Kapitujt

Ligji i Përtërirë: 11. Përvoja e izraelitëve

¹ “Duaje, pra, Zotin, Hyjin tënd, e zbato gjithmonë çka të urdhëron të zbatosh: urdhërimet, ligjet e rregulloret e tija!

² Pranojeni sot ‑ nuk po ju drejtohem fëmijëve tuaj, sepse ata nuk i njohën as nuk i panë mësimet e Zotit, Hyjit tuaj ‑ madhërinë e tij, dorën e fortë dhe krahun e nderë:

³ ‑ shenjat e veprat e tija që ia bëri në mes të Egjiptit faraonit mbret e mbarë vendit të tij;

⁴ ‑ çfarë i bëri ushtrisë egjiptiane, kuajve e karrocave, sesi i mbuluan ujërat e Detit të Kuq, kur po ju përndiqnin ju: ‑ Zoti i shpartalloi deri në ditën e sotme;

⁵ ‑ çfarë ju bëri juve në shkretëtirë derisa arritët në këtë vend;

⁶ ‑ çfarë bëri me Datanin e me Abironin, bijtë e Eliabit, prej fisit të Rubenit, si e hapi toka grykën e vet dhe i përpiu me familje, me tenda e me mbarë pasurinë e tyre që kishin në mes të Izraelit. ⁷ Sytë tuaj i panë të gjitha këto emnesa që bëri Zoti!”

Premtime e porosi

⁸ “Zbatoni, pra të gjitha urdhërimet që po jua jap sot, që të jeni të fortë e të mund të hyni e ta pushtoni tokën, në të cilën po hyni për ta bërë pronë, ⁹ kështu që të jetoni një kohë të gjatë në tokën që Zoti me përbetim ua pati premtuar etërve tuaj dhe pasardhësve të tyre, në tokën që rrjedh qumësht e mjaltë.

¹⁰ E toka, në të cilën do të hysh për ta bërë pronë, nuk është porsi toka e Egjiptit, prej së cilës dole, ku, kur hidhje farën, të duhej ta lagie duke i prirë ujit me këmbë, siç laget kopshti; ¹¹ është tokë malore e luginore që e pret shiun nga qielli. ¹² Për të Zoti, Hyji yt, gjithmonë kujdeset. Sytë e tij janë mbi të që nga fillimi i vitit deri në mbarimin e tij.

¹³ E nëse, do t’i dëgjoni vërtet, urdhërimet e mia, që unë po jua jap sot, e do ta doni Zotin, Hyjin tuaj, e do t’i shërbeni me gjithë zemrën tuaj e me gjithë shpirtin tuaj, ¹⁴ do t’i jap tokës suaj shira në kohën e duhur: në vjeshtë e në pranverë, e do të mund ta mbledhësh drithin tënd, verën tënde e vajin tënd; ¹⁵

në fusha do të bëj të rritet bari për bagëtitë e tua. Edhe ti do të hash e do të ngihesh.

¹⁶ Ruhuni të mos ju tradhtojë zemra e të largoheni prej Zotit dhe t’u shërbeni e t’i adhuroni zotat e huaj, ¹⁷ që të mos e hidhëroni Zotin kundër jush e ta mbyllë qiellin e të mos bjerë shi, që toka të mos e japë prodhimin e vet, se atëherë me të shpejtë do të zhdukeni prej tokës së mirë që do t’jua japë Zoti.”

Përfundim

¹⁸ “Thadroni, pra, këto fjalë të mia në zemrën e në shpirtin tuaj; si shenjë lidhni në dorën tuaj dhe vendosni porsi varëse ndërmjet syve tuaj! ¹⁹ Mësojuani fëmijëve tuaj! Fol për to kur të jesh në shtëpinë tënde e kur të jesh në udhë; kur të biesh e kur të çohesh! ²⁰ Shkruaj në ballëzinat e shtëpisë sate e në dyert e tua, ²¹ që ditët ë tua e ditët e bijve të tu në tokën që Zoti premtoi me përbetim t’ua japë etërve të tu ‑ të jenë të shumtë si ditët e qiellit përmbi tokë.

²² Nëse do t’i mbani vërtet të gjitha këto urdhërime, që po jua jap unë dhe do t’i zbatoni e do ta doni Zotin, Hyjin tuaj, nëse do të ecni të gjitha udhëve të tija e do të qëndroni të lidhur ngushtë me të, ²³ Zoti do t’i dëbojë para jush të gjitha këto kombe e ju do t’i pushtoni edhe pse janë më të mëdha e më të forta se ju. ²⁴ Çdo vend që të shkelë këmba juaj, do të jetë juaji. Prej shkretëtirës e Libanit, prej lumit të madh Eufrat e deri në Detin Perëndimor do të shtrihet toka juaj. ²⁵ Askush s’do të mund të qëndrojë përballë jush. Frikën e tmerrin tuaj do ta shtrijë Zoti, Hyji juaj, mbi çdo vend që do ta shkelni, siç ju ka thënë.

²⁶ Ja, po ju vë para sot bekimin edhe mallkimin: ²⁷ bekimin, nëse do t’i dëgjoni urdhërimet e Zotit, Hyjit tuaj, që unë po ju urdhëroj sot; ²⁸ mallkimin, nëse nuk do t’i dëgjoni urdhërimet e Zotit, Hyjit tuaj, por do t’i shmangeni udhës që po jua dëftoj tani unë e do të ecni pas hyjnive të huaja, që nuk i njihni.

²⁹ Kur të të ketë futur Zoti, Hyji yt, në tokën që je nisur për ta pushtuar, vëre bekimin mbi malin Garizim e mallkimin mbi malin Hebal ‑ ³⁰ që janë përtej Jordanit, përpas udhës në drejtim të perëndimit, në tokën e kananenjve që banojnë në Arabë, përballë Galgalës që është pranë Qarrave të Moresë.

³¹ Ja, pra, po kaloni Jordanin për ta marrë për pronë tokën që Zoti, Hyji juaj, do t’jua japë: merreni dhe banoni në të. ³² Kujdesuni, pra, që t’i vini në zbatim të gjitha urdhërimet e rregullat që po jua vë sot përpara.”

Kapitujt