Kapitujt

Veprat e Apostujve: 14. Pali e Barnaba në Ikon

¹ Gjithashtu edhe në Ikon hynë në sinagogën e hebrenjve. Folën aq mirë sa që një shumicë e madhe hebrenjsh e grekësh e pranuan besimin.

² Porse hebrenjtë që nuk e pranuan besimin, i ngacmuan dhe i çuan peshë paganët kundër vëllezërve.

³ Megjithatë Pali e Barnaba u ndalën aty për një kohë të gjatë, të mbështetur në ndihmën e Zotit, i cili e dëshmonte fjalën e hirit të vet duke premtuar që përmes duarve të tyre të bëheshin mrekulli dhe shenja të çuditshme.

⁴ Banorët e qytetit u ndanë: njëra pjesë ishte me hebrenj e pjesa tjetër me apostuj. ⁵ Paganët dhe hebrenjtë me krerët e vet u bënë gati për t’i salvuar apostujt e për t’i vrarë me gurë. ⁶ Apostujt, kur e morën vesh, ikën në qytete të Likaonisë: në Listër, në Derbë e në rrethina. ⁷ Atje vazhduan predikimin e Ungjillit.

Pali e Barnaba në Listër

⁸ Ishte në Listër një njeri i sëmurë këmbësh, çalaman që prej lindjes, i cili kurrë nuk kishte ecur. ⁹ Ky e dëgjoi Palin duke folur. Pali ia hodhi sytë e, duke parë se ka fe për të qenë shëruar, ¹⁰ i tha me zë të lartë: “Drejtohu në këmbët e tua!” Ai i dha vetes dhe eci. ¹¹ Turma, kur pa çka bëri Pali, bërtiti në gjuhë likaone: “Hyjnitë kanë zbritur ndër ne në trajtën e njerëzve” ¹² Barnabën e quajtën Zeus e Palin Hermes, sepse Pali fliste.

¹³ Atëherë prifti i Zeusit, tempulli i të cilit ishte para dyerve të qytetit, solli para derës së qytetit mëzetër e kurorë e bashkë me qytetarë deshi të flijojë. ¹⁴ Kur morën vesh apostujt, Barnaba e Pali, i shqyen petkat e veta e hynë mes popullit duke bërtitur. ¹⁵ ”Ç’po bëni kështu, bre burra!? Po edhe ne jemi njerëz të vdekshëm si ju! Ne ju predikojmë të ktheheni prej këtyre kotësive kah Hyji i gjallë, i cili krijoi qiellin e tokën, detin e gjithçka është në ta. ¹⁶ Në breznitë e shkuara ai i la mbarë paganët të ndjekin udhët e tyre. ¹⁷ Megjithatë nuk e la pa e dëshmuar veten me anë të bamirësive: ju dërgoi nga qielli shi e stinë të begatshme, ju mbushi me ushqime e zemrat tuaja i mbushi me gëzime.” ¹⁸ Duke folur kështu mezi e ndalën që të mos u kushtojnë fli.

¹⁹ Ndërkaq arritën disa hebrenj prej Antiokisë e prej Ikonit dhe e çuan peshë . E gjuajtën me gurë Palin, e qitën zvarrë jashtë qytetit duke kujtuar se kishte vdekur. ²⁰ Por, kur e rrethuan nxënësit, ai u drejtua dhe hyri në qytet. Të nesërmen shkoi me Barnabën në Derbë.

Kthimi në Antioki të Sirisë

²¹ Pasi e kumtuan Lajmin e gëzueshëm në atë qytet, dhe, pasi bënë një numër të madh nxënësish, kthyen në Listër, në Ikon e në Antioki. ²² I përforconin zemrat e nxënësve në qendresë të fesë, sepse ‑ thoshin ‑ na duhet të kalojmë nëpër shumë vështirësi për të hyrë në Mbretërinë e Hyjit. ²³ Pasi luteshin e agjëronin, secilës kishë i emëronin udhëheqësin dhe ia porositnin Zotit, në të cilin kishin besuar.

²⁴ Atëherë kaluan nëpër Pisidi e erdhën në Pamfili. ²⁵ Pasi e predikuan fjalën në Pergë, zbritën në Atali. ²⁶ Aty hipën në barkë e udhëtuan për Antioki, prej nga patën qenë dërguar të porositur hirit të Hyjit për veprën që kryen.

²⁷ Kur arritën, bashkuan Kishën dhe treguan gjithçka Hyji bëri me anë të tyre dhe se si Hyji ua hapi paganëve derën e fesë.

²⁸ Këtu qëndruan për një kohë të gjatë bashkë me nxënës.

Kapitujt