Kapitujt

2 i Samuelit: 4. Vrasja e Isbaalit

¹ Kur Isbaali, biri i Saulit, mori vesh se kishte mbetur Abneri në Hebron, humbi krejt guximin dhe mbarë popullit i hyri tmerri. ² Biri i Saulit kishte dy prijës çetash. Njëri quhej Baanë e tjetri Rekab. Ishin bijtë e Remonit Berotas, nga fisi i Beniaminit, sepse Beroti mbahet me Beniaminin. ³ Berotasit kishin ikur në Getaim dhe aty qëndruan si të ardhur deri në këtë kohë.

⁴ Jonatani, biri i Saulit, kishte një djalë çalaman në të dy këmbët. Ishte pesë vjeç kur prej Jezrahelit erdhi lajmi i zi i Saulit e i Jonatanit. Mëndesha e tij e kapi fëmijën dhe iku; por, ndërsa po nxitonte të ikte, i ra përtokë dhe mbeti çalaman. Quhej Meribaal.

⁵ U çuan, pra, bijtë e Remon Berotit, Rekabi e Baana, dhe erdhën për pikë të vapës te shtëpia e Isbaalit dhe hynë brenda ndërsa ai po flinte në shtrat në pushimin e mesditës. Derëtaren, edhe atë e kishte zënë gjumi duke pastruar grurin. ⁶ Kështu ata hynë brenda në shtëpi dhe Rekabi e vëllai i tij Baani e goditën në baqth e ikën. ⁷ Kur kishin hyrë ata në shtëpi, ai po flinte në shtratin e vet në dhomë. Ata e goditën dhe e vranë, ia morën kokën dhe gjithë natën udhëtuan nëpër Arabë.

⁸ Kokën e Isbaalit ia çuan Davidit në Hebron dhe i thanë mbretit: “Ja, koka e Isbaalit, birit të Saulit, armikut tënd, i cili kërkonte të të vriste. Por Zoti deshi t’i lejonte hakmarrje imzotit mbret në këtë ditë mbi Saulin dhe mbi farën e tij”.

⁹ E Davidi iu përgjigj Rekabit dhe Baanës, vëllait të tij, bijve të Remonit berotas, dhe u tha: “Pasha Zotin e gjallë që më shpëtoi nga çdo rrezik, ¹⁰ në qoftë se atë që më lajmëroi e më tha: ‘Sauli ka mbetur!’ e që kujtonte se po më sjell një sihariq, e kapa dhe e vrava në Siceleg ‑ të cilit i thoshte mendja se do ta paguaja për lajmin ‑ ¹¹ po çka do t’ju bëj tani njerëzve të pashpirt që e vranë njeriun pa u pasë bërë kurrfarë faji, madje në shtëpinë e vet e në shtratin e vet?! Po a nuk do ta kërkoj gjakun e tij prej duarve tuaja e nuk do t’ju zhduk nga kjo botë”?! ¹² Atëherë Davidi u dha urdhër ushtarëve të vet dhe i vranë. Pastaj u prenë duart e këmbët dhe i varën te liqeni në Hebron. Pastaj morën kokën e Isbaalit dhe e varrosën në varrezën e Abnerit në Hebron.

Kapitujt