Kapitujt

Mateu: 16. Farisenjtë e saducenjtë kërkojnë një mrekulli

¹ Disa farisenj e disa saducenj iu afruan Jezusit me qëllim që ta zinin ngushtë e kërkuan prej tij t’u dëftojë një shenjë prej qiellit. ² Ai u përgjigj:

“Kur bëhet mbrëmje, thoni: ‘Do të jetë mot i mirë se u skuq qielli.’ ³ Kurse në agim: ‘Sot kemi stuhi, sepse qielli është i kuq e i vranët.’ Kështu, ju dini t’i shpjegoni dukuritë e qiellit, por shenjat e kohës nuk jeni të zotët t’i kuptoni! ⁴ Breznia e prapë dhe lavire kërkon shenjë! Por s’do t’i jepet asnjë shenjë tjetër, përveç shenjës së Jonës.”

Dhe i la e shkoi.

Tharmi i farisenjve e i saducenjve

(Mk 8 14‑21)

⁵ Kur u nisën nxënësit të kalojnë në anën tjetër, harruan të marrin bukë. ⁶ Jezusi u tha: “Hapni sytë dhe ruajuni prej tharmit të farisenjve e të saducenjve!” ⁷ Ata mendonin me vete e thoshin: “Pse s’morëm bukë!” ⁸ Jezusi e hetoi dhe u tha:

“Fepakët! Pse mendoni me vete: ‘Pse s’kemi bukë?’ ⁹ Po ju a ende nuk kuptoni? Po a nuk u bien në mend pesë bukët për pesë mijë njerëz dhe, edhe sa shporta mblodhët?! ¹⁰ Edhe shtatë bukët për katër mijë vetë, dhe sa shporta mblodhët? ¹¹ Si nuk kuptoni se nuk qe fjala për bukë kur thashë: ‘Ruajuni prej tharmit të farisenjve e të saducenjve!’“

¹² Atëherë e morën vesh se nuk u tha të ruhen prej tharmit të bukës, por prej mësimit të farisenjve e të saducenjve.

Dëshmimi i Pjetrit mbi Jezusin

(Mk 8, 27‑30; Lk 9, 18‑21)

¹³ “Kur Jezusi arriti në krahinën e Cezaresë së Filipit, i pyeti nxënësit e vet:

“Ç’thonë njerëzit, kush është Biri i njeriut?”

¹⁴ Ata u përgjigjën:

“Disa thonë se është Gjon Pagëzuesi; disa të tjerë Elia; do të tjerë Jeremia ose një ndër profetët.”

¹⁵ “Po ju ‑ u tha atyre ‑ ç’thoni: kush jam unë?”

¹⁶ Iu përgjigj Simon Pjetri:

“Ti je Mesia ‑ Biri i Hyjit të gjallë!”

¹⁷ Atëherë Jezusi i tha:

“I lumi ti, o Simon, biri i Jonës, sepse këtë nuk ta zbuloi mishi e gjaku, por Ati im që është në qiell! ¹⁸ Edhe unë po të them: Ti je Pjetër‑Shkëmb dhe mbi këtë shkëmb unë do ta ndërtoj Kishën time dhe dyert e ferrit s’do të ngadhënjejnë kundër saj!

¹⁹ Ty do të t’i jap çelësat e Mbretërisë së qiellit: gjithçka të lidhësh mbi tokë, do të jetë e lidhur edhe në qiell e gjithçka të zgjidhësh mbi tokë, do të jetë e zgjidhur edhe në qiell.”

²⁰ Atëherë i urdhëroi nxënësit që të mos i tregojnë askujt se është ai Mesia.

Jezusi paralajmëron vdekjen dhe të ngjallurit e vet

(Mk 8, 31‑9, 1; Lk 9, 22‑27)

²¹ Që atëherë Jezusi filloi t’u dëftojë nxënësve të vet se i duhej të shkonte në Jerusalem, të vuante shumë prej anës së pleqve, të kryepriftërinjve e të skribëve, se do ta vrisnin e të tretën ditë do të ngjallej.

²² Atëherë Pjetri e ndau veças e filloi ta qortojë:

“Mos e thashtë Zoti, Zotëri! Ty s’do të të ndodhë një gjë e tillë!”

²³ Jezusi u kthye e i tha Pjetrit:

“Shporru meje, he djallë! Je shkandull për mua, sepse nuk i ke në mend punët e Hyjit, por punët e njerëzve!”

²⁴ Atëherë Jezusi u tha nxënësve të vet:

“Nëse ndokush dëshiron të vijë pas meje, le ta mohojë vetveten, le ta marrë kryqin e vet e le të vijë pas meje! ²⁵ Sepse, kush do ta ruajë jetën e vet, do ta bjerrë, kurse ai që e bjerr për shkak timin, do ta gjejë.

²⁶ Ç’dobi ka njeriu nëse e fiton mbarë botën, por humb jetën? E çka mund të japë njeriu si shkëmbim për jetën e vet?

²⁷ Do të vijë, për të vërtetë, Biri i njeriut në lavdinë e Atit të vet bashkë me engjëjt e vet dhe atëherë do t’i paguajë të gjithë sipas veprave të tyre.

²⁸ Përnjëmend po ju them: Disa nga këta këtu të pranishëm nuk kanë për të vdekur derisa ta shohin Birin e njeriut duke ardhur me mbretërinë e vet.”

Kapitujt