Kapitujt

2 i Mbretërve: 13. Mbretërimi i Joakazit në Izrael (814 798)

¹ Në vitin njëzet e tre të mbretërimit të Joasit, mbretit të Judës, mbi Izrael në Samari u bë mbret Joakazi, biri i Jehuit. Mbretëroi shtatëmbëdhjetë vjet. ² Bëri çka është e keqe në sytë e Zotit dhe ndoqi mëkatin e Jeroboamit, birit të Nabatit, i cili e bëri Izraelin të mëkatojë dhe nuk u shkoq prej atij mëkati.

³ Zemërimi i Zotit u ndez flakë kundër Izraelit dhe i lëshoi në dorë të Hazaelit, mbretit të Sirisë, e në dorë të Benadadit, birit të Hazaelit, gjatë tërë asaj kohe. ⁴ Por Joakazi ia doli ta zbusë fytyrën e Zotit dhe Zoti e dëgjoi, sepse e pa gjendjen e vështirë të Izraelit të ndrydhur prej mbretit të Sirisë. ⁵ Zoti i dha Izraelit një shpëtimtar; qe çliruar nga thonjtë e sirianëve dhe izraelitët mundën të banonin në tendat e veta si më parë. ⁶ Megjithatë, nuk u shkoqën nga mëkatet e shtëpisë së Jeroboamit, që e bëri Izraelin të mëkatojë: jetuan në ato mëkate. Kështu mbeti edhe baniri në Samari. ⁷ Zoti Joakazit nuk i la prej popullit të armatosur tjetër përveç pesëdhjetë kalorës, dhjetë karroca lufte dhe dhjetë mijë këmbësorë, sepse mbreti i Sirisë ia kishte vrarë të tjerët e i kishte bërë si pluhurin që shqelmohet në lëmë në shirje.

⁸ Veprat e tjera të Joakazit dhe gjithçka ndërmori si dhe trimëritë e tija, vallë a nuk janë këto të gjitha të shkruara në Librin e Analeve të mbretërve të Izraelit? ⁹ Joakazi pushoi me etërit e vet dhe e varrosën në Samari. Në vend të tij u bë mbret i biri, Joasi.

Mbretëria e Joasit në Izrael /798‑783/

¹⁰ Në vitin e tridhjeteshtatë të mbretërimit të Joasit, mbretit të Judës, mbret në Samari mbi Izraelin u bë Joasi, biri i Joakazit. Mbretëroi gjashtëmbëdhjetë vjet. ¹¹ Bëri çka është e keqe në sytë e Zotit: nuk u shkoq prej mëkateve të Jeroboamit, birit të Nabatit, i cili e bëri Izraelin të mëkatojë; ai vazhdoi me to.

¹² Veprat e tjera të Joasit, dhe gjithçka ndërmori, si dhe trimëritë e tija, si luftoi kundër Amasiut, mbretit të Judës, vallë a nuk janë këto të shkruara në Librin e Analeve të mbretërve të Izraelit? ¹³ Joasi fjeti me etërit e vet e në fronin e tij hipi Jeroboami. Joasi qe varrosur në Samari me mbretërit e Izraelit.

Vdekja e Elizeut

¹⁴ Elizeu u sëmur nga një sëmundje prej së cilës edhe vdiq. Joasi, mbreti i Izraelit, zbriti tek ai dhe qante pranë tij e i thoshte: “Ati im! Ati im! Karroca e Izraelit e kalorësi i tij”! ¹⁵ Elizeu i tha: “Merre harkun dhe shigjetat”! Kur i solli tek ai harkun e shigjetat, ¹⁶ Elizeu i tha mbretit të Izraelit: “Vëre dorën tënde mbi hark”. Kur e vuri dorën mbi hark, Elizeu i vuri duart e veta përmbi duart e mbretit ¹⁷ e tha: “Hape dritaren nga lindja”! Kur e hapi, Elizeu i tha: “Gjuaj shigjetë”! Ai gjuajti. Elizeu tha: “Shigjeta ngadhënjyese për nder të Zotit! Shigjeta ngadhënjyese kundër Sirisë! Ti do ta mundësh në Afek Sirinë deri në shfarosje”! ¹⁸ Pastaj i tha: “Kapi shigjetat”! Pasi ky i kapi, i tha përsëri: “Bjeri shigjetë tokës”! Si i ra tri herë, zuri vend. ¹⁹ Njeriu i Hyjit u hidhërua kundër tij dhe i tha: “Po t’i kishe rënë pesë ose gjashtë herë, do ta kishe mundur Sirinë deri në shfarosje; tashti do të ngadhënjesh mbi të tri herë”.

²⁰ Elizeu vdiq dhe qe varrosur. Tashti, në fillim të vitit, erdhën disa cuba prej Moabit në atë vend. ²¹ Disa njerëz që po varrosnin një të vdekur, i panë cubat, e hodhën kufomën në varr të Elizeut dhe ikën. Kur i preku kufoma eshtrat e Elizeut, u ngjall i vdekuri dhe qëndroi në këmbët e veta.

Fitorja ndaj sirianëve

²² Hazaeli, mbreti i Sirisë, e ndrydhi Izraelin gjatë gjithë jetës së Joakazit. ²³ Porse Zoti pati mëshirë për ta dhe u kthye prej tyre për shkak të besëlidhjes së vet që, kishte lidhur me Abrahamin, Izakun e Jakobin. Nuk deshi t’i shfaroste as të hiqte krejtësisht dorë prej tyre deri në ditën e sotme. ²⁴ Vdiq Hazaeli, mbreti i Sirisë, e në vend të tij mbretëroi Benadadi, i biri. ²⁵ Joasi, biri i Joakazit, i mori prej dorës së Benadadit, birit të Hazaelit, qytetet që ia kishte pushtuar me luftë Joakazit, babait të tij. Tri herë rresht Joasi e mundi Benadadin dhe ia riktheu Izraelit qytetet.

Kapitujt