Kapitujt

Gjyqtarët: 12. Lufta ndërmjet Efraimit e Galaadit. Vdekja e Jefteut

¹ Tani njerëzit e fisit të Efraimit u bashkuan, kaluan në veri e i thanë Jefteut: “Përse ke shkuar në luftë kundër bijve të Amonit e nuk ke dashur të na ftosh të vinim edhe ne me ty? Prandaj do ta ndezim shtëpinë tënde mbi ty”. ² Ai iu përgjigj: “Ishim ngatërruar keq unë dhe populli im me bijtë e Amonit. Ju thirra të vinit në ndihmë, por ju nuk deshët. ³ Kur e pashë këtë, e vura jetën time në rrezik dhe i sulmova bijtë e Amonit e Zoti m’i lëshoi në dorë. Me çfarë u bëra shkak që ju të ngriheni sot në luftë kundër meje”?

⁴ Jefteu i bashkoi rreth vetes të gjithë burrat e Galaadit e nisi luftën me Efraimin. Galaadajt i mundën efraimët, sepse këta u kishin thënë: “Ju jeni të ikur prej Efraimit; Galaadi banon ndërmjet Efraimit e Manaseut”. ⁵ Galaadajt i zunë kalimet e Jordanit, nëpër të cilët do të kalonin efraimët. Kur vinte ndonjë i ikur efraimas e thoshte: “Të lutem, më lër të kaloj.” Galaadajt i thoshin: “A mos je efraimas”? E ai thoshte: “Nuk jam”, ⁶ i thoshin: “Thuaj pra: Shibolet” /që do të thotë: Kallëz/ e ai përgjigjej: “Sibolet”, sepse nuk mund ta shqiptonte drejt. E kapnin vrik dhe e vrisnin në Jordan. Asokohe u vranë efraimas dyzet e dy mijë vetë.

⁷ Jefte Galaadaj qe gjyqtar në Izrael për gjashtë vjet. Pastaj vdiq e qe varrosur në qytetin e vet në Galaad.

9. ABESANI

⁸ Pas tij gjyqtar në Izrael qe Abesani prej Betlehemit. ⁹ Ky pati tridhjetë djem e tridhjetë vajza, të cilat i martoi jashtë fisit, dhe po aq vajza jashtë fisit u solli të bijve për gra. Për shtatë vjet qe gjyqtar në Izrael. ¹⁰ Vdiq dhe qe varrosur në Betlehem.

10. AHIALONI

¹¹ Pas tij qe gjyqtar në Izrael për dhjetë vjet Ahialon Zabulonasi. ¹² Vdiq e qe rrëmuar në Ahialon, në tokën e Zabulonit.

11. ABDONI

¹³ Pas tij gjyqtar në Izrael qe Abdoni, biri i Ilel Faratonasit. ¹⁴ Ky pati dyzet djem dhe prej tyre tridhjetë nipa që kalëronin shtatëdhjetë gomarë. Për tetë vjet qe gjyqtar në Izrael. ¹⁵ Vdiq dhe qe varrosur në Faraton në tokën e Efraimit, në malin Amalek.

12. SAMSONI

Kapitujt