Kapitujt

Osea: 1. Martesa dhe fëmijët e Ozesë

¹ Fjala e Zotit që i qe drejtuar Ozesë, birit të Beeriut, në kohën e Ozisë, Joatamit, Akazit e Ezekisë, mbretërve të Judës, dhe në kohën e Jeroboamit, birit të Joasit, mbretit të Izraelit.

I. MARTESA E OZESË DHE VËSHTRIMI SIMBOLIK I SAJ

Martesa dhe fëmijët e Ozesë

² Fillimi i fjalës së Zotit me anë të Ozesë.

Zoti i tha Ozesë:

“Shko e merre një grua që bën lavirësi

e ki fëmijë nga lavirësia e saj,

sepse vendi s’bën tjetër, veç lavirësi ndaj Zotit.”

³ Ai shkoi, pra, e mori Gomerën, bijën e Debelaimit. Kjo ngjizi dhe i lindi djalin. ⁴ Zoti i tha: “Ngjitja emrin ‘Jezrahel’, sepse edhe pak kohë e do ta ndëshkoj gjakun e Jezrahelit mbi shtëpinë e Jehuit dhe do t’i jap fund mbretërimit të shtëpisë së Izraelit. ⁵ Atë ditë do ta copëtoj harkun e Izraelit në fushën e Jezrahelit.”

⁶ Gomera mbeti përsëri shtatzënë dhe lindi vajzë. Zoti i tha: “Ngjitja emrin: ‘E Pamëshira’, sepse nuk do të kem më mëshirë ndaj shtëpisë së Izraelit, nuk do ta fal më. ⁷ Unë do ta kem në hir shtëpinë e Judës, do t’i shëlboj në Zotin, Hyjin e tyre, e s’do t’i shpëtoj me hark, shpatë, luftë, kuaj e kalorës.”

⁸ Pasi Gomera ‘Të Pamëshirën’ e ndau prej gjirit, ngjizi e lindi edhe një djalë. ⁹ I tha: “Quaje ‘Jo‑Populli‑Im’, sepse ju nuk jeni populli im e unë nuk jam më ‘Ai që jam’ për ju.”

Kapitujt