Kapitujt

2 i Mbretërve: 14. Mbretërimi i Amasiut në Judë /796 781/

¹ Në vitin e dytë të mbretërimit të Joasit, birit të Joakazit, mbretit të Izraelit, mbret i Judës u bë Amasiu, biri i Joasit, mbretit të Judës. ² Ishte njëzetepesëvjeçar kur filloi të mbretërojë dhe në Jerusalem mbretëroi njëzet e nëntë vjet. Emri i nënës së tij ishte Joadenë. Ishte nga Jerusalemi. ³ Bëri çka është e drejtë para syve të Zotit, megjithëse jo krejtësisht si Davidi, baba i tij. Në gjithçka i përngjau Joasit, babait të vet, ⁴ përveç nuk i zhduku lartësirat. Edhe më tutje populli kushtonte fli dhe digjte kem në lartësira.

⁵ Kur e forcoi mbretërinë në duart e veta, i vrau shërbëtorët e vet, që kishin vrarë mbretin, babain e tij. ⁶ Porse nuk i vrau të bijtë e atyre që ia kishin vrarë babain, sipas asaj që shkruan në Librin e Ligjit të Moisiut, siç urdhëron Zoti, kur thotë: “Të mos vdesin prindërit për faj të fëmijëve, as fëmijët për faj të prindërve: secili le të vdesë për shkak të mëkatit të vet”.

⁷ Ky e mundi Edomin në Luginën e Kripërave: i vrau dhjetë mijë vetë, e pushtoi Qetën me luftë dhe i vuri emrin Jecetel deri në ditën e sotme.

⁸ Amasiu pastaj i dërgoi kasnecë Joasit, birit të Joakazit, birit të Jehuit, mbretit të Izraelit. Tha: “Eja të shikohemi në ballë të luftës”! ⁹ Joasi, mbreti i Izraelit, iu përgjigj Amasiut, mbretit të Judës, kështu: “Ferrca e gomarit në Liban i çoi shkues cedrit të Libanit e i tha: ‘Ma jep vajzën tënde për nuse të djalit tim.’ Por kaluan egërsirat e Libanit dhe e shqelmuan ferrcën e gomarit! ¹⁰ Bëre luftë dhe e munde Edomin dhe të është rritur mendja! Kënaqu me lavdinë që fitove e rri në shtëpinë tënde! Pse shkakton të keqen që të sharrosh ti dhe mbarë Juda me ty”?

¹¹ Por Amasiu nuk i vuri veshin.

Atëherë Joasi, mbreti i Izraelit, e sulmoi. U ndeshën ai e Amasiu, mbreti i Judës, në Betsames, qytet i Judës. ¹² Juda u thye para Izraelit dhe ikën secili në çadrat e veta. ¹³ Amasiun, mbretin e Judës, birin e Joasit të Okozisë, Joasi, mbreti i Izraelit, e zuri rob në Betsames dhe e çoi në Jerusalem. Pastaj e rrënoi murin e Jerusalemit prej Derës së Efraimit deri në Derën e Këndit: katërqind kute gjatë. ¹⁴ Mori të gjithë arin, argjendin dhe të gjitha enët që u gjetën në Shtëpinë e Zotit dhe në thesaret mbretërorë si dhe disa pengje dhe u kthye në Samari.

¹⁵ Veprat e tjera të Joasit, çka ndërmori, si dhe trimëritë e tija që i bëri në luftë kundër Amasiut, mbretit të Judës, vallë a nuk janë këto të shkruara në Librin e Analeve të mbretërve të Izraelit? ¹⁶ Joasi pushoi me etërit e vet dhe qe varrosur në Samari me mbretërit e Izraelit. Jeroboami, biri i tij, u bë mbret në vend të tij.

¹⁷ Amasiu, biri i Joasit, mbret i Judës, pasi vdiq Joasi, biri i Joakazit, mbreti i Izraelit, jetoi edhe pesëmbëdhjetë vjet.

¹⁸ Veprat e tjera të Amasiut, vallë a nuk janë këto të shkruara në Librin e Analeve të mbretërve të Judës? ¹⁹ Kur u bë një përbetim kundër tij në Jerusalem, ky iku në Lakis. Por dërguan pas tij në Lakis dhe atje e vranë. ²⁰ Prej andej trupin ia prunë në kuaj dhe e varrosën në Jerusalem me etërit e tij në Qytetin e Davidit. ²¹ Atëherë mbarë populli i Judës e mori Azarinë, që ishte gjashtëmbëdhjetëvjeçar, dhe e bënë mbret në vend të babait të tij, Amasiut.

²² Ai e rindërtoi Elatin pasi ia ktheu Judës, pasi fjeti mbreti Amasi me etërit e vet.

Mbretëria e Jeroboamit II në Izrael /783‑743/

²³ Në të pesëmbëdhjetin vit të mbretërimit të Amasiut, birit të Joasit, mbretit të Judës, në Samari u bë mbret Jeroboami, biri i Joasit, mbretit të Izraelit. Mbretëroi dyzet e një vjet. ²⁴ Bëri ç’është e keqe para syve të Zotit. Nuk u shmang nga asnjë mëkat që bëri Jeroboami, biri i Nabatit, që e bëri Izraelin të mëkatojë. ²⁵ Ai i rivendosi kufijtë e Izraelit prej Hyrjes në Emat deri në Detin Arabë, sipas fjalës së Zotit, Hyjit të Izraelit, të cilën e tha me gojë të shërbëtorit të vet Jonës profet, birit të Amatit, që ishte prej Getoferit. ²⁶ Zoti, në të vërtetë, e kishte parë mjerimin e tmerrshëm të Izraelit, sepse kishin mbaruar me të madh e të vogël e s’kishte mbetur kush t’i gjendej në ndihmë Izraelit. ²⁷ Porse Zoti nuk kishte vendosur ta zhdukë emrin e Izraelit për nën qiell, por e shpëtoi atë me dorën e Jeroboamit, birit të Joasit.

²⁸ Veprat e tjera të Jeroboamit si dhe gjithçka ndërmori, trimëritë e tija që i bëri në luftë, si dhe si ia ktheu Izraelit Damaskun dhe Ematin ‑ që më parë i takonin Judës ‑, vallë a nuk janë këto të shkruara në Librin e Analeve të mbretërve të Izraelit? ²⁹ Jeroboami pushoi me etërit e vet, mbretërit e Izraelit. Në vend të tij u bë mbret Zakaria, i biri i tij.

Kapitujt