Kapitujt

2 i Samuelit: 6. Arka e Besëlidhjes në Jerusalem

¹ Përsëri Davidi i bashkoi të gjithë të zgjedhurit e Izraelit ‑ tridhjetë mijë vetë. ² U ngrit Davidi e shkoi bashkë me ushtrinë që ishte me të në Baalë të Judës për ta sjellë prej andej Arkën e Hyjit, mbi të cilën qe thirrur Emri i Zotit të ushtrive, që rri mbi kerubinë. ³ Pasi e morën Arkën e Hyjit nga shtëpia e Abinadabit, që ishte mbi kodër, e vunë në karrocë të re. Oza dhe Ahioi, bijtë e Abinadabit, e përcillnin karrocën: ⁴ Oza ecte përskaj Arkës, kurse Ahioi i printe. ⁵ Ndërkaq Davidi dhe mbarë Izraeli kërcenin në praninë e Zotit, këndonin gjithsa kishin fuqi të përcjellë me cetra, lira, tupana, dajre e cimbale.

⁶ Porse kur arritën te lëmi i Nakonit, Oza shtriu dorën nga Arka e Hyjit dhe u mbajt, sepse qetë, duke u ngutur, gati e rrëzuan. ⁷ Por zemërimi i Zotit u ndez kundër Ozës dhe e goditi për shkak të guximit të tepruar dhe vdiq po aty përskaj Arkës së Hyjit. ⁸ Davidit i erdhi keq që Zoti e shitoi Ozën. Ai vend u quajt Faresoza /d. m. th. JaOzës/ deri në ditën e sotme.

⁹ Atë ditë Davidin e kapi frika e Zotit e tha: “Si do të hyjë tek unë Arka e Zotit”? ¹⁰ E nuk e çoi Arkën e Zotit te vetja në qytetin e Davidit, por e çoi në shtëpinë e Obededom Geteut. ¹¹ Kështu Arka e Zotit qëndroi në shtëpinë e Obededom Geteut tre muaj dhe Zoti e bekoi Obededomin dhe mbarë familjen e tij.

¹² E lajmëruan Davidin mbret: “Zoti e bekoi Obededomin me gjithçka ka për shkak të Arkës së Zotit”. Atëherë shkoi Davidi dhe e solli prej shtëpisë së Obededomit Arkën e Zotit në qytetin e Davidit me gëzim të madh. ¹³ Posa bënë gjashtë hapa, ata që bartnin Arkën e Zotit, Davidi flijoi një ka dhe një viç të majmë. ¹⁴ Davidi vallëzonte gjithsa kishin fuqi para Zotit. Porse Davidi ishte i mbështjellë vetëm me shpinor të linjtë. ¹⁵ Kështu Davidi dhe mbarë Izraeli e bartnin Arkën e Zotit duke brohoritur e duke i rënë borisë.

¹⁶ Kur Arka e Zotit hyri në qytetin e Davidit, Mikola, bija e Saulit, duke këqyrur nëpër dritare, e pa Davidin tek hidhej e kërcente para Zotit dhe e përbuzi në zemrën e vet.

¹⁷ Atëherë e shtinë Arkën e Zotit dhe e vendosën në vendin e saj në mes të tendës që kishte ngrehur Davidi për të. Atëherë Davidi kushtoi para Zotit fli shkrumbimi dhe fli pajtimi. ¹⁸ Kur mbaroi së flijuari flinë e shkrumbimit dhe flitë e pajtimit, e bekoi popullin në emër të Zotit të ushtrive. ¹⁹ Atëherë i ndau shumicës së Izraelit, secilit burrë e secilës grua nga një bukë, nga një copë mish dhe nga një ëmbëlsirë rrushi. U shpërnda mbarë populli dhe secili shkoi në shtëpinë e vet.

²⁰ Kur u kthye Davidi për të bekuar edhe familjen e vet, i doli para Mikola, bija e Saulit, e i tha Davidit: “Oh, sa i madhërishëm qe sot mbreti i Izraelit duke e zbuluar veten para shërbëtoreve të shërbëtorëve të vet sikurse zbulohet një rrugaç”! ²¹ Davidi iu përgjigj Mikolës: “Unë vallëzoj para Zotit. Qoftë bekuar Zoti që më zgjodhi mua në vend të tët eti e të mbarë shtëpisë së tij, për të më bërë prijësin e mbarë popullit të Zotit, Izraelit. ²² Do të luaj para Zotit e do të bëhem edhe më i përvuajtur se ç’u bëra e do ta përul vetveten para syve të mi, por para shërbëtoreve, për të cilat ti po thua, do të dukem edhe më i madhërishëm”. ²³ Prandaj Mikola, e bija e Saulit, nuk pati fëmijë deri në ditën e vdekjes së vet.

Kapitujt