Kapitujt

Fjalët e urta: 28. Kush shkel Ligjin lëvdon mëkatarin,

¹ Ikën mëkatari edhe pa e ndjekur kush,

ndërsa i drejti, porsi luani, është i sigurt në vetvete.

² Kur vendi mëkaton, ka krerë të shumtë,

kurse me njeri të urtë e të matur

qeverisja është e gjatë.

³ Skamnori që i shpifet skamnorit

është shi i furishëm që përgatit urinë.

⁴ Kush shkel Ligjin lëvdon mëkatarin,

ndërsa ata që e zbatojnë Ligjin e luftojnë.

⁵ Njerëzit e këqinj nuk e kuptojnë të drejtën,

ndërsa ata që e kërkojnë Zotin kuptojnë çdo gjë.

⁶ Më i mirë është skamnori që jeton në thjeshtësinë e vet,

se pasaniku që ecën udhëve të veta të këqija.

⁷ Kush e ruan Ligjin, është djalë i urtë,

kurse ai që i maj grykësit, turpëron të atin.

⁸ Kush e shton gjënë e vet me uzurë e me kamatë,

bashkon për atë që ka mëshirë për skamnorët.

⁹ Kush i sjell veshët në anë tjetër për të mos e dëgjuar Ligjin,

edhe lutja i bëhet e urryeshme.

¹⁰ Kush i shpie të drejtët në udhë të keqe vret vetveten,

dhe të thjeshtët do t’i trashëgojnë të mirat e tija.

¹¹ Pasanikut i duket vetja i urtë,

porse skamnori i urtë do ta përgënjeshtrojë.

¹² Kur ngadhënjejnë të drejtët, është lavdi e madhe,

kurse kur lartësohen të paudhët, njeriu fshihet.

¹³ Kush i fsheh fajet e veta, s’do të përparojë,

kurse kush i pranon dhe u shmanget,

do të gjejë përdëllim.

¹⁴ Lum njeriu që ka përherë frikën e Zotit,

ndërsa ai që e bën zemrën gur, do të bjerë në mjerim.

¹⁵ Luan ulëritës, arí i uritur

është sundimtari i paudhë për popull të varfër.

¹⁶ Prijësi, që i mungon urtia, bën edhe mujshi të shumta,

kurse kush e urren lakmimin, e zgjat jetën e vet.

¹⁷ Njeriun që i ka përgjakur duart me vrasjen e ndokujt,

edhe në vrapoftë drejtë gropës,

askush të mos e ndalë!

¹⁸ Kush jeton me nder, do të shpëtojë,

kush ecën udhëve të mbrapshta, papritmas do të sharrojë.

¹⁹ Kush punon tokën e vet, do të ngihet bukë,

ndërsa kush ndjek papunësinë,

do ta mbulojë skamja.

²⁰ Njeriu i ndershëm do të ketë shumë bekime,

kurse ai që shpejton të pasurohet

s’do të mbesë i pafajshëm.

²¹ Kush mban krah në gjygj, nuk bën mirë,

sepse i tilli, edhe për një mys buke, bën padrejtësi.

²² Njeriu lakmues i kamjes vrapon të pasurohet

e s’di se do ta mbulojë skamja.

²³ Kush e qorton njeriun, pastaj do të gjejë hir

shumë më tepër se ai që e përkëdhel me gojë.

²⁴ Kush i rrëmben ndonjë gjë babait e nënës

e thotë: “S’është mëkat”,

është shok i vrastarit.

²⁵ Kush është tepër lakmues, ngjall grindje,

ndërsa kush shpreson në Zotin, gjë s’do t’i mungojë.

²⁶ Kush i beson mendjes së vet, është i marrë,

kurse ai që ecën me urtësi, do të shpëtojë.

²⁷ Kush i jep skamnorit, nuk do të vuajë nga skamja,

ndërsa kush i mbyll sytë, do të mallkohet.

²⁸ Kur ngriten të paudhët, njerëzit fshihen,

e kur ata e marrin të keqen, shumohen të drejtët.

Kapitujt