Kapitujt

Zbulesa: 20. Një mijë vjetët

¹ Pastaj pashë: një engjëll tjetër po zbriste prej qiellit me çelësin e Humnerës dhe me hekura të mëdha në dorë. ² Ai e kapi Dragoin - Gjarprin e vjetër - Djallin, Satanin - dhe e lidhi në hekura për një mijë vjet. ³ E plandosi në Humnerë, e mbylli dhe e vulosi derën mbi të që të mos i ngashnjejë njerëzit derisa të plotësohen një mijë vjetët.

Atëherë duhet të zgjidhet për pak kohë.

⁴ Pastaj pashë edhe fronet: Atyre që ndenjën në to u qe dhënë pushteti të gjykojnë.

Pashë edhe shpirtrat e atyre që ishin prerë për shkak të dëshmisë së Jezusit dhe për shkak të Fjalës së Hyjit, po ashtu edhe ata që nuk e adhuruan Egërsirën dhe truporen e saj dhe nuk e morën vulën në ballë as në dorë të tyre.

Ata u kthyen në jetë dhe bashkë me Krishtin mbretëruan një mijë vjet. ⁵ Të vdekurit e tjerë nuk u ngjallën derisa u plotësuan një mijë vjet.

Kjo është ngjallja e parë.

⁶ I lum dhe i shenjtë është ai që ka pjesë në ngjalljen e parë! Mbi ta vdekja e dytë s’ka pushtet: ata do të jenë priftërinjtë e Hyjit dhe të Krishtit dhe bashkë me Të do të mbretërojnë për një mijë vjet.

Shpartallimi i Satanit

⁷ Pasi të kryhen një mijë vjet, Satani do të zgjidhet nga burgu i tij ⁸ dhe do të dalë të ngashnjejë popujt nga katër anët e botës - Gogë dhe Magogë - dhe do t’i bashkojë në luftë: numri i tyre është porsi rëra e detit.

⁹ Edhe këta u tubuan në fushën e gjerë të botës, e rrethuan fushimin e shenjtërve dhe qytetin e dashur. Por, nga qielli zbriti zjarri dhe i përpiu. ¹⁰ Djalli - ngashnjyesi i tyre, që plandosur në liqenin e zjarrtë dhe të sulfurt, aty ku gjendet Egërsira dhe Profeti i rrejshëm: aty do të vuajnë ditë e natë në shekuj të shekujve.

Gjyqi para fronit të lartë dhe të bardhë

¹¹ Atëherë pashë një fron të madh dhe të bardhë edhe Atë që rri në të. Para tij u zhduk toka e qielli pa lënë farë gjurme.

¹² Pashë edhe të vdekurit: të mëdhenj dhe të vegjël, në këmbë para fronit. Atëherë u hapën librat. U hap edhe një libër tjetër: libri i jetës.

Të vdekurit u gjykuan sipas shkrimeve që ishin në libra - sipas veprave të tyre.

¹³ Deti i ktheu të vdekurit që ishin në të, po ashtu edhe Vdekja dhe Nëntoka i kthyen të vdekurit që ishin në to: të gjithë qenë gjykuar sipas veprave të veta.

¹⁴ Atëherë edhe Vdekja dhe Nëntoka qenë hedhur në liqenin e zjarrtë.

Liqeni i zjarrtë është vdekja e dytë.

¹⁵ Kushdo nuk u gjet i shkruar në librin e jetës qe plandosur në liqenin e zjarrtë.

Kapitujt