Kapitujt

Zbulesa: 15. Engjëjt me plagët e fundit

¹ Pastaj pashë në qiell një tjetër shenjë, të madhe dhe të mrekullueshme: shtatë engjëj me shtatë plagët e fundit, sepse me to do të marrë fund zemërimi i Hyjit.

² Pashë gjithashtu diçka si det qelqi të përzier me zjarr.

Në këmbë, në detin qelqor, qëndronin ata që ngadhënjyen mbi Egërsirën, mbi truporen e saj dhe mbi numrin e emrit të saj. Ngadhënjyesit mbanin në dorë harpat e Hyjit.

³ Këndonin këngën e Moisiut, shërbëtorit të Hyjit, dhe këngën e Qengjit: »Të mëdha dhe të madhërueshme janë veprat e tua, o Zot, Hyj, o i Gjithëpushtetshëm! Të drejta dhe të vërteta janë udhët e tua, o Mbreti i popujve!

⁴ Kush të mos të të druajë ty, o Zot, dhe kush të mos e lavdërojë Emrin tënd?!

Ti i vetmi, je Shenjti! Të gjitha kombet do të vijnë dhe do të adhurojnë para Teje, sepse Gjyqet e tua u dëftuan të drejta!«

⁵ E atëherë pashë: U hap tempulli i Tendës së Dëshmisë në qiell!

⁶ Prej tempullit dolën shtatë engjëjt që mbanin shtatë plagët: ishin të veshur me li të pastër dhe të shndritshëm, të ngjeshur përreth parzmës me brez ari.

⁷ Njëra nga katër Gjallesat u dha shtatë engjëjve shtatë gota ari të mbushura me hidhërimin e Hyjit që jeton në shekuj të shekujve.

⁸ Tempulli u mbush me tymin e Lavdisë së Hyjit dhe të pushtetit të tij, dhe askush s’mund të hynte në tempull derisa të merrnin fund shtatë plagët e shtatë engjëjve.

Kapitujt