Kapitujt

Osea: 6. Izraeli kthehet përkohësisht te Zoti

¹ Ejani të kthehemi te Zoti!

Ai na bëri kortarë ‑ kortarë

Ai edhe do të na shërojë,

na goditi, por edhe do të na shëndoshë.

² Pas dy ditësh do të na e kthejë jetën,

të tretën ditë do të na çojë në këmbë,

do të jetojmë në praninë e tij.

³ Le ta dimë, le ta ndjekim

që Zotin mirë ta njohim.

E sigurt si agimi ardhja e tij,

do të vijë porsi shiu për ne i përshtatshëm,

si shiu i vjeshtës që ujit tokën.

⁴ Çfarë do të bëj për ty, o Efraim,

çfarë do të bëj për ty, o Judë?

Re mëngjesi dashuria juaj

e kalon si vesë mëngjesi.

⁵ Këndej i latova me anë të profetëve,

i vrava me fjalë të gojës sime,

gjyqi im do të lindë si drita.

⁶ Dua dashurinë e jo flinë,

njohjen e Hyjit më se holokaustet.

Fajet e shkuara e të tashmet të Izraelit

⁷ Por ata si Adami e shkelën Besëlidhjen,

ja se ku ata më tradhtuan.

⁸ Galaadi është qytet keqbërësish

i përdhosur me njolla gjaku.

⁹ Cuba në pritë turma e priftërinjve:

udhës i vrasin udhtarët e Sikemit,

poshtërsi vërtet veprojnë!

¹⁰ Pashë gjë të tmerrshme në shtëpi të Izraelit:

Efraimi atje lavirësohet,

i përdhosur është Izraeli!

¹¹ Edhe ty, Judë, të caktova korren,

kur ta përtërij popullin tim.

Kapitujt