Kapitujt

Ligji i Përtërirë: 26. Frytet e para

¹ “Kur të hysh në tokën që Zoti, Hyji yt, do të ta japë për pronë, pasi ta kesh pushtuar e të kesh ngulur në të, ² merri frytet e para të të gjitha prodhimeve të fushës që të kesh mbledhur prej tokës sate, që Zoti, Hyji yt, do të ta japë, e qiti në kaçile dhe shko në vendin që Zoti, Hyji yt, ta ketë zgjedhur për të banuar emri i tij aty, ³ afroju priftit që do të jetë asohere në shërbim dhe thuaji:

‘Sot po bëj dëshmi para Zotit, Hyjit tënd, se kam hyrë në tokën, për të cilën u përbetua etërve tanë se do të na e japë.’

⁴ Atëherë prifti do ta marrë kaçilen prej dorës sate e do ta vërë para lterit të Zotit, Hyjit tënd.

⁵ Ti atëherë fol në praninë e Zotit, Hyjit tënd, e thuaj: ‘Im atë ishtë një sirian endacak. Ai zbriti në Egjipt me pak njerëz dhe atje jetoi në dhe të huaj. U shtua e u bë popull i madh, i fortë e një shumicë pa masë. ⁶ Por egjiptianët na morën me të keq, na përndoqën dhe na bënë skllevër të mjerë.

⁷ Atëherë ne lëshuam britmë drejtë Zotit, Hyjit të etërve tanë. Ai na dëgjoi; e pa përvujtërimin tonë, mundin e të vështirat tona ⁸ dhe na nxori Zoti prej Egjiptit me dorën e vet të fuqishme e krahun e tendur, me tmerr të madh e me shenja e me mrekulli, ⁹ na pruri në këtë vend e na e dha trashëgim këtë tokë që rrjedh qumësht e mjaltë.

¹⁰ Dhe, ja, tani, o Zot, i solla frytet e para të tokës që ti ma dhe.’

Atëherë vëri para Zotit, Hyjit tënd, dhe adhuroje Zotin, Hyjin tënd.

¹¹ Gostituni me të gjitha të mirat që Zoti, Hyji yt, t’i ka dhënë ty e familjes sate, ti, leviti dhe i ardhuri që është me ty.”

Të dhjetat trivjetore

¹² “Kur të kesh kryer së ndari të gjitha të dhjetat e mbarë prodhimeve të tua, ‑ vitin e tretë ‑ vitin e të dhjetave ‑ dhe brenda dyerve të tua t’u kesh dhënë të hanë e të ngopen leviti, ardhacaku, bonjaku e vejusha, atëherë, para Zotit, Hyjit tënd, ¹³ thuaj:

‘Çka ishte e shugurur e kam hequr prej shtëpisë sime. I kam dhënë levitit, ardhacakut, jetimit e vejushës po ashtu si më ke urdhëruar ti. Nuk i shkela urdhrat e tu dhe nuk i kam harruar urdhërimet e tua. ¹⁴ Nuk kam ngrënë asgjë kur isha në e zi, nuk kam ndarë asgjë prej tyre kur isha i papastër, dhe nuk dhashë asgjë prej tyre për të vdekur. E kam dëgjuar zërin e Zotit, Hyjit tim, dhe bëra gjithçka si më ke urdhëruar ti.

¹⁵ Priri sytë e tu drejt banesës sate të shenjtë, prej qiellit, dhe bekoje popullin tënd, Izraelin, dhe tokën që na e dhe siç iu përbetove etërve tanë, tokën që rrjedh qumsht e mjaltë.”

Kapitujt