Kapitujt

Fjalët e urta: 2. Urtia mbrojtje nga shoqëria e keqe

¹ Biri im, nëse i pranon fjalët e mia dhe nëse i ruan në brendinë tënde urdhrat e mi,

² duke ia vënë veshin urtisë

dhe duke e prirur zemrën tënde për ta njohur mençurinë;

³ nëse patjetër do ta vësh në veprim kuptimin

e nëse do ta ftosh maturinë,

⁴ nëse do ta kërkosh porsi argjendin,

nëse do ta kërkosh porsi visarin,

⁵ veç atëherë do ta kuptosh frikën e Zotit

dhe do ta gjesh dijen e Hyjit.

⁶ Sepse ai që e dhuron urtinë është Zoti

dhe prej gojës së tij del dija e mençuria.

⁷ Ai e ruan për udhëheqës aftësinë,

mburojë do të jetë për ata që e ndjekin të drejtën.

⁸ Ai e mbron atë që ecën udhës së drejtësisë,

që i ruan udhët e shenjtërve.

⁹ Atëherë do ta kuptosh drejtësinë e gjyqin,

të drejtën dhe të gjitha udhët e mira,

¹⁰ sepse urtia do të hyjë në zemrën tënde

dhe shpirtit tënd do t’i pëlqejë dija.

¹¹ Maturia do të kujdeset për ty,

mençuria do të të ruajë,

¹² do të shmangesh nga udha e keqe

dhe prej njeriut që mëson gabimin,

¹³ prej njerëzve që e lënë udhën e drejtë,

për të ecur udhëve të errëta,

¹⁴ të cilët gëzohen kur mund ta bëjnë të keqen

e kënaqen në punët e veta të mbrapshta;

¹⁵ udhët e tyre janë të gabuara

e hapat e tyre janë dijekeqas të këqij.

¹⁶ Kështu do të shpëtosh nga gruaja e huaj,

prej të huajës që hollon zërin,

¹⁷ që e braktisi zotërinë e rinisë së vet

dhe e harroi besëlidhjen e Hyjit të vet.

¹⁸ Sepse shtëpia e saj është kthyer në vdekje,

hapat e saj shpien në mbretërinë e vdekjes;

¹⁹ kushdo hyn tek ajo më nuk kthehet,

nuk i gjen më shtigjet e jetës.

²⁰ Prandaj ec udhës të të mirëve

edhe ruaje rrugën e të drejtëve,

²¹ sepse të drejtët do të banojnë në tokë

dhe të ndershmit do të qëndrojnë në të,

²² kurse të paudhët do të zhduken nga faqja e dheut,

të pabesët do të zhgulen prej saj.

Kapitujt