Kapitujt

Veprat e Apostujve: 24. Procesi kundër Palit

¹ Pas pesë ditësh zbriti kryeprifti Anania me disa pleq e me një avokat që quhej Tertul dhe ia paraqitën qeveritarit padinë kundër Palit. ² Kur e sollën Palin, atëherë Tertuli nisi ta padisë me këto fjalë:

“Paqen e madhe që ne po gëzojmë në saje tënde dhe përmirësimin e gjendjes i cili po i vjen këtij populli në saje të kujdesit tënd, i përndritshmi Feliks, ³ e pranojmë me falënderim të sinqertë në gjithçka dhe gjithkund.

⁴ Por, që të mos të të mërzis, të lutem të na dëgjosh për pak kohë me butësinë tënde. ⁵ Ne kemi zbuluar se ky njeri është murtajë dhe se nxit gjithkund nëpër botë të gjithë hebrenjtë për kryengritje dhe se është udhëheqësi i sektit të Nazarenëve. ⁶ Ky madje u mundua ta dhunojë edhe Tempullin, por atëherë e kapëm. ^{[7] 8} Po prej tij, nëse e pyet, do të mund të kuptosh se janë të vërteta paditë që bëjmë kundër tij.”

⁹ Hebrenjtë e përkrahën duke pohuar se puna qëndronte ashtu.

Pali mbrohet para Feliksit

¹⁰ Atëherë Pali, me shenjën e qeveritarit, mori fjalën e tha:

“E di se prej shumë vjetësh je gjykatës i këtij populli, prandaj pa farë frike po e marr fjalën për t’u mbrojtur. ¹¹ Ti vetë mund ta vërtetosh se nuk janë më shumë se dymbëdhjetë ditë që kur u ngjita në Jerusalem për të adhuruar. ¹² Nuk më gjetën as në Tempull as në sinagoga as nëpër qytet duke diskutuar me askënd as duke nxitur për kryengritje, ¹³ e nuk janë në gjendje t’i vërtetojnë ato, për të cilat tani po më padisin.

¹⁴ Ndërkaq këtu para teje pohoj këtë gjë: me Udhën, të cilën këta e quajnë sekt unë i shërbej Hyjit të etërve duke besuar gjithçka është e shkruar në Ligj e në Profetë. ¹⁵ Kam shpresë në Hyjin se do të ngjallen të drejtët e të këqijtë e këtë gjë e shpresojnë edhe ata vetë. ¹⁶ Këndej edhe kujdesohem gjithmonë ta kem ndërgjegjen e pastër para Hyjit e para njerëzve.

¹⁷ Tashti, pas sa vitesh, erdha të sjell lëmoshë për tim e për t’i flijuar Hyjit. ¹⁸ Në këtë rast më gjetën në Tempull kur po i jepja fund pastrimit tim, por pa turma e pa përzierje; ¹⁹ por disa hebrenj nga Azia... Këta do të kishte qenë mirë të kishin ardhur para teje e të më paditnin, nëse kanë ndonjë gjë kundër meje. ²⁰ Por edhe këta le të thonë: çfarë delikti gjetën në mua, kur qëndroja para Këshillit të Lartë, ²¹ me përjashtim ndoshta vetëm të asaj fjale që thashë me zë të lartë, ndërsa isha në këmbë para tyre: ‘Për shkak të ngjalljes së të vdekurve jam sot në gjyq para jush!’”

²² Feliksi që e njihte mjaft mirë këtë Udhë, e shtyri çështjen me këto fjalë: “Kur të vijë tribuni, Lizja, do t’i jap fund çështjes suaj.” ²³ Centurionit i urdhëroi të ruhej Pali me rojtarë, por duke i lënë disa liri, si edhe të mos i ndalohej askujt prej të tijve t’i bëjnë ndonjë shërbim.

Pali mbetet nën rojë

²⁴ Pas disa ditësh erdhi Feliksi me gruan e vet Druzilën, që ishte çifute. Si e thirri Palin, po e dëgjonte fjalën e tij lidhur me fenë në Jezu Krishtin. ²⁵ E kur Pali filloi të flasë për drejtësinë, për përkormërinë dhe për Gjyqin e ardhshëm, Feliksi u tremb dhe i tha: “Për tani, shko një herë e, kur të kem kohë, do të të thërras përsëri.” ²⁶ Shpresonte gjithashtu se do të marrë të holla prej Palit e nergut shpeshherë çonte dhe e thërriste për të biseduar me të.

²⁷ Si kaluan dy vjet Feliksin e zëvendësoi Porci Fest. Feliksi, duke dashur të tregohej dashamir kundrejt judenjve, e la Palin në pranga.

Kapitujt