Kapitujt

Predikuesi: 4. Shoqëria

¹ U solla pastaj në anë tjetër e pashë tëgjitha dhunat që bëhen nën diell: dhe ja, lotët e të nëpërkëmburve e asnjë ngushëllues! Nga ana e dhunuesve dhunë pa asnjë ngushëllues!

² Atëherë i shpalla më të lumë të vdekurit që kishin vdekur kaherë se të gjallët që ende rrojnë, ³ madje më të lumë se të dy e çansova atë që ende s’ka lindur, që ende nuk i ka parë të këqijat që bëhen nën diell!

⁴ Përsëri u vura të shqyrtoj çdo veprimtari dhe çdo sukses në veprimtari e pashë se edhe këtu është smirë e njërit kundër tjetrit. Edhe kjo gjë pra, është kotësi dhe mihje në ujë!

⁵ I marri i kryqëzon duart e veta

dhe ha vetveten!

⁶ Më mirë është një dorë me pushim se të dy grushtat plot, por me mund të madh e me mihje në ujë.

⁷ Vura re gjithashtu edhe një kotësi nën diell:

⁸ shikoj një njeri krejtësisht të vetëm: s’ka djalë, s’ka vëlla e, megjithatë, nuk pushon kurrë nga puna dhe sytë e tij kurrë nuk ngihen me pasuri dhe as s’i jepet të mendojë: “Për kë po punoj e po ia mohoj vetvetes të mirat”? Edhe kjo është një kotësi dhe një kujdesim i keq shumë!

⁹ Më mirë janë dy së bashku se njëri vetëm: sepse më mirë paguhen për punën e vet, ¹⁰ sepse, kur rrëzohet njëri, e ngre tjetri. Mjerë i vetmi! Kur të rrëzohet s’do të ketë kush ta çojë!

¹¹ Po ashtu edhe në fjetshin dy s’bashku do ta ngrohin njëri‑tjetrin. Një i vetëm si do të mund të nxehet? ¹² Po edhe nëse ndokush do ta sulmojë njërin, të dy së bashku do të mund t’i qëndrojnë. Litari i trefishtë nuk këputet lehtë!

¹³ Më i mirë është djaloshi skamnor e i urtë se mbreti i moçëm e i marrë

që s’lejon më të këshillohet.

¹⁴ Djaloshi mund të dalë prej burgut e të bëhet mbret megjithëse ka lindur në mbretërinë e tij skamnor, ¹⁵ dhe i pashë se si të gjithë që jetojnë e ecin nën diell i mbështeten djaloshit, pasardhësit të atij që e trashëgon. ¹⁶ Ishte një numër i pakufi i popullit të cilit ai i printe, porse breznitë e mëvonshme nuk do të kenë pse të gëzohen për shkak të tij.

Edhe kjo është kotësi dhe mihje në ujë.

¹⁷ Kur të shkosh në Shtëpinë e Hyjit ki kujdes hapat e tu. Afrohu që të mund të dëgjosh, sepse kjo vlen më shumë se flia e të marrëve: vërtet është më e mirë dëgjesa se flitë e të marrëve që nuk dinë se bëjnë keq.

Kapitujt