Kapitujt

2 i Kronikave: 9. Vdekja e Salomonit

¹ Po edhe mbretëresha e Sabës, kur dëgjoi për zërin e madh të Salomonit, erdhi për ta sprovuar atë me anë të gjëegjëzave. Erdhi në Jerusalem me një përcjellje të madhe e me gamile të ngarkuara me erëra të mira, me ar të shumtë e me gurë të paçmueshëm. Kur arriti te Salomoni, foli me të për gjithçka kishte në zemër të vet. ² Salomoni i shtjelloi gjithçka që ajo ia kishte parashtruar dhe s’i mbeti asgjë që ai nuk ia sqaroi.

³ E kjo, pasi pa, d. m. th. urtësinë e Salomonit, shtëpinë që kishte ndërtuar, ⁴ ushqimet në tryezën e tij, banesat e oborrtarëve dhe shërbimin e mëkëmbësve të tij, veshjet e tyre, kuptarët dhe petkat e tyre, flitë që i kushtonte në Shtëpinë e Zotit, prej habisë, mbeti fare pa frymë! ⁵ Atëherë i tha mbretit: “Paska qenë e vërtetë fjala që kam dëgjuar në dheun tim për pasurinë dhe urtësinë tënde: ⁶ unë nuk u besoja fjalëve që thuheshin deri që erdha vetë e pashë me sytë e mi e po shoh se më paska qenë treguar a po a jo gjysma e urtësisë sate: ia tejkalove zërit të madh që kam dëgjuar! ⁷ Lum trimat e tu e lum shërbëtorët e tu që të rrinë pranë tërë kohën dhe e dëgjojnë urtësinë tënde! ⁸ Qoftë bekuar Zoti, Hyji yt, që i pëlqeu të të caktojë ty mbi fronin e vet për mbret në emër të Zotit, Hyjit tënd! Pse Hyji yt e do Izraelin e pse do ta ruajë për amshim, për këtë arsye edhe të vuri ty mbret mbi të për ta ushtruar të drejtën dhe drejtësinë”.

⁹ Atëherë ajo i dha mbretit njëqind e njëzet talenta ar, erëra të mira pa masë shumë dhe gurë të paçmueshëm. Kurrë më nuk pat aq erëra të mira si ato që mbretëresha e Sabës ia dhuroi mbretit Salomon!

¹⁰ Po ashtu edhe shërbëtorët e Hiramit dhe shërbëtorët e Salomonit i sollën ar prej Ofirit dhe dru sandali e gurë të çmueshëm. ¹¹ Prej lëndës së sandalit mbreti i punoi shkallët në Shtëpinë e Zotit dhe në pallatin mbretëror si edhe cetra e harpa për këngëtarë. Kurrë nuk ishte parë lëndë e tillë në dheun e Judës!

¹² Po ashtu edhe mbreti Salomon i dhuroi mbretëreshës së Sabës gjithçka dëshiroi dhe kërkoi, madje shumë më shumë se sa i kishte sjellë atij. Atëherë ajo u kthye me shërbëtorët e vet në vendin e vet.

¹³ Pesha e arit që i sillej Salomonit për çdo vit ishte gjashtëqind e gjashtëdhjetë e gjashtë talenta ari, ¹⁴ pa marrë parasysh sasinë që i vinte nga tregtarët dhe shitësit si tatim dhe sasinë e të gjithë mbretërve të Arabisë e të prijësve të vendit, të cilët i sillnin Salomonit ar e argjend.

¹⁵ Mbreti Salomon punoi dyqind mburoja ari: për secilën u përdor pesha e gjashtëqind siklave të artë. ¹⁶ Punoi gjithashtu edhe treqind mburojëza të arta: për secilën mburojëz shpenzoi nga treqind sikla të artë. Këto mbreti i vendosi në pallatin që quhet Pylli i Libanit.

¹⁷ Gjithashtu mbreti e punoi një fron të fildishtë të madh dhe e veshi me ar të kulluar. ¹⁸ I punoi edhe gjashtë shkallë, nëpër të cilat hipej në fron, mëkëmbëzën e artë dhe në të dy anët nga një bërrylëz si dhe dy luanë në këmbë afër bërrylzave. ¹⁹ Gjithashtu edhe dymbëdhjetë luanë të tjerë të vegjël në këmbë përmbi shkallë në të dy anët: një fron i tillë nuk qe në asnjë mbretëri!

²⁰ Të gjitha enët e tryezës së mbretit ishin të arta si dhe enët e pallatit të Pyllit të Libanit ishin prej arit të kulluar. Në kohën e Salomonit argjendi nuk çmohej si i vlershëm. ²¹ E njëmend anijet e mbretit shkonin me shërbëtorët e Hiramit në Tarsis dhe njëherë në tri vjet anijet ktheheshin prej Tarsisit të ngarkuar me ar, me argjend, me fildish, me majmunë e me pallonj.

²² Mbreti Salomon i tejkaloi të gjithë mbretërit e botës me pasuri e me urtësi. ²³ Të gjithë mbretërit e botës dëshironin ta shihnin Salomonin për t’ia dëgjuar urtinë që ia kishte dhuruar Hyji zemrës së tij. ²⁴ Vit për vit i dhuronin enë të argjendta e të arta, petka, armë e erëra të mira, kuaj e mushka. ²⁵ Salomoni kishte katër mijë stalla kuajsh, kurse kuaj e kalorës dymbëdhjetë mijë. Ato i vendosi në qytete karrocash lufte si dhe në Jerusalem, ku qëndronte mbreti. ²⁶ Ai sundonte mbi të gjithë mbretërit prej lumit Eufrat deri në tokën e filistinëve e deri në kufinj të Egjiptit. ²⁷ Në Jerusalem solli një sasi të madhe argjendi thua se gurë, një sasi lënde cedri si manat që rriten në Sefelë. ²⁸ Tek ai sillnin kuaj prej Egjiptit e prej çdo krahine.

Vdekja e Salomonit

²⁹ Veprat e tjera të Salomonit, të parat e të mëpasmet, janë të shkruara në historinë e profetit Natan si dhe në Librin e profecisë së Ahisë nga Siloja si edhe në vëgimin e Ados, vegimtarit të Roboamit, birit të Nabatit.

³⁰ Salomoni mbretëroi në Jerusalem mbi mbarë Izraelin dyzet vjet ³¹ e pastaj pushoi me etërit e vet. E varrosën në Qytetin e Davidit, babait të vet. Në vend të tij u bë mbret Roboami, i biri.

Kapitujt