Kapitujt

Kantiku i Kantikëve: 5. Poema e katërt

5

¹ të më vijë i dashuri në kopsht të vet

e t’i hajë frutat më të mirat!

I fejuari

Ja, pra, hyra në kopshtin tim,

motra ime, o nusja ime,

mblodha mirrën me erëra të mia,

hëngra fashollin me mjaltë,

piva verën me qumështin tim!

Merrni, o miq, hani e pini,

dehuni, o shumë të dashur!

POEMA E KATËRT

E fejuara

² Unë fle, por zemra më rri zgjuar.

Prit! I dashuri im troket!

“Ma hap derën, motra ime!

Pëllumbesha ime, mikesha ime,

e papërlyera ime!

Sepse plot vesë e kam kokën,

kaçurrelat me pika nate!”

³ ‑ “Po unë jam zhveshur!

Si të veshem vetë përsëri?

I lava këmbët!

Si përsëri ato t’i zhys”?

⁴ I dashuri im për vrime futi dorën

e një rënqethje ma përshkoi mbarë trupin.

⁵ U ngrita të dashurit derën t’ia çel,

duart e mia riguan mirrë,

me mirrë të zgjedhur m’u mbushën gishtat

mbi dorezë të kajnacës së derës.

⁶ Të dashurit ia hapa derën,

porse ai ishte larguar,

kishte ikur...

Më ra të pakët që kishte shkuar.

E kërkova, por s’e gjeta,

e thirra, por s’m’u përgjigj.

⁷ Rojëtarët që ruajnë qytetin më gjetën,

më rrahën e më plagosën...

më zhveshi petkun roja e mureve.

⁸ O ju bija të Rruzalemit, pash Zotin,

nëse ma gjeni të fejuarin tim,

çka për mua ju do t’i thoni?

Se jam sëmurë nga dashuria.

Kori

⁹ Çka është më i mirë se tjerët i dashuri yt,

o më e bukura ndër gra?

Çka është më i mirë se tjerët i dashuri yt,

që ti kështu po na përben?

E fejuara

¹⁰ I dashuri im i bardhë e i kuq,

ndahet në shenjë ndër një mijë vetë!

¹¹ Koka e tij është ar i pastër,

kaçurrelat pinjollë palme,

zi e zi si penda e korbit!

¹² Sytë e tij si pëllumbeshat

bregut të ujërave të përroit

të lara me qumësht

kur pushojnë brigjeve të lumit!

¹³ Mollëzat i ka porsi zagna

të mbjella me bimë të erëndshme

‑ vllaja barnash që erëzojnë;

buzët e tija janë porsi zambaku,

rigojnë mirrën e dorës së parë!

¹⁴ Duart e tija mbidorësa të arta,

plot xhevahirë;

barku i tij krejt i fildishtë,

i stolisur me safirë!

¹⁵ Këmbët e tija shtyllë mermeri,

të ngulura në themele të arta!

Vigan në të pamë porsi Libani,

ardhur shtatit porsi cedri!

¹⁶ Fjala e tij veç ëmbëlsirë:

veç i tillë mund të dëshirohet!

I tillë është i dashuri im,

të tillë mikun unë e kam,

o bija të Jerusalemit!

Kapitujt