Kapitujt

Nehemia: 3. Ndërtuesit vullnetarë

¹ Kryeprifti Eliasib dhe vëllezërit e tij priftërinj ia hynë të ndërtojnë derën e Deleve; i ndërtuan krahët dhe i vunë shtatkat e vazhduan ndërtimin deri te pirgu Meah e deri te pirgu Hananeel. ² Në vazhdim të tyre punuan njerëzit e Jerikut e në vazhdim të këtyre ndërtoi Zakuri, biri Amriut.

³ Derën e Peshqve e ndërtuan bijtë e Asnaasë. I forcuan praqet, i punuan krahët, i vunë shtatkat dhe shulat. Përbri tyre ndërtoi Marimuthi, i biri i Urisë së Akusit. ⁴ Përbri tij ndërtoi Mosolami, i biri i Barakisë së Mesezebelit. Përbri tij rindërtoi Sadoku, biri i Baanës. ⁵ Pranë tyre ndërtuan Tekuenajt, kurse bujarët e tyre nuk deshën ta ulin qafën për të punuar në veprën e Zotit të tyre.

⁶ Derën e Vjetër e rindërtuan Jojada, biri i Fasesë, dhe Mosolami, biri i Besodisë. Ata e punuan me dërrasa, i ndreqën krahët, shtyllakët dhe shulat. ⁷Përbri tyre rindërtuan Meltia Gabaonas, Jadon Meronati, njerëzit nga Gabaoni e Masfa, të nënshtruarit e qeveritarit të krahinës së Përtejlumit. ⁸ Përkrah tyre rindërtoi Ezieli, biri i Arajës, artar, përkrah tij rindërtoi Anania, erërapunues. Këta e forcuan Jerusalemin deri te muri i Gjerë. ⁹ Përbri tij rindërtoi Rafaja, biri i Hurit, kryetari i gjysmës së rrethit të Jerusalemit. ¹⁰ Afër tij rindërtoi Jedaja, biri i Haromafit, përballë shtëpisë së vet. Përbri këtij rindërtoi Hatusi, biri i Hasebonisë. ¹¹ Pjesën tjetër, deri te pirgu i Furrave e rindërtoi Melkia, biri i Heremit dhe Hasubi, biri i Fahatmoabit. ¹² Përbri tyre rindërtoi Selumi, biri i Alohesit, kryetari i gjysmës së rrethit të Jerusalemit dhe bijat e tija.

¹³ Derën e luginës e rindërtoi Hanuni dhe banorët e Zanoesë: ata e rindërtuan derën, i forcuan krahët e saj, shulat dhe shtatkat, dhe një mijë kute mur deri te dera e Mbeturinave. ¹⁴ Derën e Mbeturinave e rindërtoi Melkia, biri i Rekabit, kryetari i rrethit të Betkaremit. Ai e rindërtoi, i forcoi krahët, shtyllakët dhe shulat.

¹⁵ Kurse derën e Burimit e përmirësoi Selumi, biri i Holhozës, kryetari i rrethit të Masfës. Ai e rindërtoi derën, i mbuloi dhe i forcoi krahët e saj, shulat dhe shtyllakët si edhe murin e peshkores Siloe që shkon prej kopshtit të mbretit deri te shkallët që zbresin nga Qyteti i Davidit. ¹⁶ Përtej tij rindërtoi Nehemia, biri i Azbokut, kryetari i gjysmës së rrethit Betsur deri përballë Varreve të Davidit deri te pesh‑ korja mjeshtrore e deri te shtëpia e Trimave. ¹⁷ Përtej tij rindërtuan levitët: Rehumi, biri i Baniut. Përbri tij rindërtoi Hesebia, kryetari i gjysmës së rrethit të Cejlës, për krahinën e vet. ¹⁸ Përtej tij rindërtuan vëllezërit e tij: Bavaji, biri i Enadadit, kryetari i gjysmës tjetër të rrethit të Cejlës.

¹⁹ Përbri tij rindërtoi, Azeri, biri i Jezuasë, ndërsa kryetari i Masfës, pjesën tjetër përballë Përpjetëzës së Armatores në Kënd.

²⁰ Përtej tij rindërtoi Baruku, biri i Zakajit, pjesën tjetër nga Këndi e deri te dera e shtëpisë së kryepriftit Eliasib. ²¹ Përtej tij rindërtoi Merimuthi, biri i Urisë së Hakusit, pjesën e dytë nga dera e shtëpisë së Eliasibit deri te mbarimi i shtëpisë së Eliasibit. ²² Përtej tij rindërtuan priftërinjtë që jetonin në rrethina. ²³ Përtej tyre rindërtoi Beniamini e Hasubi përballë shtëpisë së vet. Përtej tyre rindërtoi Azaria, biri i Maasisë së Ananisë përbri shtëpisë së vet. ²⁴ Përtej tij rindërtoi Benuji, biri i Henadadit ‑ pjesën e dytë që fillon nga shtëpia e Azarisë deri te këndi, në bërryl. ²⁵ Faleli, biri i Oziut, përballë këndit të pirgut që ngritet mbi Shtëpinë e Epërme të mbretit, e që gjendet në oborr të burgut. ²⁶ Pas tij Fadaja, biri i Farosit, rindërtoi deri te dera e Ujërave, në drejtim të lindjes e deri te pirgu i Lartësuar. ²⁷ Përtej tij pjesën tjetër nga kulla e madhe e Lartë deri te muri i Tempullit e rindërtuan tekuenët.

²⁸ Kurse në pjesën e lartë nga dera e Kuajve, e ripërtëritën priftërinjtë, secili përballë shtëpisë së vet. ²⁹ Përtej tyre rindërtoi Sadoku, biri i Emerit, përballë shtëpisë së vet. Përtej tij rindërtoi Semaja, biri i Sekenisë, rojtari i Derës Lindore. ³⁰ Përtej tij rindërtoi Hanania, biri i Selemisë, dhe Hanuni i gjashti djalë i Selefit, i cili e ndreqi pjesën tjetër. Përtej tij rindërtoi Mosolami, biri i Barakisë, përballë banesës së vet. ³¹ Përtej tij rindërtoi Melkia, arpunuesi, deri te banesa e të dhuruarve dhe e tregtarëve përballë derës së Mbikëqyrjes deri në sallën e sipërme të këndit. ³² Ndërmjet të dhomës së lartë të këndit e deri te dera e Deleve ndërtuan arpunuesit dhe tregtarët.

Kundërshtimet e armiqve të judenjve

³³ Kur Sanabalati mori vesh se ne po i ndërtonim muret, u hidhërua e u zemërua shumë, i vuri në lojë judenjtë ³⁴ dhe tha para vëllezërve të vet dhe bujarëve të Samarisë: “Çfarë duan të bëjnë këta judenj marroqa? Po a thua do t’ ia dalin? Vallë, a pse bëjnë fli, do ta kryejnë për një ditë? Vallë, a do të mund t’i ringjallin gurët nga grumbulli i pluhurit, të djegur nga zjarri?” ³⁵ Po ashtu edhe Tobi Amoniti, që ishte përkrah tij, tha: “Lëri le të ndërtojnë! Këto mure të tyre të gurit mund t’i rrënojë edhe dhelpra më një të kaluar të saj!”

³⁶ Dëgjoji, o Hyji ynë, se sa na përbuzin! Ktheje përbuzjen mbi kokën e tyre dhe bëj ta sprovojnë poshtërimin në skllavëri! ³⁷ Mos ua mbulo fajësinë dhe mëkati i tyre mos u shleftë para syve të tu, sepse të fyen ty para syve të ndërtuesve!

³⁸ Kështu ne vijonim ndërtimin e mureve dhe i kryem gjithkund deri në gjysmën e lartësisë. Populli e kishte marrë me gjithë zemër punën.

Kapitujt