Kapitujt

Danieli: 11. Leka i Madh

¹ Vetë që prej vitit të parë të Dariut Medas qëndroja pranë tij që të përtëritej e të forcohej. ² Tani ty do të ta tregoj të vërtetën:

“Ja, edhe tre mbretër do të ngriten për Persinë: i katërti do pasurohet më tepër se të gjithë dhe, kur të bëhet i dhunshëm për shkak të pasurisë së vet, do të çojë gur e peshë kundër mbretërisë greke.

Leka i Madh

³ Pastaj do të ngallitë një mbret i fuqishëm e trim, i cili do të zotërojë mbi një perandori të madhe dhe do të bëjë çfarë t’i pëlqejë. ⁴ E kur t’ia ketë dalë në majë, mbretëria e tij do të shkatërrohet e do të ndahet në katër erërat e qiellit, por jo ndërmjet pasardhësve të tij as me të njëjtën fuqi që e kishte ai: me të cilën sundoi. Mbretëria e tij do të copëtohet edhe do t’u jepet të tjerëve, e jo këtyre.

Luftërat e para ndërmjet seleucidëve e lagidëve

⁵ Mbret, i Mesditës do të bëhet i fuqishëm e njëri prej princave të tij do t’ia marrë krepçinë e perandoria e tij do të bëhet më e fortë se e tij. ⁶ Disa vjet më vonë do të bëjnë besëlidhje: bija e mbretit të Mesditës do të shkojë te mbreti i Veriut për të lidhur miqësi, por nuk do të mund ta ndalojë fuqinë e krahut dhe ajo s’do t’i bëjë ballë; do të dorëzohet ajo, ata që e sollën, djali i saj dhe ai e ndihmonte atë në ato kohë.

⁷ Nga pinjollat e rrënjëve të saj do të ngallitë njëri, në vend të saj, do të vijë një ushtri, do të depërtojë në fortesat e mbretit të Veriut, do t’i sulmojë e do t’i pushtojë. ⁸ Deri edhe hyjnitë e tij, truporet e tyre, enët e çmueshme argjendi e ari do të bëhen pre që do t’i çojë në Egjipt: Ai do të ngadhënjejë për disa kohë mbi mbretin e Veriut.

⁹ Ai do të sulet kundër mbretit të Mesditës, por do të kthehet në vendin e vet. ¹⁰ Bijtë e tij do të bashkohen dhe do të mbledhin një ushtri tejet të madhe. Njëri prej tyre do të sulet me tërbim, do ta vërshojë, do të kthehet, do të ngritet përsëri e do të arrijë deri në fortesë. ¹¹ Mbreti i Mesditës, i zemëruar, do të dalë për të luftuar kundër tij, kundër mbretit të Veriut. Ky do të bëjë gati një ushtri të madhe, por kjo do të bjerë në dorën e mbretit të Mesditës. ¹² Ushtria do të pësojë humbje të mëdha e ai do të krenohet për këtë gjë. Do të vrasë shumë mijëra, por nuk do të ngadhënjejë. ¹³ Sepse mbreti i Veriut do të kthehet e do ta bëjë gati një ushtri edhe më të madhe se të parën e në kohën e caktuar pas disa vjetësh, do të sulet me një ushtri të madhe e të përgatitur mirë. ¹⁴ Në atë kohë shumë do të ngriten kundër mbretit të Mesditës; do të ngriten edhe të dhunshmit e popullit tënd për ta çuar në vend vegimin, por do të birren.

¹⁵ Do të vijë mbreti i Veriut, do të hapë llogore dhe do të pushtojë një qytet tejet të fortifikuar. Krahët e Mesditës nuk do të mund të bëjnë ballë dhe ushtria e zgjedhur e tij nuk do të ketë fuqi të qëndrojë. ¹⁶ Pushtuesi do të bëjë çka të dojë dhe askush s’do të mund t’i dalë përballë. Do të ngulë në atë vend të mrekullueshëm e rrënimi do të jetë në duart e tij. ¹⁷ Do t’ia vërë syrin ta pushtojë mbarë mbretërinë e Mesditës, do të lidhë me të marrëveshje, vajzën do t’ia japë për ta shkatërruar, por kjo s’do të ketë sukses e s’do t’ia arrijë qëllimit. ¹⁸ Atëherë do t’u sillet ishujve dhe shumicën do t’i pushtojë, por një princ do t’i japë fund këtij turpi dhe marrja do të kthehet e do të bjerë mbi të. ¹⁹ Atëherë do të kthehet drejt qyteteve të vendit të vet, por do të marrë në thua e do të rrëzohet e do të zhduket. ²⁰ Në vend të tij do të vijë një tjetër që do ta dërgojë tatimtarin e vet në Stolinë e mbretërisë, por në pak ditë do të vritet pa zemërim e pa luftë.

Antioku Epifan

²¹ Në vend të tij do të vijë një i poshtër, të cilit nuk do t’i jepet nderi mbretëror. Do të vijë fshehtas e me dredhi do ta marrë mbretërinë. ²² Fuqitë e armatosura do të asgjësohen përpara tij dhe do të sharrojë edhe Princi i Besëlidhjes. ²³ Me gjithë marrëveshjen me të, tradhtisht do të sulmojë dhe do të ngadhënjejë me pak popull. ²⁴ Në kohën e qetësisë do të shpërthejë në krahina të pasura e do të bëjë çfarë nuk bënë baballarët e tij as baballarët e baballarëve të tij: rrëmbime, grabitje; do t’i shpërndajë pasuritë e tyre, do të sendërtojë synime kundër qyteteve të fortifikuara, por vetëm për një kohë.

²⁵ Fuqia e tij dhe mendja e tij do të nxitet të çojë një ushtri të madhe kundër mbretit të Mesditës. Mbreti i Mesditës do të niset në luftë me forca të mëdha ushtarake, por nuk do të qëndrojë, sepse do të shtiejnë fitma kundër tij. ²⁶ Do ta vrasin pikërisht ata që do të hanë në tryezën e tij bashkë me të; ushtria e tij do të shkatërrohet e shumë do të mbesin të vrarë.

²⁷ Qëllimi i të dy mbretërve do të jetë t’i bëjnë keq njëri‑tjetrit, do të rrinë në të njëjtën tavolinë e do të bisedojnë me zhibla duke e rrejtur njëri‑tjetrin, por s’do të fitojnë gjë, sepse do t’i presë sosja në kohën e caktuar. ²⁸ Ai do të kthehet në tokën e vet me pasuri të madhe, me zemër kundër Besëlidhjes së shenjtë; do të veprojë sipas synimeve të veta e do të kthehet në vendin e vet.

²⁹ Në kohën e caktuar do të kthehet në tokën e Mesditës, por kjo ndërmarrje e fundit nuk do të dalë si e para. ³⁰ Kundër tij do të vijnë anijet me tre rrema, romakët; do ta sulmojnë e do të marrë arratinë. Do të kthehet duke u tërbuar kundër Besëlidhjes së shenjtë dhe përsëri do të merret vesh me ata që e shkelën Besëlidhjen e shenjtë.

Përndjekja e hebrenjve

³¹ Fuqi ushtarake të armatosura prej tij do të shkojnë ta dhunojnë shenjtëroren ‑ fortesë; do ta ndalojnë flinë e përditshme dhe do ta vendosin turpin e shkatërrimit. ³² Me dredhi do t’i joshë ata që e kanë thyer Besëlidhjen, kurse populli që e njeh Hyjin do të qëndrojë e do të veprojë. ³³ Mësuesit e popullit do ta mësojnë shumicën, por për disa ditë do të sharrojnë prej shpatës, prej zjarrit, në mërgim e në pre. ³⁴ Kur të sharrojnë kështu, pak kush do t’u vijë në ndihmë dhe shumëkush do t’u afrohet me dredhi. ³⁵ Do të ketë edhe ndër të urtë prej atyre që do të rrëzohen që të sprovohen, të pastrohen e të zbardhen ‑ deri në kohën e caktuar, sepse do të vijë koha e caktuar. ³⁶ Mbreti do të veprojë sipas dëshirës së vet. Do të ngritet, do të madhërohet përmbi çdo zot. Edhe kundër Hyjit të hyjnive do të flasë gjëra të padëgjuara e do të ketë sukses derisa të mbushet zemërimi: sepse çka ka qenë caktuar, patjetër do të shkojë në vend. ³⁷ S’do t’i marrë parasysh as zotat e etërve të vet, as të Lakmueshmin e grave, as cilindo prej zotave, sepse do ta vërë veten mbi gjithçka. ³⁸ Në vend të tyre do të nderojë hyjin e fortesave, hyjin që nuk e njohën etërit e tij. Do ta nderojë me ar, argjend, gur të paçmueshëm e me gjëra të çmueshme. ³⁹ Në emër të kësaj hyjnie të huaj do t’i sulmojë qytetet e fortifikuara. Atë që do ta pranojë, do ta mbulojë me nder, do t’u japë pushtet mbi shumicën dhe do t’u ndajë toka si shpërblim.

KOHA E FUNDIT

Mbarimi i salvuesit

⁴⁰ Në kohën e Mbarimit mbreti i Mesditës do të luftojë kundër tij dhe porsi stuhia do të vijë kundër tij mbreti i Veriut me karroca lufte, me kalorës e me anije të mëdha; do të hyjë nëpër vende, do të ndrydhë e do të kalojë. ⁴¹ Do të hyjë edhe në Vendin e lavdishëm. Shumë vende do të bien. Vetëm këto vende do të shpëtojnë nga dora e tij: Edomi, Moabi dhe kryesia e bijve të Amonit.

⁴² Do ta shtrijë dorën e vet mbi vende dhe as toka e Egjiptit nuk do t’i shpëtojë. ⁴³ Do t’i pushtojë visaret e arit, të argjendit e të gjitha gjërat e çmueshme të Egjiptit; gjurmëve të tij do të kalojnë edhe libianët e etiopianët. ⁴⁴ Por do ta turbullojnë lajmet nga Lindja e nga Veriu dhe do të niset me zemërim të madh për të zhdukur e për të vrarë shumë. ⁴⁵ Tendat e pallatit të vet do t’i ngrehë ndërmjet detit dhe Malit të Shenjtë të Stolisë. Edhe atij do t’i vijë fundi dhe askush s’do ta ndihmojë.

Kapitujt