Kapitujt

Osea: 12. Prishja fetare e politike e Izraelit

¹ Efraimi më mban me rrena,

me dredhi shtëpia e Izraelit;

‑ kurse Juda, ndërsa endet, është me Hyjin,

dhe me Shenjtin është besnik ‑.

² Efraimi me erë ushqehet,

e ndjek vapën.

Gjithë ditën s’pran s’shumuari

gënjeshtër e dhunë.

Bën lidhje me asyrianë,

për në Egjipt me vaj ngarkohet.

Kundër Jakobit

³ E padit Zoti Judën,

sipas sjelljes do të ndëshkohet Jakobi:

do të shpaguhet sipas sjelljes, sipas veprave të tij!

⁴ Që në bark të nënës e mashtroi të vëllanë,

në moshë burrërore me Hyjin luftoi.

⁵ U rrok me engjëllin dhe e mundi:

qante edhe e përbente.

Në Betel me të u takua,

atje Zoti foli me ne

⁶ Zoti, Hyji i Ushtrive:

Zot është emri i tij.

⁷ “Ti, pra, kthehu tek Hyji yt,

ruaj drejtësi e dashuri

shpreso në Hyjin tënd gjithmonë!”

Lakmia e pasurisë e ndëshkimi i Izraelit

⁸ Kanaani, në dorë të tij ‑ peshorja e rreme,

e do mashtrimin.

⁹ Efraimi erdhi e tha:

“Pasanik njëmend u bëra,

grumbullova pasuri,

me gjithë punën që kam bërë,

nuk do të gjendet shkak mëkati për mua.”

¹⁰ “Por unë jam Zoti, Hyji yt,

që në dheun e Egjiptit.

Do të bëj rishtas të rrish nën çadër

si atëherë kur ju takova.

¹¹ Do të flas me profetë,

vegimet do t’i shumoj

e me anë të profetëve të mi

do të flas me shëmbëlltyra.”

Kërcënime të reja

¹² Nëse Galaadi ishte plot fajësi,

ata janë bërë krejtësisht një asgjë;

në Galgala u flijonin qeve,

këndej lterët e tyre do të bëhen

grumbuj gurësh në hulli arash!

¹³ Iku Jakobi në krahinën Aram,

u bë Izraeli shërbëtor për grua

dhe për grua u bë bari!

¹⁴ Kurse Zoti me anë të një profeti,

nga Egjipti e nxori Izraelin,

e qe ruajtur me anë të një profeti.

¹⁵ Hyjin e ngacmoi për së tepërmi Efraimi:

gjakun që derdhi mbi të do ta hedhë

Zoti i tij do t’ia shpaguajë fyerjen.

Kapitujt