Kapitujt

2 i Samuelit: 23. Fjalët e fundit të Davidit

¹ Këto janë fjalët e fundit të Davidit:

“Fjala e Davidit, birit të Isait,

fjalët e burrit që qe lartësuar shumë,

të Shuguruarit të Hyjit të Jakobit,

këngëtarit të ëmbël të Izraelit.

² Nëpër mua flet Shpirti i Zotit,

fjala e tij përmbi gjuhën time.

³ Foli Hyji i Izraelit,

më tha Qeta e Izraelit:

“Kush i sundon njerëzit me drejtësi,

kush sundon me frikën e Hyjit,

⁴ është si drita e agimit, sapo të ketë lindur dielli,

në mëngjes kur re nuk ka,

që bën të xixëllojë pas shiut

barin që nga toka mbin”.

⁵ Pse a s’është e tillë shtëpia ime me Hyjin?

Një besëlidhje të amshueshme Ai lidhi me mua,

krejt në rregull e pikë për pikë të forcuar!

Pse a s’do të bëjë të ngallitë

i tërë shpëtimi im, çdo gjë e dëshirueshme?

⁶ Kurse keqbërësit të gjithë

janë të përbuzur porsi ferrat

që s’kapen me dorë;

⁷ kush i prek, përdor hekur ose dorëzën e heshtës,

dhe krejtësisht digjen në zjarr”.

Trimat e përmendur të Davidit

⁸ Këta janë emrat e trimave të Davidit:

Jesbaal Hakamonasi, prijësi ndër të Tre. Ky ngriti heshtën e vet kundër tetëqind vetëve dhe i vrau në një sulm.

⁹ Pas tij vjen Eleazari, biri i Dodo Ahohitit, njëri prej tre trimave. Ky ishte me Davidin në Afesdomim, kur atje u bashkuan për të luftuar filistenjtë. ¹⁰ Kur u tërhoqën izraelitët ai qëndroi dhe i preu filistenjtë derisa nuk iu ngri dora e nuk iu kap për shpate si të ishte një copë me të. Zoti dha atë ditë një fitore të madhe dhe ushtria u kthye vetëm për të bashkuar prenë.

¹¹ Pas këtij vjen Sema, biri i Age Araritit. Kur filistenjtë u bashkuan në Lehi, fusha ishte plot me thjerrë. Pasi iku mbarë ushtria prej frikës së filistenjve, ¹² ky zuri vend në mes të fushës, e mbrojti dhe i vrau filistenjtë. Zoti dhuroi fitore të madhe.

¹³ Një herë Tre prej Tridhjetë vetëve u nisën për rrugë në kohën e korrjes e erdhën te Davidi, që ishte në shpellën Odolam. Llogori i filistenjve ishte i ngulur në luginën Rafaim. ¹⁴ Asohere Davidi gjendej në kullën e vet, kurse posta e filistenjve ishte në Betlehem. ¹⁵ Davidi shprehu këtë dëshirë: “Oh sikur të gjendej dikush të më jepte të pi ujë nga pusi që është te dera e Betlehemit”! ¹⁶ Atëherë u lëshuan këta tre trima e i përshkuan llogoret e filistenjve, mbushën ujë nga pusi i Betlehemit, që ishte te dera, e ia sollën Davidit. Por Davidi s’deshi ta pinte, por e kushtoi si ujë njomjeje për nder të Zotit ¹⁷ e tha: “Mos e thëntë Zoti të bëj një punë të tillë! Si të pi gjakun e këtyre burrave që shkuan me kokë në gërshërë”? Prandaj nuk deshi ta pinte. Ja, këtë bënë këta tre trima!

¹⁸ Abisai, vëllai i Joabit, birit të Sarvisë, ishte në krye të të tridhjetëve. Ky është ai që ngriti heshtën e vet kundër treqind vetëve dhe i vrau. ¹⁹ I emëruar ndër të tridhjetët dhe më i përmenduri ndër të tridhjetët, ai ishte kryetari i tyre, por me trimëri nuk arriti te tre të parët.

²⁰ Banaja, biri i Jojadës, trim i fortë për vepra të mëdha, nga Kabseeli. Ky i vrau dy bijtë e Arielit prej Moabit dhe ky një ditë me borë zbriti në shpellë dhe vrau luanin. ²¹ Po ky e vrau egjiptianin, një njeri tejet trupmadh që në dorë kishte heshtën. Ky e sulmoi egjiptianin me shkop e në dyluftim egjiptianit ia nxori heshtën prej dorës dhe me heshtën e tij e vrau. ²² Këto trimëri i bëri Banaja, biri i Jojadës, edhe ky njihet ndër Tridhjetët trimat e fortë. ²³ Ishte më bujari ndër të Tridhjetët, megjithatë nuk arriti të radhitet ndër të Tre. Davidi e bëri prijës të truprojës së vet.

²⁴ Asaeli, vëllai i Joabit, ishte ndër të Tridhjetët. Elkanani, biri i Dodos prej Betlehemit, ²⁵ Sama prej Harodit, Elika prej Harodit, ²⁶ Helesi prej Faletit, Hira, biri i Akcesit, prej Tekuesë, ²⁷ Abiezeri prej Anatotit, Sobokai prej Husës, ²⁸ Selmoni prej Ahohitit, Maharai Netofatiti, ²⁹ Heledi, biri i Baanë Netofatitit, Ithai, biri i Ribait, nga Gabaa e bijve të Beniaminit, ³⁰ Banajë Faratoniti, Hedai prej përrenjve Gaas, ³¹ Abibaal Arbatiti, Azmaveti nga Bahurimi, ³² Eliabai prej Saalbonit, Jaseni prej Gunit, ³³ Jonatani, biri i Samës prej Ararit, Akiami, biri i Sarar Araritit. ³⁴ Elifaleti, biri i Asbai Makatitit, Eliami, biri i Akitofelit Gelonit, ³⁵ Hesrai prej Karmelit, Farai prej Arabit, ³⁶ Igaali, biri i Natanit prej Sobës, Baniu prej Gadit, ³⁷ Seleku prej Animonit, Naharai prej Berotit, armëmbajtësi i Joabit, birit të Sarvisë, ³⁸ Irë Jetriti, Garebi, edhe ky Jetrit, ³⁹ dhe Uri Heteu.

Gjithsej tridhjetë e shtatë.

Kapitujt