Kapitujt

Predikuesi: 12. Përfundimi

¹ Kujtoje Krijuesin tënd

në ditët e rinisë sate,

para se të vijë koha e vuajtjeve

e të afrohen ditët për të cilat të thuash:

“Jo, nuk më pëlqejnë më!”;

² para se të errësohen

dielli e drita e hëna e yjet,

e të kthehen retë pas shiut;

³ kur të përkulen rojëtarët e shtëpisë

e të gërnusen trimat e fortë,

të papunë të mbeten bluesit pse të rralluar,

të errësohen shikuesit nëpër vrima,

⁴ të mbyllet dera nga jashtë

e bluesit nën zë

e të ngriten zogjtë për të cicëruar

e kur të meje këndimi i këngëve.

⁵ Atëherë do të tmerrojnë përpjetetë,

frikë do të shtjerë udhëtimi.

Do të lulëzojë bajamja,

zvarrë do të hiqet karkaleci

e do të shkatërrohet kaperi,

sepse njeriu do të fillohet në shtëpinë e amshimit të vet.

Vajtuesit do të enden në sheshe.

⁶ Para se të këputet litari i argjendtë

e të copëtohet kandili i artë,

të thyhet katrova në krua,

të copëtohet qostra përmbi cisternë

⁷ e të kthehet pluhuri në tokën e vet nga erdhi

e shpirti të kthehet tek Hyji që e dha.

⁸ Kotësi kotësish,

‑ thotë Kishtari ‑

e gjithçka kotësi.

Përfundimi

⁹ Meqenëse ishte shumë i urtë, Kishtari për më tepër popullit i mësoi dijen; ai peshoi, shqyrtoi dhe përftoi shumë fjalë të urta. ¹⁰ Kishtari u kujdesua të gjejë thënie të përshtatshme dhe shkroi me përpikëri fjalë të vërteta. ¹¹ Fjalët e të urtëve janë si hostenë, porsi gozhda të ngulura shkrimtarët e përmbledhjeve: ato u dhanë nga një bari i vetëm. ¹² Sa për ato që janë më tepër se kjo, biri im, as mos i kërko: të bëhen shumë libra s’ka asfarë qëllimi e përsiatja e vazhdueshme është mundim i trupit.

¹³ Përfundimi i bisedimit, pasi u dëgjuan të gjitha:

Druaje Hyjin e mbaji urdhërimet e tija; sepse në këtë e ka tërë vlerën e vet njeriu.

¹⁴ E njëmend, Hyji do t’i qesë në gjyq të gjitha veprat e fshehta qofshin ato të mira ose të këqija.

Kapitujt