Kapitujt

Gjoni: 2. Dasma në Kanë

¹ Të tretën ditë po bëhej një dasmë në Kanë të Galilesë. Aty ishte edhe nëna e Jezusit. ² Në dasmë ftuan edhe Jezusin e nxënësit e tij. ³ Kur u mbaroi vera, nëna e Jezusit i tha:

“Nuk kanë më verë!”

⁴ [E] Jezusi i tha:

“Moj burrneshë, a është punë për ne? Ende nuk erdhi koha ime!”

⁵ Nëna e tij u tha shërbyesve:

“Bëni gjithçka t’ju thotë!”

⁶ Ishin aty të vëna gjashtë enë guri që shërbenin për larje të rëndomta të judenjve. Secila zinte dy apo tri masë. ⁷ Jezusi u tha shërbyesve:

“Mbushni enët me ujë!”

Ata i mbushën deri në grykë.

⁸ “Merrini tani ‑ u tha atëherë ‑ e çojani kryetarit të tryezës.”

Ata ia çuan. ⁹ Kur kryetari i tryezës e kërkoi ujin e kthyer në verë ‑ e nuk e dinte nga vinte ‑ shërbyesit, që e kishin mbushur ujin, e dinin ‑ kryetari i tryezës e thirri dhëndrin ¹⁰ dhe i tha:

“Çdo njeri më parë vë në tryezë verën e mirë e, kur t’i nxehë pija, sjell verë më të keqe. Ti e paske ruajtur verën e mirë deri tani!”

¹¹ Kjo qe mrekullia e parë e Jezusit, të cilën e bëri në Kanë të Galilesë; e dëftoi lavdinë e vet dhe nxënësit e tij besuan në të.

¹² Pastaj zbriti në Kafarnaum me nënën e vet, me vëllezërit [e vet], e me nxënësit e vet. Aty nuk qëndruan shumë ditë.

Pastrimi i Tempullit

(Mt 21, 12‑13; Mk 11, 15‑17;Lk 19, 45‑46)

¹³ Ishin afër Pashkët e hebrenjve e Jezusi u ngjit në Jerusalem. ¹⁴ Në Tempull gjeti shitës qesh, delesh e pëllumbash dhe këmbyes të hollash duke ndenjur aty. ¹⁵ Atëherë punoi një frushkull konopësh dhe i dëboi nga Tempulli të gjithë së bashku me dele e me qe. Këmbyesve u derdhi të hollat dhe u rrëzoi tavolinat. ¹⁶ Shitësve të pëllumbave u tha:

“Hiqini këta prej këndej e mos e bëni shtëpinë e Atit tim, shtëpi tregtie!”

¹⁷ Nxënësit e tij u kujtuan se është në Shkrimin e shenjtë:

“Zelli për Shtëpinë tënde më bren!”

¹⁸ Atëherë ndërhynë judenjtë dhe e pyetën:

“Ç’shenjë na jep duke vepruar kështu?”

¹⁹ Jezusi iu përgjigj:

“Rrënojeni këtë Tempull e unë do ta rindërtoj për tri ditë!”

²⁰ “Dyzet e gjashtë vjet zgjati ndërtimi i këtij Tempulli ‑ iu përgjigjën judenjtë ‑ e ti do ta ndërtosh për tri ditë?”

²¹ Porse Jezusi foli për tempullin e trupit të vet. ²² Kur u ringjall prej së vdekuri, atëherë u ra ndër mend nxënësve se këtë kishte dashur të thotë dhe i besuan Shkrimit të shenjtë e fjalës që tha Jezusi.

Jezusi njeh çdo njeri

²³ Gjatë qëndrimit të Jezusit në Jerusalem në kohë të festës së Pashkëve, shumë besuan në Emrin e tij, kur panë shenjat që bëri. ²⁴ Porse vetë Jezusi nuk kishte shumë besim në ta, sepse i njihte mirë të gjithë. ²⁵ Nuk kishte nevojë t’i dëshmonte kush për njeriun: sepse ai e dinte mirë çka njeriu ndryn përbrenda.

Kapitujt