Kapitujt

Ligji i Përtërirë: 6. Thirrje për besnikëri

¹ Këto janë urdhërimet, ligjet e rregulloret që Zoti, Hyji juaj, më urdhëroi t’jua mësoj që t’i zbatoni në vendin që po kaloni për ta bërë pronë, ² me qëllim që ta druash Zotin, Hyjin tënd, e t’i zbatosh të gjitha urdhërimet e ligjet e tija që po t’i paraqes ty, bijve e nipave të tu gjatë gjithë jetës sate, që të jesh jetëgjatë. ³ Dëgjo, o Izrael, mbaj e zbatoji që të jesh mirë e që gjithnjë të shtohesh në vendin që rrjedh qumësht e mjaltë siç ta ka premtuar Zoti, Hyji i etërve të tu. ⁴ Dëgjo, Izrael! Zoti, Hyji ynë, është një Zot i vetëm! ⁵ Duaje Zotin, Hyjin tënd, me gjithë zemrën tënde, me gjithë shpirtin tënd e me gjithë fuqinë tënde! ⁶ Këto urdhërime që po t’i jap sot unë, mbaji gjithmonë në zemrën tënde! ⁷ Ua përsërit fëmijëve të tu! Fol për to kur të jesh në shtëpi e kur të jesh duke udhëtuar; kur të biesh në shtrojë e kur të ngrihësh nga shtroja. ⁸ Lidhi në dorën tënde si shenjë dhe le të jenë si vjerrës ndërmjet syve të tu! ⁹ Shkruaji mbi ballëzinat e dyerve të tua dhe në dyer të tua!

¹⁰ E kur Zoti, Hyji yt, të të shtjerë në tokën për të cilën iu përbetua etërve të tu ‑ Abrahamit, Izakut e Jakobit se do të ta japë ty, ‑ në qytete të mëdha e të mira që t’i nuk i ndërtove, ¹¹ në shtëpi plot me një mijë të mira që t’i nuk i solle; cisternat që t’i nuk i çele, vreshtat e ullishtat që ti nuk i mbolle, kur të hash e të ngopesh, ¹² vërja mirë mendjen të mos e harrosh Zotin që të nxori nga toka e Egjiptit, nga shtëpia e skllavërisë: ¹³ druaje Zotin, Hyjin tënd, vetëm atij shërbeji dhe përbetohu në emër të tij!”

Thirrje për besnikëri

¹⁴ “Mos shkoni pas hyjnive të huaja, pas hyjnive të popujve që janë përreth jush, ¹⁵ sepse Zoti, Hyji yt, që është në mesin tënd, është Hyj ziliqar; që të mos ndizet zemërimi i Zotit, Hyjit tënd, kundër teje e të të shfarosë prej faqes së dheut. ¹⁶ Mos e vini në provë Zotin, Hyjin tuaj, siç e vutë në provë në Masë.

¹⁷ Ruani urdhërimet e Zotit, Hyjit tuaj, rregulloret e ligjet që t’i ka urdhëruar, ¹⁸ dhe bëj çka është e drejtë dhe e mirë para syve të Zotit që të jesh mirë e ta marrësh për pronë tokën e mirë, për të cilën Zoti iu përbetua etërve të tu ¹⁹ që t’i debojë prej saj të gjithë armiqtë e tu para teje, siç ka premtuar Zoti.

²⁰ E kur nesër yt bir të të pyesë e të të thotë: ‘Ç’kuptim kanë këto rregullore, urdhërime e ligje që jua dha Zoti, Hyji ynë?’, ²¹ ti përgjigjju: ‘Ishim skllevër të faraonit në Egjipt, dhe Zoti na nxori me dorë të fuqishme prej Egjiptit ²² dhe bëri shenja të mëdha e mrekulli ndër sy tanë në Egjipt kundër faraonit dhe mbarë shtëpisë së tij. ²³ Ne na nxori prej andej, që të na shpjerë e të na e japë tokën, të cilën me përbetim ua premtoi etërve tanë. ²⁴ Asohere Zoti na urdhëroi t’i vëmë në zbatim të gjitha këto urdhërime e të druajmë Zotin, Hyjin tonë, që të jemi të lumtur gjatë gjithë jetës sonë siç jemi edhe sot. ²⁵ Ne do të jemi të drejtë nëse do t’i zbatojmë të gjitha këto urdhërime në praninë e Zotit, Hyjit tonë, ashtu siç na ka urdhëruar.”

Kapitujt