Kapitujt

2 i Samuelit: 5. Davidi i shuguruar mbret i Izraelit

¹ Atëherë erdhën të gjitha fiset e Izraelit

te Davidi në Hebron dhe i thanë: “Ja, ne jemi ashti yt dhe mishi yt. ² Po edhe më parë, kur Sauli ishte mbreti ynë, ishe ti ai që i drejtoje të gjitha lëvizjet e Izraelit. Edhe Zoti të ka thënë: ‘Ti do ta kullotësh popullin tim Izraelin dhe ti do të jesh prijës mbi Izraelin’”.

³ Po ashtu erdhën edhe të gjithë pleqtë e Izraelit te mbreti në Hebron, dhe Davidi mbret lidhi besëlidhje me ta në Hebron në praninë e Zotit. Ata e lyen Davidin mbret përmbi Izraelin. ⁴ Davidi kishte tridhjetë vjet kur filloi të mbretërojë dhe mbretëroi për dyzet vjet: ⁵ në Hebron mbretëroi mbi Judën shtatë vjet e gjashtë muaj, kurse në Jerusalem mbretëroi tridhjetë e tri vjet mbi mbarë Izraelin e Judën.

Pushtimi i Jerusalemit

⁶ U çua mbreti dhe të gjithë njerëzit që ishin me të e shkoi në Jerusalem kundër jebusenjve që popullonin vendin. Ata i thanë Davidit: “Ti s’do të hysh këtu, por do të të dëbojnë të verbërit e të çalët”, që donin të thoshin: “S’do të mund të hyjë këtu Davidi”. ⁷ Por Davidi e pushtoi kështjellën Sion: d. m. th. qytetin e Davidit. ⁸ Davidi kishte thënë atë ditë: “Secili që do t’i vrasë jebusenjtë, le t’i kapë nëpër kanal të kroit... ndërsa të çalët dhe të verbërit i urren shpirti i Davidit”. Këndej edhe u trajtua thënia: “I verbëri dhe çalamani të mos hyjnë në shtëpi”. ⁹ Davidi banoi në kështjellë dhe e quajti Qyteti i Davidit. Atëherë Davidi i ndërtoi muret rrethuese prej Milos e brenda. ¹⁰ Davidit gjithnjë i rritej pushteti, sepse Zoti, Hyji i ushtrive, ishte me të.

¹¹ Po edhe mbreti i Tirit Hirami dërgoi te Davidi delegatë me dru cedri, gdhendës e muratorë mjeshtër muri dhe ia ndërtuan shtëpinë e Davidit. ¹² Atëherë Davidi e mori vesh se Zoti e kishte përforcuar mbret mbi Izraelin dhe se e kishte lartësuar mbretërinë e tij prej dashurisë që kishte ndaj popullit të vet Izraelit.

Djemtë e Davidit në Jerusalem

¹³ Pasi erdhi Davidi prej Hebronit, mori edhe ja e gra të tjera prej Jerusalemit. Kështu i lindën Davidit edhe të tjerë djem e vajza. ¹⁴ Dhe ja, emrat e atyre që i lindën Davidit në Jerusalem: Samuai, Sobabi, Natani, Salomoni, ¹⁵ Jebahari, Elisuai, Nafegu, ¹⁶ Jafiai, Elisama, Elioda dhe Elifaleti.

Fitorja kundër filistenjve

¹⁷ Kur morën vesh filistenjtë se Davidin e kishin shuguruar mbret mbi Izraelin, dolën të gjithë për ta kapur Davidin. Kur dëgjoi Davidi për këtë gjë, zbriti në kështjellë. ¹⁸ Kurse filistenjtë u shpërndanë nëpër luginën Rafaim. ¹⁹ Davidi e pyeti Zotin e tha: “A t’i sulmoj filistenjtë? A do t’i lëshosh në dorën time”? Zoti iu përgjigj Davidit: “Sulmoji, sepse me siguri do t’i lëshoj filistenjtë në dorën tënde”. ²⁰ Kështu, pra, Davidi erdhi në Baalfarasim /d. m. th. Zoti i depërtimeve/, i mundi dhe tha: “Depërtoi Zoti nëpër armiqtë e mi para meje siç depërton uji”. Për këtë arsye atij vendi iu vu emri Baalfarasim. ²¹ I lanë aty idhujt e vet e Davidi dhe njerëzit e tij i morën.

²² Filistenjtë u ngjitën përsëri dhe u shpërndanë nëpër luginën e refaimëve. ²³ Davidi e pyeti përsëri Zotin. Zoti iu përgjigj: “Mos i sulmo ballë për ballë, por sillu pas shpinës së tyre e dilu në sulm nga ana e pyllit të balsamëve. ²⁴ Kur ta dëgjosh krismën e hapave përmbi majat e balsamëve, atëherë sulu në përleshje, sepse atëherë Zoti do të dalë para teje për t’i goditur ushtritë e filistenjve”.

²⁵ Davidi veproi siç i kishte urdhëruar Zoti dhe i shfarosi filistenjtë që nga Gabaoni deri në hyrje të Gezerit.

Kapitujt