Kapitujt

Zbulesa: 3. Letra e drejtuar Kishës së Sardit

¹ Shkruaji edhe engjëllit të Kishës në Sard: »Kështu thotë Ai që ka shtatë shpirtrat e Hyjit dhe shtatë yjet: I di veprat e tua: thuhet se jeton, por je i vdekur!

² Rri zgjuar dhe forcoje tepricën që gati ka vdekur!

Sepse nuk i gjeta veprat e tua të përsosur para Hyjit tim.

³ Të të bjerë në mend, pra, si e ke marrë fjalën dhe e ke dëgjuar, ashtu edhe ruaje - dhe kthehu! Po nuk qëndrove zgjuar, do të vij si vjedhësi dhe nuk do të dish në ç’orë do të vij kundër teje.

⁴ Megjithatë i ke në Sard disa njerëz që nuk i përlyen petkat e veta.

Ata do të më përcjellin të veshur me petka të bardha, sepse janë të denjë.

⁵ Kështu edhe ngadhënjyesi do të mbajë petka të bardha; nuk do ta fshij emrin e tij prej librit të jetës dhe do ta dëshmoj emrin e tij para Atit tim dhe para engjëjve të tij.

⁶ Kush ka veshë, le të dëgjojë çka Shpirti Shenjt u thotë kishave«.

Letra drejtuar Kishës në Filadelfi

⁷ Edhe engjëllit në Kishën e Filadelfisë shkruaji:

»Kështu thotë Shenjti, i Vërteti.

Ai që ka çelësin e Davidit,

Kur ai çel askush s’mund të mbyllë,

kur ai mbyll askush s’mund të çelë:

⁸ I di veprat e tua!

Ja, e hapa para teje derën që akush s’mund ta mbyllë.

Njëmend pak fuqi ke dhe megjithatë e ruajte fjalën time dhe nuk i re mohit Emrit tim.

⁹ Ja, unë do t’i sjell disa nga sinagoga e Satanit - që e mbajnë veten për judenj e nuk janë, por rrejnë - ja, do t’i bie përdhuni para teje për t’u përkulur deri në dhe para teje, që ta marrin vesh se unë të dua.

¹⁰ Dhe pasi e mbajte me qëndrueshmëri fjalën time, dhe unë të të ruaj ty nga ora e provës që do të vijë mbi mbarë botën për t’i sprovuar banuesit e tokës.

¹¹ Do të vij së shpejti!

Ruaje mirë çka ke, që askush të mos e rrëmbejë kezën tënde!

¹² Ngadhënjyesin do ta bëj shtyllë në tempullin e Hyjit tim dhe prej andej ai s’do të dalë më kurrë!

Në të do ta shkruaj Emrin e Hyjit tim edhe emrin e qytetit të Hyjit tim, të Jerusalemit të ri, që zbret nga qielli, prej Hyjit tim, edhe Emrin tim të ri.

¹³ Kush ka veshë, le të dëgjojë çka Shpirti Shenjt u thotë kishave!«

Letra e drejtuar Kishës së Laodicesë

¹⁴ Shkruaji edhe engjëllit të Kishës në Laodice:

»Kështu thotë Ameni, Dëshmitari, Besniku i vërtetë, Parimi i krijesës së Hyjit:

¹⁵ i di veprat e tua: nuk je as i ftohtë as i nxehtë!

Oh, të ishe i ftohtë ose i nxehtë!

¹⁶ Por, pasi je i vakët - as i ftohtë as i nxehtë - do të vjell prej gojës sime!

¹⁷ Dhe pasi thua: »Jam i pasur! U bëra pasanik!

Asgjë nuk më mungon!» e, pasi nuk di se je i mjerë, i ngratë, skamnor, i verbër, i zhveshur, ¹⁸ po të këshilloj: blej prej meje ar të pastruar në zjarr që të pasurohesh, blej petka të bardha që të vishesh dhe të mos shihet turpi i lakuriqësisë sate; blej edhe barin për të lyer sytë që të shohësh!

¹⁹ Unë i qortoj dhe i ndëshkoj ata që i dua. Ji, pra, i zellshëm dhe kthehu!

²⁰ Ja, para derës qëndroj dhe trokas: kush e dëgjon zërin tim dhe e hap derën, do të hyj te ai dhe me të do ha darkë dhe ai me mua.

²¹ Ngadhënjyesin do ta vë të rrijë me mua në fronin tim, sikurse edhe vetë ngadhënjeva dhe ndenja bashkë me Atin tim në fronin e tij.

²² Kush ka veshë, le të dëgjojë çka Shpirti Shenjt u thotë kishave!«

Kapitujt