Kapitujt

Zakaria: 10. Besnikëri ndaj Zotit

¹ Kërkojeni prej Zotit shiun

në kohën e shirave të vona.

Zoti është ai që i bën vetëtimat,

ai u jep shi me rrëshekë,

secilit bar në arë të vet.

² Terafimët kallëzojnë punë të kota,

kurse dijetarët shohin rrena,

gënjeshtra tregojnë ëndrrat,

japin ngushëllim të rremë,

prandaj enden si bagëtia,

heqin keq pse s’kanë bari.

Çlirimi dhe kthimi i Izraelit

³ Kundër barinjsh jam zemëruar,

rëndë cjeptë do t’i ndëshkoj!

Patjetër Zoti i Ushtrive

do t’i vijë në pasi grigjës së vet,

shtëpisë së Judës.

Do t’i bëjë të jenë

porsi kali i nderit të tij në luftë!

⁴ Prej tij do të dalë Guri i këndit,

prej tij Shtyllaku,

prej tij i luftës harku,

prej tij të gjithë prijësit!

Së bashku ⁵ do të jenë trima trimash

që në luftë shklasin si në baltë të rrugës.

Do të luftojnë pse Zoti është me ta,

të marruar do të mbesin ata që në kuaj hipin!

⁶ Të fortë do ta bëj shtëpinë e Judës,

do ta shpëtoj shtëpinë e Jozefit,

Do t’i kthej sepse më dhembsen

e do të jenë sikur kurrë të mos i kisha përbuzur:

unë Zoti, Hyji i tyre, do t’i dëgjoj!

⁷ Efraimët do të jenë trima,

si nga vera do t’u gëzohet zemra,

do të shohin të bijtë e do të gëzohen,

zemra e tyre do të gazmojë në Zotin.

⁸ Do të fërshëllej e do të bashkohen,

sepse vetë i kam shpërblyer,

do të jenë shumë si më parë ç’ishin!

⁹ Do t’i mbjell nëpër popuj,

por dhe larg mua do të më kujtojnë:

fëmijë do të rritin e do të kthehen.

¹⁰ Do t’i kthej prej dheut të Egjiptit,

do t’i mbledh prej Asyrisë,

do t’i kthej në dhe të Galaadit

e në Liban

dhe për ta s’do të ketë mjaft vend!

¹¹ Do të kalojnë Detin e Ngushtë,

sepse do t’i godasë valët e detit,

do të teren thellësitë e lumit.

Do të përulet krenaria e Asyrisë,

Egjiptit do t’i merret skeptri.

¹² Do t’i bëj të fortë në Zotin

do të lëvdohen në emër të tij

‑ është fjala e Zotit.

Kapitujt