Kapitujt

Gjoni: 3. Jezusi e Nikodemi

3

¹ Tashti ndër farisenj ishte një njeri që quhej Nikodem, një nga bujarët e judenjve. ² Ky erdhi natën te Jezusi dhe i tha:

“Rabbi, e dimë se ti je Mësuesi që erdhi prej Hyjit, sepse askush s’mund t’i bëjë këto mrekulli, që i bën ti, po qe se Hyji nuk është me të.”

³ Jezusi iu përgjigj:

“Përnjëmend, përnjëmend po të them:

kush nuk lind përsëri prej së larti,

nuk mund ta shohë Mbretërinë e Hyjit.”

⁴ “Si është e mundur ‑ i tha Nikodemi ‑ të lindë njeriu kur është i moçëm? A thua mund të hyjë përsëri në barkun e nënës së vet e të lindë?”

⁵ Jezusi u përgjigj:

“Përnjëmend, përnjëmend po të them:

kush nuk lind me anë të ujit e të Shpirtit

nuk mund të hyjë në Mbretërinë e Hyjit.

⁶ Çka lind prej mishit, mish është,

e çka lind prej Shpirtit, shpirt është.

⁷ Mos u çudit që të thashë:

‘Duhet të lindni përsëri prej së Larti.’

⁸ Era fryn në drejtimin që do;

ia dëgjon ushtimën

e nuk di nga vjen e kah shkon.

Kështu ndodh edhe me secilin

që lind prej Shpirtit.”

⁹ Nikodemi e pyeti:

“Si mund të bëhet kjo gjë?”

¹⁰ Jezusi iu përgjigj:

“Ti je mësues i Izraelit e nuk merr vesh kaq?

¹¹ Për të vërtetë, për të vërtetë, po të them:

ne flasim çka dimë

e dëshmojmë çka pamë,

e megjithatë nuk e pranoni dëshminë tonë.

¹² Nëse nuk më besoni

kur ju flas për gjëra që ndodhin në tokë

si do të më besoni

në qoftë se ju flas për gjërat e qiellit?

¹³ Askush nuk u ngjit në qiell,

përveç Birit të njeriut

që zbriti nga qielli.

¹⁴ Dhe, sikurse Moisiu e lartësoi

gjarprin në shkretëtirë,

po ashtu duhet të lartësohet edhe Biri i njeriut,

¹⁵ që kushdo të besojë në të

ta ketë jetën e pasosur.

¹⁶ Vërtet, Hyji aq fort e deshi botën

sa që dha një të vetmin Birin e vet

kështu që, secili që beson në të,

të mos birret,

por të ketë jetën e pasosur.

¹⁷ Në të vërtetë Hyji nuk e dërgoi Birin

që ta dënojë botën,

por që bota të shpëtojë nëpër të.

¹⁸ Kush beson në të,

nuk dënohet,

ndërsa, kush nuk beson, ai është dënuar që tani,

pse nuk besoi

në Emrin e Njëlindurit, Birit të Hyjit.

¹⁹ E gjykimi është ky:

Drita erdhi në botë,

por njerëzit më tepër deshën

errësirën se dritën,

sepse veprat i kishin të këqija.

²⁰ Vërtet, kushdo që bën të keqen,

e urren dritën dhe nuk del në dritë

që të mos i zbulohen veprat e tij,

²¹ kurse ai që e vë në zbatim të vërtetën,

ai del në dritë

që të dalë ballafaqe

se veprat e tij u bënë siç thotë Hyji.”

Jezusi dhe Gjon Pagëzuesi

²² Pastaj Jezusi shkoi me nxënësit e vet në tokën e Judesë. Aty u vendos me ta dhe pagëzonte. ²³ Edhe Gjoni pagëzonte në Enon, afër Salimit, sepse aty kishte mjaft ujë. Njerëzit shkonin dhe pagëzoheshin. ²⁴ Gjoni ende nuk ishte burgosur.

²⁵ Tashti ndodhi një rragatje lidhur me pastrimin ligjor ndërmjet nxënësve të Gjonit e një çifuti. ²⁶ Shkuan te Gjoni dhe i thanë:

“Rabbi, ai që ishte me ty matanë Jordanit ‑ ai për të cilin ti bëre dëshmi ‑ edhe ai po pagëzon, dhe të gjithë po shkojnë tek ai.”

²⁷ Gjoni u përgjigj:

“Askush s’mund të marrë për vete asgjë

nëse nuk iu dha prej qiellit!

²⁸ Ju vetë më jeni dëshmitarë se thashë:

‘Unë nuk jam Mesia, por jam: i Dërguari para tij.’

²⁹ Kush ka nusen, është dhëndër.

Dashamiri i dhëndrit,

i cili i rri pranë dhe e dëgjon,

kënaqet kur e dëgjon zërin e dhëndrit.

I tillë është, pra, gëzimi im: arriti në kulm!

³⁰ Ai duhet të rritet

e unë të zvogëlohem.”

Ai që vjen prej së Larti

³¹ “Kush vjen prej së Larti,

ai është mbi të gjithë!

Kush është nga toka,

tokësor është dhe flet për gjërat e tokës.

Ai që vjen prej qiellit

[ai është mbi të gjithë]:

³² dëshmon çka pa e çka dëgjoi,

por dëshminë e tij askush s’e pranon.

³³ Kush e pranon dëshminë e tij,

pohon se Hyji është i vërtetë.

³⁴ Vërtet, i dërguari i Hyjit

flet fjalët e Hyjit

‑ sepse Hyji nuk e jep Shpirtin me masë.

³⁵ Ati e do Birin

dhe atij i la në dorë gjithçka.

³⁶ Kush beson në Birin

ka jetën e pasosur,

përkundrazi, ai që nuk beson në Birin

nuk do ta shohë jetën:

hidhërimi i Hyjit peshon mbi të.”

Kapitujt