Kapitujt

Osea: 5. Priftërinjtë, të mëdhenjtë e mbreti e çojnë popullin në rrënim

¹ Dëgjojeni këtë gjë, priftërinj,

vështro mirë, shtëpia e Izraelit,

dëgjoni, shtëpi e mbretit,

ju që të drejtën duhej të ruanit,

ju u bëtë lak në Masfë,

rrjetë e shtrirë përmbi Tabor!

² Një gropë të thellë hapën në Setim;

ju të gjithëve do t’ju ndëshkoj.

³ Unë e njoh mirë Efraimin,

s’e kam të panjohur Izraelin:

u lavirësove tani, o Efraim,

i përdhosur je, o Izrael!

⁴ Veprat e tyre s’do t’i lënë

të kthehen te Hyji i vet,

se i mbuloi shpirti i fëlligështisë së tyre

e s’i lë ta njohin Zotin.

⁵ Krenaria e Izraelit dëshmon kundër tij,

Izraeli e Efraimi,

për faj të vet, do të rrëzohen,

edhe Juda do të bjerë me ta!

⁶ Me grigja e lori të veta

do të shkojnë ta kërkojnë Zotin,

por atë s’do të mund ta gjejnë:

sepse u tërhoq prej tyre!

⁷ Ata Zotit ia shkelën besën,

sepse lindën fëmijë bastardë;

do të përlahen për një muaj

ata e pronat e tyre.

Lufta vëllavrasëse

⁸ Bini borisë në Gabaa

edhe trompetës në Ramë,

në Betaven lëshoni kushtrimin

tmerrojeni Beniaminin!

⁹ Ditën e ndëshimit

do të shkretohet Efraimi,

për fiset e Izraelit

po ju lajmëroj gjë të sigurt.

¹⁰ Na janë bërë prijësit e Judës

si ata që luajnë kufijtë!

Përmbi ta do ta lëshoj,

porsi shi, zemërimin tim.

¹¹ I ndrydhur është Efraimi,

u shkel e drejta,

pse deshi të shkojë pas ndyrësisë.

¹² Qelb e gjak do të jem për Efraimin,

kalbësirë për shtëpinë e Judës!

Kotësi besëlidhjet me të huajt

¹³ E pa Efraimi lëngatën e vet,

edhe Juda varrën e vet:

shkoi Efraimi në Asiri,

dërgoi njerëz te mbreti i madh:

por as ai s’do t’ju shërojë,

plagën tuaj s’do ta shëndoshë.

¹⁴ Sepse si luaneshë do t’i jem Efraimit,

zog luani për shtëpi të Judës.

Unë, unë do t’i copëtoj,

do të shkoj, do t’i marr

e nuk ka kush t’i shpëtojë!

¹⁵ Do të shkoj, në banesën time do të

kthehem,

derisa t’i paguajnë ndëshkimet,

ta kërkojnë fytyrën time,

të më dëshirojnë në vuajtjet e veta!

Kapitujt