Kapitujt

2 i Mbretërve: 12. Mbretëria e Joasit në Judë /835 796/

¹ Joasi ishte shtatë vjeç kur u bë mbret.

² Joasi u bë mbret në të shtatin vit të mbretërimit të Jehuit. Mbretëroi në Jerusalem dyzet vjet. Nëna e tij quhej Sebi. Ishte nga Bersabeja. ³ Joasi bënte ç’është e drejtë para Zotit gjatë të gjithë jetës së vet, sepse e kishte mësuar Jojada prift. ⁴ Megjithatë lartësirat nuk i zhduku; populli vazhdonte të flijonte e të digjte kem në lartësira.

⁵ Joasi u tha priftërinjve: “Të gjitha paratë nga të ardhurat e kushtuara që do të vijnë në Tempullin e Zotit, që kushtohen si çmim i jetës, ose që kushtohen me qëllim e me vullnet të kujtdo e sillen në Tempullin e Zotit, ⁶ le t’i marrin priftërinjtë secili nga i njohuri i vet dhe me to le ta ndreqin Shtëpinë e Zotit kudo që të shohin se ka nevojë”.

⁷ Porse deri në të njëzetetretin vit të mbretërimit të Joasit, priftërinjtë nuk e kishin ndrequr Tempullin në ato pjesë që ishte dëmtuar. ⁸ Atëherë Joasi e thirri Jojadën prift dhe priftërinjtë e tjerë e u tha: “Përse nuk i ndreqni pjesët e prishura të Tempullit? Pas tashi mos merrni më para prej të njohurve tuaj, por duhet t’i jepni ju për ndreqjen e Tempullit”. ⁹ Priftërinjtë pranuan që të mos marrin më para prej popullit dhe të mos kujdesen më për përmirësime të pjesëve të prishura të Tempullit.

¹⁰ Atëherë Jojada prift mori një arkë, i bëri në kapak një vrimë, e vendosi në anë të lterit, në të djathtë të atij që hyn në Tempullin e Zotit. Priftërinjtë, rojtësit e pragut, paratë që silleshin në Tempull i qitnin në të. ¹¹ Kur dukej se ishin mbledhur shumë të holla në thesar, vinte shkruesi i mbretit me kryepriftin, i mblidhnin dhe i numëronin paratë që gjendeshin në Shtëpinë e Zotit. ¹² Paratë, pasi i kishin numëruar e peshuar, ua jepnin kryepunëtorëve që i drejtonin punimet në përmirësimin e Shtëpisë së Zotit. Këta i shpenzonin në pagesën e gdhendësve të drurit e të ndërtuesve, që punonin në Shtëpinë e Zotit, ¹³ të muratorëve e të gurgdhendësve; për të blerë dru e gurë të gdhendur, për meremetime në Shtëpinë e Zotit dhe për shpenzime të tjera lidhur me meremetime të Shtëpisë. ¹⁴ Porse me paratë e falura në Tempull të Zotit, nuk punoheshin as kupa të argjendta të Tempullit të Zotit, as thika, as trumbeta, as kusi: asnjë enë e artë as e argjendtë. ¹⁵ Këto para u jepeshin punëtorëve për të ndrequr Tempullin e Zotit. ¹⁶ E njerëzve që u lihej në dorë kjo punë, paratë u jepeshin pa i numëruar për të paguar punëtorët, sepse ata punonin me ndërgjegje. ¹⁷ Të hollat që vinin nga flitë e shpërblimit ose të pajtimit, nuk shtiheshin në Shtëpinë e Zotit, por u takonin priftërinjve.

¹⁸ Atëherë u çua Hazaeli, mbreti i Sirisë, e sulmoi Getin; pasi e pushtoi atë, vendosi ta sulmojë edhe Jerusalemin. ¹⁹ Për këtë arsye Joasi, mbreti i Judës, i mori të gjitha gjërat e kushtuara që i dhuruan etërit e tij Jozafati, Jorami, Okozia, mbretërit e Judës, dhe ato që i kishte dhuruar ai vetë, mbarë arin që mundi të gjendej në thesaret e Tempullit të Zotit dhe në pallatin mbretëror, dhe ia dërgoi Hazaelit, mbretit të Sirisë: atëherë ai u largua nga Jerusalemi.

²⁰ Veprat e tjera të Joasit si dhe të gjitha që bëri, pse a nuk janë të gjitha këto të shkruara në Librin e Analeve të mbretërve të Judës? ²¹ Oficerët e tij u përbetuan kundër tij dhe e vranë në pallatin Melo, kur po zbriste në Selë. ²² Ishin Isahari, biri i Semaatit, dhe Jozabadi, biri i Somerit, oficerët e tij, që e goditën dhe Joasi vdiq. Qe varrosur me etërit e vet në Qytetin e Davidit. Në vend të tij u bë mbret Amasiu, i biri.

Kapitujt