Kapitujt

2 i Samuelit: 20. Kryengritja e Sebës

¹ Aty ndodhi rastësisht një burrë i keq me emrin Seba, biri i Bokriut, i beniaminas. Ky i ra borisë dhe tha:

“Ne nuk kemi pjesë në Davidin,

as trashëgim në birin e Isait!

Kush është Izrael në tendat e veta”!

² Kështu u largua çdo izraelit prej Davidit e shkoi pas Sebës, birit të Bokriut; kurse bijtë e Judës qëndruan me mbretin e vet dhe e përcollën prej Jordanit deri në Jerusalem.

³ Kur arriti mbreti në shtëpinë e vet në Jerusalem, i mori dhjetë shemrat e veta që i kishte lënë për të ruajtur shtëpinë, dhe i vendosi në një banesë nën rojë. U jepte ç’u duhej për jetesë, por nuk hynte më tek ato. Kështu ato jetuan të mbyllura deri në vdekjen e tyre, si vejusha, edhe pse me burrë gjallë.

Vrasja e Amasës

⁴ Mbreti i tha Amasës: “M’i bashko brenda tri ditësh të gjithë njerëzit e Judës e ji edhe ti këtu”. ⁵ Shkoi, pra, Amasa për ta bashkuar Judën, por u vonua përtej kohës që i ishte caktuar. ⁶ Atëherë Davidi i tha Abisait: “Tani Seba, biri i Bokriut, do të na e bëjë më zi se Absalomi: merri pra, ushtarët e zotërisë tënd dhe ndiqe sa nuk i ka gjetur qytetet e fortifikuara e të na dalë dore”. ⁷ Kështu, pra, me të shkuan ushtarët e Joabit, keretët e feletët dhe të gjithë trimat e fortë. Dolën prej Jerusalemit për ta ndjekur Sebën, birin e Bokriut.

⁸ Kur arritën te Guri i Madh që është në Gabaon, para tyre ia behu Amasa. Joabi ishte i veshur me petkun e luftës, përmbi të cilin kishte brezin e në të kishte të ngjeshur në ije shpatën në mill, të cilën e nxori me një lëvizje të lehtë të dorës. ⁹ Joabi e përshëndeti Amasën: “Si të kam, or vëlla?”, dhe me dorën e djathtë e kapi për mjekrre Amasën sikur po e përqafonte. ¹⁰ Porse Amasa nuk e vuri re shpatën në dorën e Joabit, i cili ia nguli në baqth dhe ia zbrazi zorrët për fushë. S’pati nevojë t’i binte për të dytën herë, sepse ra vdekur përtokë. Joabi me të vëllanë Abisain e vazhdoi ndjekjen kundër Sebës, birit të Bokriut.

¹¹ Ndërkaq një djalosh i Joabit qëndroi pranë kufomës së Amasës e bërtiste: “Kush do të jetë me Joabin e për Davidin, le të shkojë pas Joabit”! ¹² Amasa, i larë në gjak, ishte i shtrirë në mes të rrugës. Kur pa ky djalosh se po ndalej mbarë populli për ta shikuar, e largoi Amasën prej rrugës, e qiti në një arë dhe e mbuloi me leshnik, pasi pa se të gjithë ata që kalonin ndaleshin për ta shikuar. ¹³ Kur qe larguar kufoma nga rruga, të gjithë u vunë pas Joabit për ta ndjekur Sebën, birin e Bokriut.

Shpartallimi i kryengritjes

¹⁴ Seba kishte kaluar nëpër të gjitha fiset e Izraelit deri në Abelbetmaakë. U bashkuan edhe të gjithë bokritët dhe shkuan pas tij. ¹⁵ Erdhën, pra, dhe e sulmonin në Abelbetmaakë. Punuan një pendë kundër qytetit. Mbarë populli që ishte me Joabin, groponte për t’i rrënuar muret e qytetit.

¹⁶ Atëherë një grua e mençur thirri prej qytetit: “Dëgjoni! Dëgjoni! Thuajini Joabit: Afrohu këtu se dua të të them diçka”!

¹⁷ Ky, kur u afrua tek ajo, ajo i tha: “A je ti Joabi”? Ai iu përgjigj: “Unë”. Ajo i tha kështu: “Dëgjoji fjalët e shërbëtores sate”. Ky iu përgjigj: “Po dëgjoj”. ¹⁸ Ajo vijoi: “Dikur thuhej kështu: ‘Le të pyetet për këshillë në Abel e puna është e kryer’. ¹⁹ Unë jam për paqen e besnikëve të Izraelit, e ti po kërkon ta përmbysësh e ta rrënosh qytetin ‑ nënë në Izrael. Pse po e përmbys trashëgimin e Zotit”?

²⁰ Joabi iu përgjigj: “Larg qoftë, larg qoftë kjo gjë prej meje! Unë nuk dëshiroj të shuaj as të rrënoj. ²¹ Puna nuk qëndron kështu! Por është një njeri që quhet Sebë, biri i Bokriut, prej malit të Beniaminit, që ka çuar dorë kundër mbretit David: dorëzojeni vetëm atë, e unë do të largohem nga qyteti”. Gruaja iu përgjigj Joabit: “Ja, nëpër mur do të të lëshohet koka e tij”. ²² Gruaja u kthye në qytet dhe i foli popullit me urtësi. Ata ia prenë kokën Sebës, birit të Bokriut, dhe e hodhën te Joabi. Joabi i ra borisë, u larguan nga qyteti dhe secili shkoi në tendën e vet, kurse Joabi u kthye në Jerusalem te mbreti.

Zyrtarët e mëdhenj të Davidit

²³ Joabi ishte në krye të mbarë ushtrisë së Izraelit. Banaja, biri i Jojadës, ishte në krye të keretëve e të feletëve. ²⁴ Odonirami ishte në krye të punimeve. Jozafati, biri i Akiludit, ishte arkivist. Siva ishte skrib, kurse Sadoku dhe Abiatari ishin priftërinj. ²⁵ Ira, Jairiti, edhe ai ishte prifti i Davidit.

Kapitujt