Kapitujt

1 i Mbretërve: 9. Dëftim i ri hyjnor

¹ Kur Salomoni kreu së ndërtuari Shtëpinë e Zotit, shtëpinë e mbretit e, pasi kreu së ndërtuari gjithçka kishte synuar të ndërtonte, ² iu dëftua Zoti për së dyti, siç i ishte dëftuar në Gabaon. ³ E Zoti tha:

“Ta kam vështruar lutjen e kërkesën tënde që më ke drejtuar. E kam shuguruar Shtëpinë që ke ndërtuar për banesë të përhershme të Emrit tim. Sytë e mi dhe zemra ime do të jenë aty përgjithmonë. ⁴ Po edhe ti, nëse do të ecësh para meje, siç eci yt atë, Davidi, në thjeshtësi të zemrës e në drejtësi dhe, nëse do t’ i zbatosh të gjitha ato që ti kam urdhëruar dhe, nëse do t’i mbash ligjet e mia dhe urdhërimet e mia, ⁵ unë do ta mbaj fronin e mbretërisë sate përgjith‑ monë mbi Izrael, sikurse i kam premtuar atit twnd, Davidit, kur i kam thënë: ‘Kurrë nuk do të mungojë në fronin e Izraelit një ndër pasardhësit e tu’. ⁶ Por, në qoftë se më lini ju dhe bijtë tuaj duke mos me ndjekur dhe duke mos i mbajtur urdhërimet e mia e ligjet e mia, që jua kam urdhëruar, por do të shkoni e do t’i nderoni hyjnitë e tjera dhe do t’i adhuroni ato, ⁷ do të bëj të zhduket Izraeli prej sipërfaqes së tokës, që jua kam dhënë; po edhe Tempullin që e shugurova për nder të Emrit tim, do ta flak prej pranisë sime dhe Izraeli do të bëhet një emnesë dhe përrallë për mbarë popujt. ⁸ Kjo shtëpi do të bëhet gërmadhë! Kushdo që të kalojë nëpër të, do të çuditet e do të pëshpëritë dhe do të thotë: ‘Përse ia bëri Zoti kështu këtij vendi e kësaj Shtëpie’? ⁹ E do të përgjigjen: ‘Sepse e lanë Zotin, Hyjin e vet, që i pati nxjerrë etërit e tyre prej tokës së Egjiptit, dhe shkuan pas hyjnive të huaja e i adhuruan dhe i nderuan ato. Kjo është arsyeja që Zoti solli mbi ta gjithë këtë të keqe’”.

Këmbimi me Hiramin

¹⁰ Si kaluan njëzet vjet pasi Salomoni i kreu së ndërtuari dy shtëpitë, Shtëpinë e Zotit e pallatin mbretëror, ¹¹ ‑ e meqenëse Hirami, mbreti i Tirit, i kishte dhënë Salominit lëndën e cedrit e të bredhit dhe ar aq sa kishte pasur nevojë, ‑ atëherë edhe Salomoni i dha Hiramit njëzet qytete në Galile. ¹² Hirami atëherë doli prej Tirit për t’i parë qytetet që i kishte dhënë Salomoni, por ato nuk i pëlqyen. ¹³ Atëherë tha: “Po a këto janë qytetet që m’i dhe, or vëlla”? Dhe i quajti ato qytete “Toka Kabul” deri në ditën e sotme. ¹⁴ Hirami i dërgoi mbretit njëqind e njëzet talenta ari.

Angaritë për ndërtime

¹⁵ Ja, çfarë ishte lidhur me angarinë që mbreti Salomon e vuri për të ndërtuar Shtëpinë e Zotit, pallatin e vet, Milon, muret e Jerusalemit, Asorin, Magedon dhe Gazerin.

¹⁶ Faraoni, mbreti i Egjiptit, nisi luftën, pushtoi Gazerin, e dogji me zjarr dhe i vrau kananenjtë që jetonin në të. Qytetin ia dha për pajë vajzës së vet, gruas së Salomonit. ¹⁷ Kështu, pra, Salomoni ndërtoi Gazerin dhe Betoronin e Poshtëm, ¹⁸ Baalatin, Tamarin e shkretëtirës, në vend, ¹⁹ si dhe të gjitha qytetet ‑ depo, qytetet për karroca lufte, për kalori që i përkisnin atij dhe gjithçka tjetër i pëlqente për të ndërtuar në Jerusalem, në Liban e në të gjitha tokat që i kishte nën pushtet. ²⁰ Mbarë popullin që kishte mbetur prej amorrenjve, prej hetenjve, prej ferezenjve, prej hevenjve, prej jebusenjve, që nuk ishin prej bijve të Izraelit, ²¹ bijtë e tyre, që mbetën pas tyre në vend, d. m. th. ata që bijtë e Izraelit nuk arritën t’i shfarosnin, Salomoni i detyroi të punonin pa shpërblim si skllevër deri në ditën e sotme. ²² Kurse bijtë e Izraelit Salomoni nuk i ktheu në skllevër, por i kishte ushtarë, oborrtarë, prijës, armëmbajtës, prijës të karrocave të tija e të kalorësisë së tij. ²³ Prijësit që ishin në krye të të gjitha punëve të Salomonit, ishin pesëqind e pesëdhjetë. Këta i urdhëronin popullit që ishte i detyruar të punonte.

²⁴ Posa hyri bija e faraonit prej Qytetit të Davidit në pallatin e saj që i ndërtoi Salomoni, menjëherë Salomoni ndërtoi Melon.

Shërbesa në Tempull

²⁵ Tri herë në vit Salomoni kushtonte fli shkrumbimi dhe fli pajtimi në lter që kishte ndërtuar për nder të Zotit dhe digjte kem për nder të Zotit. Kështu e kreu Tempullin.

3. SALOMONI DHE TREGTIA

Salomoni ndërton flotën detare

²⁶ Mbreti Salomon ndërtoi edhe flotën në Asiongaber, që është afër Ailatit, në bregun e Detit të Kuq, në tokën e Idumesë. ²⁷ Hirami i dërgoi shërbëtorët e vet në anije, njerëz të mësuar me detin bashkë me shërbëtorët e Salomonit. ²⁸ Këta, kur erdhën në Ofir, i morën prej andej katërqind e njëzet talenta ar dhe ia sollën Salomonit mbret.

Pasia e mbretëreshës së Sabës

Kapitujt