Kapitujt

1 i Mbretërve: 6. Ndërtimi i Tempullit

¹ Të katërqind e tetëdhjetin vit pasi bijtë e Izraelit kishin dalë prej Egjiptit, të katërtin vit, në muajin Ziv ‑ d. m. th. në muajin e dytë ‑ të mbretërisë së Salomonit mbi Izraelin, Salomoni filloi të ndërtojë Shtëpinë për nder të Zotit. ² Shtëpia që Salomoni mbret e ndërtoi për Zotin, ishte gjashtëdhjetë kute e gjatë, njëzet kute e gjerë e tridhjetë kute e lartë. ³ Përpara Tempullit ishte tremja e gjatë njëzet kute, sipas gjerësisë së Tempullit dhe ishte e gjerë dhjetë kute në ballë të Tempullit. ⁴ Në Tempull ndërtoi edhe dritaret me rrethore e me rrjetë hekuri. ⁵ Ndërtoi mbështetur për murin e Tempullit kate përreth murit të Shtëpisë, të sallonit të madh e të Dabirit. ⁶ Kati i poshtëm ishte i gjerë pesë kute, kati i mesëm gjashtë kute i gjerë, kati i tretë shtatë kute i gjerë; sepse e kishte bërë me shkallë gjithkund përjashta murit që traret të mos hynin në murin e Tempullit.

⁷ Tempulli u ndërtua me gurë të latuar e të bërë gati, kështu që derisa u ndërtua Tempulli, nuk u dëgjua çekan as daltë dhe asnjë vegël e hekurt në Tempull. ⁸ Hyrja në katin e parë ishte në anën e djathtë të Tempullit e me anë të shkallëve rrethore ngjitej në katin e mesëm e prej tij në të tretin.

⁹ Kështu e ndërtoi Tempullin dhe e kreu; atëherë e mbuloi me trarë e dërrasa cedri. ¹⁰ Ndërtoi edhe aneksin përreth tërë Tempullit. Ishte pesë kute i lartë dhe i lidhur me Tempull me anë të trarëve të cedrit.

¹¹ Atëherë Salomonit i qe drejtuar fjala e Zotit. I tha:

¹² “Ti po e ndërton Tempullin... por, nëse ti do të ecësh sipas ligjeve të mia, nëse edhe do t’ i zbatosh urdhërimet e mia e nëse do t’i mbash rregulloret e mia dhe nëse do të jetosh sipas tyre, unë do të përforcoj premtimin tim, që ia kam dhënë Davidit, babait tënd; ^l3 e do të jetoj në mesin e bijve të Izraelit dhe kurrë nuk do të ndahem nga pupulli im, Izraeli”.

Brendia e Tempullit. Shenjtërorja e shenjtëroreve

¹⁴ Kështu Salomoni e ndërtoi Tempullin dhe e kreu.

¹⁵ Atëherë i veshi përbrenda muret e Tempullit me dërrasa cedri; prej truallit të Tempullit e deri në majë të mureve dhe tavanet i mbuloi me dërrasa cedri përbrenda, kurse truallin e shtroi me dërrasa bredhi. ¹⁶ E punoi edhe perden dërrasash cedri njëzetkutësh në pjesën e sprasme të Tempullit me dërrasa cedri prej truallit e deri në tavan dhe e ndau këtë pjesë për Dabir d. m. th. Shenjtërore të shenjtëroreve. ¹⁷ Kurse vetë Tempulli, para saj, ishte dyzet kute i gjatë. ¹⁸ Në dërrasat e cedrit përbrenda Tempullit ishin të gdhendura gërsheta trëndafilash dhe boça të hapura lulesh. Të gjitha ishin të veshura me lëndë cedri dhe askund nuk shihej guri në mure.

¹⁹ Dabirin e punoi në mes të Shtëpisë, në pjesën e brendshme të fshehtë për ta vendosur në të Arkën e Besëlidhjes së Zotit. ²⁰ Kishte gjatësi njëzet kute, gjerësi njëzet kute e lartësi njëzet kute. E veshi me ar të pastër. Para Dabirit punoi me dru cedri një lter. ²¹ Salomoni e veshi brendinë e shtëpisë me ar të pastër dhe para Dabirit vuri vargje të arta. ²² S’kishte asgjë në Tempull që të mos ishte e veshur me ar, po edhe krejt lteri i caktuar për Dabirin, ishte i veshur në ar.

Kerubinët

²³ Në Dabir i punoi dy kerubinë, prej druri të ullirit, të lartë dhjetë kute. ²⁴ Njëri krah i kerubinit ishte i gjatë pesë kute dhe krahu tjetër i kerubinit ishte i gjatë pesë kute, d. m. th. dhjetë kute prej njërës majë të krahut deri në majën e krahut tjetër. ²⁵ Dhjetë kutesh ishte edhe kerubini i dytë: të dy kerubinët kishin të njëjtën masë e të njëjtën trajtë. ²⁶ Lartësia e njërit kerubin ishte dhjetë kutesh, po aq edhe e tjetrit. ²⁷ Kerubinët i vendosi në mjedis të Tempullit në pjesën e brendshme. Kerubinët shtrinin krahët e vet, kështu që njëri krah i kerubinit të parë prekte njërën faqe të murit e krahu i kerubinit të dytë prekte faqen tjetër të murit, kurse krahët e tjerë në mes të Tempullit ndesheshin me njëri‑tjetrin. ²⁸ Edhe kerubinët i veshi me ar. ²⁹ Muret e Tempullit i mbuloi me gdhendje figurash kerubinësh, palmash e lulesh të çelura gjithkund përreth, brenda dhe jashtë. ³⁰ Me ar e mbuloi edhe shtrojën e Tempullit përfundi dhe përsipër.

Dyert. Tremja

^3l Për hyrje në Dabir punoi derë dykrahëshe prej druri të ullirit. Ballëzinat e pragu ishin në pesë kënde. ³² Në dy krahët prej druri të ullirit gdhendi kerubinë, palma e lule të çelura dhe i veshi me ar duke i mbuluar si kerubinët, ashtu edhe palmat me ar. ³³ Po ashtu bëri edhe për hyrje në Tempull: e punoi derën prej druri të ullirit me prag e me ballëzina katërkëndëshe, ³⁴ kurse dy krahët e derës ishin prej bredhit. Secili krah ishte i dyfishtë dhe hapej. ³⁵ Gdhendi kerubinë, palma dhe boça të çelura lulesh dhe i veshi të gjitha me pllaka ari.

³⁶ Pastaj e ndërtoi tremen përbrenda me tre rreshta gurësh të latuar e një rresht me trarë cedri.

Datat

³⁷ Në vitin e katërt, në muajin Ziv, iu vunë themelet e Shtëpisë së Zotit; ³⁸ kurse në vitin e njëmbëdhjetë në muajin Bul ‑ d. m. th. muaji i tetë ‑ u krye Shtëpia në të gjitha pjesët e saja me gjithçka i duhej.

Salomoni e ndërtoi për shtatë vjet.

Kapitujt