Kapitujt

Levitiku: 19. Urdhëresa morale e kultuale

¹ Zoti foli me Moisiun e tha:

² “Fol me mbarë bashkësinë izraelase e thuaju:

Jini të shenjtë, sepse unë jam i shenjtë, Zoti, Hyji juaj!

³ Secili prej jush le ta druajë t’ëmën e të atin e vet! Mbani të shtunat e mia! Unë jam Zoti, Hyji juaj!

⁴ Mos u ktheni kah hyjnitë e rreme dhe mos bëni për vete trupore idhujsh! Unë jam Zoti, Hyji juaj!

⁵ Kur t’i kushtoni Zotit fli pajtimi, bëni ashtu që t’i jeni të pëlqyeshëm. ⁶ Le të hahen atë ditë që të jenë kushtuar e të nesërmen; kurse, çkado që të teprojë për të pasnesërmen, le të digjet në zjarr. ⁷ Nëse do të hahet gjë prej saj të tretën ditë, do të ishte çnderim i gjësë së shenjtë dhe flia nuk do të pranohej. ⁸ Kush do ta hante, do ta mbarte mbi vete peshën e fajit që e përdhosi gjënë e shenjtë të Zotit: dhe i tilli do të zhduket prej popullit të vet.

⁹ Kur të korrësh prodhimet e tokës sate, mos e korr deri në skajin e arës sate dhe mos i mblidh kallinjtë që kanë rënë. ¹⁰ Kështu as në vreshtin tënd mos i mblidh vilet dhe kokrrat e rëna, por lëri t’i mbledhin skamnorët dhe udhëtarët. Unë jam Zoti, Hyji juaj.

¹¹ Mos vidhni! Mos rreni! Askush mos ta gënjejë të afërmin e vet!

¹² Mos u përbe rrejshëm me emrin tim e kështu ta përdhosësh emrin e Hyjit tënd. Unë jam Zoti.

¹³ Mos iu shpif të afërmit tënd dhe mos e rrëmbe.

Fitimin e mëditësit mos e mbaj ti deri në mëngjes.

¹⁴ Mos e shaj të shurdhin e mos i qit para pengesës të verbërit, por druaje Hyjin tënd. Unë jam Zoti.

¹⁵ Mos bëni padrejtësi në gjyqe. Mos i mbaj krahun të varfërit as mos e përkrah të fortin: gjykoje me drejtësi të afërmin tënd. ¹⁶ Mos shpërpall shpifje në popullin tënd dhe mos bashkëpuno në gjakderdhjen e të afërmit tënd. Unë jam Zoti.

¹⁷ Mos e urre në zemrën tënde vëllanë tënd. E ke detyrë ta qortosh bashkëvendasin, të mos kesh pjesë në mëkatin e tij. ¹⁸ Mos u hakmerr as mos ushqe hidhërim ndaj bijve të popullit tënd. Duaje të afërmin tënd porsi vetveten. Unë jam Zoti.

¹⁹ Ruani ligjet e mia!

Mos lejo të mbarësohen kafshët e tua me kafshë të llojit tjetër. Arën tënde mos e mbill me farëra të ndryshme. Mos e vesh petkun që është i përbërë prej dy lloj pëlhurash.

²⁰ Kush të bjerë me gruan që është skllave, por e fejuar për tjetërkë, porse ajo nuk është e shpërblyer me çmim dhe nuk i është dhënë liria, le të ndëshkohen të dy, por të mos vriten, sepse ajo nuk ka qenë e lirë. ²¹ Por, ai le ta sjellë në hyrje të Tendës së takimit një dash për fli shpërblimi në nder të Zotit: ²² kur prifti ta kryejë mbi të ritin e zgjidhjes me anë të dashit të shpërblimit në praninë e Zotit për mëkatin e bërë, atëherë asaj do t’i falet mëkati.

²³ Kur të hyni në Tokën e premtuar e të mbillni pemë frutore të ndryshme, mbani frutat e tyre si të parrethprera: për tri vjet le të jenë për ju të parrethprera e të papastra: mos i hani! ²⁴ Të katërtin vit të gjitha frutat e tyre le t’i kushtohen Zotit në një festë në lavdi të tij. ²⁵ Vetëm të pestin vit filloni t’i hani frutat e tyre dhe vilni për vete prodhimet e tyre. Unë jam Zoti, Hyji juaj.

²⁶ Mos hani asgjë me gjak.

Mos ushtroni as shorti as magji.

²⁷ Mos i qethni rrumbullak anët e flokëve tuaj e mos e shkurtoni mjekrrën. ²⁸ Mos bëni prerje në trup për shkak të ndonjë të vdekuri dhe mos shkruani asfarë figurash në lëkurën tuaj. Unë jam Zoti.

²⁹ Mos e çndero e mos e jep në lavirësi vajzën tënde që të mos fëlliqet toka e të mos mbushet me kobësi.

³⁰ Mbani të shtunat e mia e kini nderim për Shenjtëroren time. Unë jam Zoti.

³¹ Mos u ktheni kah shortarët e dijetarët që të mos bëheni të papastër me anën e tyre. Unë jam Zoti, Hyji juaj.

³² Ngrehu në këmbë para flokthinjurit e nderoje njeriun e vjetër, druaje Hyjin tënd. Unë jam Zoti.

³³ Nëse jeton me ty i huaji në tokën tuaj, mos e shtypni; ³⁴ por le të jetë ndër ju si vendas dhe duaje si vetveten: edhe ju keni qenë të huaj në dheun e Egjiptit. Unë jam Zoti, Hyji juaj.

³⁵ Mos bëni padrejtësi në gjyqe, në masa të gjatësisë, në peshore e në vëllim. ³⁶ Masat kini të sakta: peshore të sigurta, efin e drejtë dhe hin-in. Unë jam Zoti, Hyji juaj, që ju kam nxjerrë nga dheu i Egjiptit.

³⁷ Mbani të gjitha urdhërimet e mia e të gjitha vendimet e mia dhe kryeni ato. Unë jam Zoti”.

Kapitujt