Kapitujt

Zbulesa: 9. Ai e çeli grykën e pusit të Humnerës

¹ Edhe engjëlli i pestë i ra trumbetës: pashë një yll duke rënë mbi tokë! Atij iu dorëzua çelësi i pusit të Humnerës.

² Ai e çeli grykën e pusit të Humnerës, nga pusi doli tym porsi tym i një furre të madhe. Prej tymit të pusit u errësua dielli, gjthashtu edhe ajri.

³ Nga tymi dolën mbi tokë karkaleca, dhe u qe dhënë atyre zotësia si e kanë akrepët e tokës.

⁴ U qe ndaluar t’i bëjnë farë dëmi barit të tokës, gjelbërimeve e lëndëve , por të dëmtojnë njerëzit që nuk e kanë në ballë vulën e Hyjit.

⁵ U qe lejuar, jo t’i vrasin, por t’i mundojnë për pesë muaj; mundimi është porsi mundimi që jep akrepi kur e ha njeriun.

⁶ Në ato ditë njerëzit do ta lypin vdekjen e nuk do ta gjejnë.

Dhe të dëshirojnë të vdesin, por vdekja do të largohet prej tyre.

⁷ Karkalecat ishin në ngjasim të kuajve të përgatitur për luftim: në kokë kishin si kurorë ari dhe fytyrat i kishin si njerëzit, ⁸ flokët porsi flokët e grave, dhëmbët porsi të luanëve.

⁹ Ishin të ngjeshur pothuajse me hekur, ushtima e krahëve të tyre si ushtima e karrocave të luftës me shumë kuaj kur sulen në luftim.

¹⁰ Bishti i tyre në ngjasim të akrepëve, me thimtha; në bisht kishin fuqinë për të munduar njerëzit gjatë pesë muajve.

¹¹ Për mbret kishin engjëllin e Humnerës që hebraisht quhet Abadon e greqisht Apolion.

¹² »Vaj-i« i parë kaloi. Ja, po vijnë edhe dy »Vaje« të tjera!

¹³ Edhe engjëlli i gjashtë i ra trumbetës: atëherë dëgjova një zë që po vinte nga brirët e lterit të artë që është para Hyjit, ¹⁴ i cili i thoshte të gjashtit engjëll që kishte trumbetën: »Zgjidhi katër engjëjt që janë të lidhur në Lumin e Madh, në Eufrat!«

¹⁵ Dhe qenë zgjidhur katër engjëjt që ishin të gatshëm për atë moment e për atë ditë, për atë muaj e vit, për të vrarë një të tretën e njerëzve.

¹⁶ Numri i togave të kalorësve - ua dëgjova numrin - ishte dyqind milionë!

¹⁷ Në këtë vegim m’u paraqitën kuajt dhe kalorësit: pancirat i kishin ngjyrë zjarri, vjollce dhe sulfuri. Kokat e kuajve, koka luanësh, gojët e tyre villnin zjarr, tym dhe sulfur.

¹⁸ Nga këto tri plagë: zjarr, tym dhe sulfur, që dilnin nga goja e tyre, sharroi një e treta e njerëzve. ¹⁹ Sepse kuajt e kanë forcën e tyre në gojën e tyre dhe bishtin e tyre: bishti i tyre u ngjan gjarpërinjve: kanë kokë me të cilën dëmtojnë.

²⁰ Megjithatë, njerëzit që nuk u vranë nga këto plagë, nuk u kthyen nga veprat e duarve të veta; por vazhduan të adhurojnë djajtë, idhujt e artë, të argjendtë, të bronztë, të hekurt, të drunjtë, që nuk mund të shohin, as të dëgjojnë as të ecin. ²¹ Nuk u kthyen nga vrasjet e veta, as nga shortitë e veta, as nga fëlligështitë e veta, as nga vjedhjet e veta.

Kapitujt