Kapitujt

Levitiku: 9. Hyrja e priftërinjve në shërbim

¹ Të tetën ditë Moisiu i thirri Aronin e bijtë e tij dhe pleqtë e Izraelit e i tha Aronit:

² “Merre një viç fli për mëkat dhe një dash për fli të shkrumbimit: të dy të patëmetë dhe silli para Zotit. ³ Izraelitëve thuaju kështu: ‘Merrni një cjap fli për mëkat, një viç e një dash të një viti, të dy të patëmetë, për fli të shkrumbimit; ⁴ një mëzat e një dash për fli të pajtimit, dhe flijoni para Zotit. Merrni edhe flinë kushtimore bimore të njomur me vaj: sepse Zoti do t’ju dëftohet sot’”.

⁵ Sollën, prandaj, ata gjithë çka u kishte dhënë urdhër Moisiu dhe i prunë para derës së Tendës së takimit, ku, pasi u afrua mbarë bashkësia dhe qëndronte para Zotit, ⁶ Moisiu tha: “Ja urdhri që e ka dhënë Zoti: plotësojeni që t’ju dërftohet lavdia e tij”! ⁷ I tha edhe Aronit. “Afrohu te lteri e kushtoje flinë tënde të mëkatimit dhe flinë e shkrumbimit e kryeje ritin e zgjidhjes për ty e për popull. Atëherë kushtoje dhuratën e popullit dhe kryeje për të ritin e zgjidhjes, si urdhëroi Zoti”.

⁸ Aroni u afrua menjëherë te lteri dhe e theri viçin për flinë e vet të mëkatimit. ⁹ Bijtë e tij i sollën gjakun e viçit, në të cilin ai ngjeu gishtin, i preku brirët e lterit dhe tepricën e tij e derdhi në fundësorin e tij. ¹⁰ Dhjamin, veshkat dhe rizën e mëlçisë së flisë për mëkat e dogji në erë të këndshme përmbi lter ashtu si i kishte urdhëruar Zoti Moisiut. ¹¹ Ndërsa mishin dhe lëkurën e saj e dogji jashtë zemërimiës në zjarr.

¹² E theri edhe flinë e shkrumbimit. Bijtë e tij i sollën gjakun e saj, të cilin ai e derdhi rreth e rreth lterit. ¹³ Pasi flinë e prenë në pjesë, ia sollën bashkë me kokë: të gjitha së bashku i dogji në zjarr përmbi lter. ¹⁴ Pastaj i lau me ujë zorrët e këmbët dhe i dogji si erë të mirë në lter përmbi flinë e shkrumbimit.

¹⁵ E afroi edhe flinë e popullit, e mori cjapin e flisë për mëkat të popullit, e preu dhe e kushtoi si flinë e parë, fli për mëkat. ¹⁶ Solli pastaj flinë e shkrumbimit e veproi me të sipas ritit. ¹⁷ Solli pastaj flinë kushtimore bimore, e mbushi me të grushtin dhe e dogji në erë të këndshme mbi lter përveç flisë shkrumbore mëngjesore.

¹⁸ Atëherë theri edhe mëzatin e dashin, flitë e pajtimit të popullit. Të bijtë i sollën gjakun, të cilin e ndikoi gjithreth përmbi lter. ¹⁹ Dhjamin e mëzatit, bishtin e dashit, veshkat me dhjamin e tyre dhe rizën e mëlçisë ²⁰ i vunë përmbi gjoksa dhe i dogji erë të mirë përmbi lter. ²¹ Kurse gjoksat e tyre dhe shpatullat e djathta Aroni i lartësoi me ritin e lartësimit para Zotit, si kishte urdhëruar Moisiu.

²² Atëherë Aroni i lartësoi duart mbi popull dhe e bekoi. Kështu zbriti pasi e kishte kryer së flijuari flinë e mëkatimit, flinë e shkrumbimit e flinë e pajtimit. ²³ Atëherë Moisiu e Aroni hynë në Tendën e takimit. Kur dolën e bekuan popullin. Mbarë popullit iu dëftua lavdia e Zotit. ²⁴ Dhe, ja, prej pranisë së Zotit doli një zjarr dhe e përpiu flinë e shkrumbimit dhe dhjamin që ishin përmbi lter. Kur e pa këtë gjë turma, brohoriti prej gëzimit e ra me fytyrë për dhe në adhurim.

Kapitujt