përkundrazi do të jetoni në kundërshtim me mua, ²⁴ edhe unë do të vihem kundër jush dhe do t’ju godas shtatë herë për shkak të mëkateve tuaja: ²⁵ do të sjell mbi ju shpatën hakmarrëse të besëlidhjes sime; kur të strehoheni në qytetet tuaja, unë do të çoj ndër ju murtajën e ju do t’u lëshoheni në duar armiqve. ²⁶ E kur ta thyej për ju shkopin e bukës: dhjetë gra do ta pjekin bukën tuaj në një furrë të vetme, do t’jua japin me masë, do të hani, por nuk do të ngiheni.

²⁷ Në qoftë se as kështu nuk do të më dëgjoni, por do të vazhdoni të jetoni kundër vullnetit tim, ²⁸ edhe unë do t’ju kundërshtoj plot zemërim: unë do t’ju ndëshkoj shtatëfish për shkak të mëkateve tuaja: ²⁹ kështu që do të hani mishin e bijve tuaj e mishin e bijave tuaja. ³⁰ Unë do t’i rrafshoj kodrat e idhujve tuaj, do t’i rrënoj lterët e kemimit, meitet tuaj do t’i vë mbi meitet e idhujve tuaj, e do t’ju përbuzë shpirti im. ³¹ Ndërkaq, qytetet tuaja do t’i shndërrojë në gërmadha, shkretë do t’i bëjë shenjëroret tuaja, dhe nuk do ta marr më erën e këndshme të flive tuaja. ³² Do ta shkretoj vendin tuaj: mbi të do të mbesin shtang të habitur armiqtë tuaj kur të vijnë të banojnë në të. ³³ Kurse ju do t’ju shpërndaj ndër paganë, e pas jush do ta nxjerr shpatën prej millit: toka juaj do të mbetë e shkretë e qytetet tuaja gërmadha.

³⁴ Atëherë tokës do t’i pëlqejnë të shtunat e saja, gjatë krejt kohës së vetmimit të saj. Kur ju të gjendeni në dheun e armiqve, ajo do të shtunojë, do t’i çojë në vend të shtunat e veta.

³⁵ Gjatë tërë kohës së shkretimit do të shtunojë, sepse nuk pati pushim në të shtunat tuaja, kur ju banonit në të.

³⁶ E ndër ata prej jush që të mbesin gjallë, do t’u fus në zemrat e tyre tmerrin në vendet e armiqve: do t’i trembë edhe fërshellima e gjethit që bie, do të ikin si prej shpatës; do të bien pa i pasë ndjekur kush. ³⁷ Do të bien njëri mbi tjetrin sikur të iknin prej luftës, pa i pasë ndjekur njeri. Asnjëri prej jush nuk do të ketë guxim t’i dalë përballë armikut. ³⁸ Do të sharroni në mes të paganëve dhe do t’ju shkrijë toka e armikut. ³⁹ Po edhe në qoftë se disa prej jush do të mbesin gjallë, do të kalben në paudhësitë e veta në dheun e armiqve tuaj edhe për shkak të mëkateve të etërve do të shkrihen bashkë me ta. ⁴⁰ Atëherë do t’i pranojnë paudhësitë e veta e të të parëve të vet e do të thonë se bënë shenjtdhunim kundër meje e jetuan kundër vullnetit tim.

⁴¹ Edhe mua m’u desh të sillem kësodore kundër tyre e t’i tres në dheun e armiqve të tyre”.

Mundësia e kthimit

“Ndoshta atëherë zemra e tyre e parrethprerë do të përulet e do të bëjnë pendesë për paudhësitë e veta. ⁴² Atëherë edhe unë do të kujtohem për besëlidhjen time që e lidha me Jakobin, Izakun e me Abrahamin. Do të më kujtohet gjithashtu edhe Vendi ⁴³ që, pasi të ketë qenë lënë prej tyre, do të kënaqet në vetvete në të shtunat e veta kur të mbesë i shkretë për shkak të tyre. Kurse ata do të bëjnë pendesë për mëkatet e veta për shkak se i flakën urdhërimet e mia e i përbuzën ligjet e mia.

⁴⁴ E, madje, edhe kur të jenë në dheun e armiqve të tyre, nuk do të heq krejtësisht dorë prej tyre as që do t’i përbuz deri në atë masë që t’u tresë fara e ta zhbëj besëlidhjen time me ta. Sepse unë jam Zoti, Hyji i tyre. ⁴⁵ E do t’ua përkujtoj atyre besëlidhjen me të parët e tyre, të cilët i nxora nga dheu i Egjiptit në sy të paganëve që të jem Hyji i tyre. Unë, Zoti”.

⁴⁶ Këto janë urdhëresat, urdhërimet dhe ligjet që i dha Zoti ndërmjet vetes e bijve të Izraelit në malin Sinai me anë të Moisiut.

Kapitujt