Kapitujt

Zbulesa: 22. Ardhja e Krishtit

¹ Ai ma tregoi lumin e ujit të jetës: ishte i pastër porsi kristali dhe buronte nga froni i Hyjit dhe i Qengjit.

² Në mes të sheshit të qytetit dhe të dy krahëve të lumit ishte pema e jetës që jep fryt dymbëdhjetë herë në vit: çdo muaj jep frytin e vet, kurse gjethet e pemës janë barna shërimi për popuj.

³ Mallkim më s’do të ketë. Në të do të jetë froni i Hyjit dhe i Qengjit dhe shërbëtorët e Hyjit do ta adhurojnë Hyjin ⁴ dhe do ta shikojnë fytyrën e tij. Emri i tij do të jetë në ballë të tyre. ⁵ Nuk do të ketë natë as drita e llambës më nuk do të duhet, as drita e diellit, sepse Zoti Hyj do të shndrisë mbi ta dhe ata do të mbretërojnë në shekuj të shekujve.

Ardhja e Krishtit

⁶ Atëherë më tha:

»Këto fjalë janë të besueshme dhe të vërteta, sepse Zoti Hyj, frymëzuesi i profetëve, e dërgoi engjëllin e vet që t’iu tregojë shërbëtorëve të vet çka duhet të ndodhë së shpejti«.

⁷ Dhe ja, po vij së shpejti!

I lumi ai që i mban fjalët e profecisë së këtij libri!«

⁸ Unë, Gjoni, i dëgjova dhe i pashë këto. Kur i dëgjova dhe i pashë, rashë përmbys para engjëllit që m’i tregoi, për ta adhuruar. ⁹ Ai më tha: »Assesi mos bëj ashtu! Edhe unë jam shërbëtor si ti dhe si vëllezërit e tu profetë edhe si ata që i mbajnë fjalët e këtij libri. Hyjin adhuro!«

¹⁰ E më tha:

»Mos i mbaj në fshehtësi fjalët e profecisë së këtij libri, sepse - koha u afrua!

¹¹ I padrejti, ani, le të vazhdojë le të bëjë padrejtësi!

I ndyti, në dashtë, le të vazhdojë të zhytet më zi!

I drejti le të vazhdojë të bëjë drejtësi!

Shenjti le të vazhdojë të shenjtërohet gjithnjë!«

¹² Ja, unë po vij së shpejti! Edhe shpërblimi im me mua, për të shpërblyer gjithkënd sipas veprave të tij!

¹³ Unë jam Alfa dhe Omega, i Pari dhe i Fundit, Fillimi dhe Mbarimi!

¹⁴ Të lumët ata që i lajnë petkat e veta për të pasur pjesë në pemën e Jetës për të hyrë nëpër dyer në qytet!

¹⁵ Përjashta mbesin qentë, shortarët, fëlligështarët, idhujtarët dhe të gjithë ata që e duan ose e vënë në zbatim gënjeshtrën.

¹⁶ Unë, Jezusi, e dërgova engjëllin tim t’jua sjellë këtë dëshmi kishave.

Unë jam rrënja edhe pinjolli i Davidit, Ylli i ndritshëm i mëngjesit!«

¹⁷ Shpirti Shenjt dhe Nusja thonë: »Eja!«

Edhe ai që dëgjon le të thotë: »Eja!«

Kush është etshëm, le të vijë; kush do, le ta marrë ujin e jetës falas!

¹⁸ Unë i dëshmoj secilit që i dëgjon fjalët e profecisë së këtij libri: » Atij që do t’i shtojë ndonjë gjë, Hyji do t’ia shtojë plagët e përshkruara në këtë libër.

¹⁹ Atij që do ta heqë ndonjë fjalë nga ky libër i profecisë, Hyji do t’ia heqë pjesën në pemën e jetës dhe në qytetin e shenjtë - të përshkruar në këtë libër«.

²⁰ Ai që i dëshmon këto, thotë: »Po, po vij së shpejti!« Amen! Eja, o Zot, Jezus!

²¹ Hiri i Jezusit Zot qoftë me të gjithë! 

Kapitujt