Kapitujt

2 i Samuelit: 8. Luftërat e Davidit

¹ Pas kësaj Davidi i mundi filistenjtë dhe i nënshtroi. Prej duarve të filistenjve Davidi mori Getin dhe qytetet e tija. ² I mundi edhe moabët dhe i mati me litar duke i shtrirë për tokë: i mati dy litarë për t’i vrarë e një litar të plotë për t’i lënë në jetë. Kështu Moabi u bë skllav i nënshtruar për t’i paguar të dhjetat.

³ Davidi e mundi edhe Adadezerin, birin e Rohobit, mbretin e Sobës, kur doli për ta shtrirë sundimin e vet mbi lumin Eufrat. ⁴ Davidi i zuri robër lufte një mijë e shtatëqind kalorës dhe njëzet mijë këmbësorë. Të gjithë kuajve të karrocave ua preu dizgoret; por prej tyre kurseu njëqind karroca. ⁵ Erdhën edhe sirianët e Damaskut për t’i ndihmuar Adadezerit, mbretit të Sobës, dhe Davidi vrau njëzet e dy mijë vetë prej sirianëve. ⁶ Davidi vuri qeveritarë në Sirinë e Damaskut dhe sirianët u bënë skllevër të Davidit dhe i paguanin të dhjetat.

Çkado që ndërmerrte Davidi, Zoti i ndihmonte në të gjitha.

⁷ Davidi i mori armët e arta që i kishin ushtarët e Adadezerit dhe i solli në Jerusalem. ⁸ Po ashtu edhe prej Tebahut e prej Berotait, qytete të Adadezerit, mbreti David solli bronz me shumicë të madhe fort.

⁹ Kur dëgjoi mbreti i Ematit, Tou, se Davidi i kishte thyer të gjitha fuqitë e Adadezerit, ¹⁰ Tou e dërgoi birin e vet Adoramin te Davidi mbret, për t’i shprehur përgëzimet e tija e për t’i dhënë nder që kishte luftuar kundër Adadezerit dhe e kishte mundur, sepse Adadezeri ishte armik lufte i Tout. Adorami i solli enë të argjendta, enë të arta e enë të bronzta. ¹¹ Edhe këto Davidi mbret ia kushtoi Zotit bashkë me arin e argjendin që ia kishte kushtuar më parë e që kishte marrë prej të gjithë popujve që i kishte nënshtruar: ¹² prej sirianëve, moabëve, prej bijve të Amonit e filistenjve, prej amalekasve dhe prej duarve të Adadezerit, birit të Rohobit, mbretit të Sobës.

¹³ Davidi gjithashtu ia rriti vetes zërin edhe kur, ndërsa po kthehej ngadhënjimtar mbi Idumenë, i vrau tetëmbëdhjetë mijë vetë në luginën e Kripës. ¹⁴ Në Idumé caktoi qeveritarët: kështu mbarë Idumeja ra nën sundimin e Davidit.

Çkado që ndërmerrte Davidi, Zoti i ndihmonte në të gjitha.

Qeverisja e mbretërisë

¹⁵ Davidi mbretëronte mbi mbarë Izraelin. Vinte në zbatim të drejtën dhe drejtësinë kundrejt mbarë popullit të vet. ¹⁶ Joabi, biri i Sarvisë, ishte në krye të ushtrisë, kurse Jozafati, biri i Ahiludit, ditarmbajtës. ¹⁷ Sadoku, biri i Akitobit dhe Abiatari, biri i Akimelekut, ishin priftërinj, kurse sekretar ishte Sarajai. ¹⁸ Banaja, biri i Jojadës, sundonte keletët dhe feletët. Kurse bijtë e Davidit ishin priftërinj.

Kapitujt