Kapitujt

Veprat e Apostujve: 10. Pjetri dhe Korneli

¹ Në Cezare ishte një njeri me emër Kornel, kapiten i togës së quajtur “Italike”, ² njeri i përshpirtshëm dhe që besonte në Hyjin, si ai ashtu edhe familja e tij. I ndante popullit shumë lëmoshë dhe vazhdimisht i lutej Hyjit.

³ Ai pa qartë në një vegim diku rreth orës nëntë të ditës se si engjëlli i Hyjit hyri tek ai dhe i tha.

“Kornel!”

⁴ “Urdhëro, Zotëri!” ‑ ia ktheu Korneli duke ia ngulur sytë i frikësuar.

“Lutjet e tua dhe lëmoshët kanë arritur para Hyjit ‑ iu përgjigj engjëlli ‑ dhe ai të ka kujtuar. ⁵ Ti tani dërgoji disa njerëz në Jopë dhe grishe Simonin që quhet Pjetër. ⁶ Ai gjendet te një farë Simoni, lëkurëtar, që e ka shtëpinë afër detit.”

⁷ Posa shkoi engjëlli që foli me të, kapiteni i grishi dy shërbëtorë dhe një ushtarë të përshpirtshëm, prej atyre që i ishin dhënë për shërbim, ⁸ u tregoi gjithçka dhe i nisi për në Jopë.

⁹ Të nesërmen, ndërsa këta po bënin rrugë dhe po i afroheshin qytetit, Pjetri rreth orës gjashtë, u ngjit në tarracë për t’u lutur. ¹⁰ U urit dhe dëshiroi të hajë. Ndërsa ata po i përgatitnin ushqimin, kaloi në vegim. ¹¹ Shikonte qiellin e hapur dhe një gjë të papërcaktueshëm, porsi pëlhurë e madhe, të lidhur në katër këndet, që po zbriste nga qielli në tokë. ¹² Në të ishin katërkëmbësh të ndryshëm, zvarranikë toke dhe shpendë qielli. ¹³ Ndërkaq i tha një zë: “Çohu, Pjetër, prej e ha!”

¹⁴ “Assesi, o Zot! ‑ iu përgjigj Pjetri ‑ Unë nuk kam shijuar kurrë me gojë kafshë të ndytë e të papastër!”

¹⁵ “Çka Hyji ka shpallur të pastër ‑ i tha ai zë të dytën herë ‑ ti mos e quaj të ndytë!”

¹⁶ Kjo u përsërit tri herë e atëherë ajo gjë u ngrit në qiell.

¹⁷ Ndërsa Pjetri po e vriste mendjen në vetvete se ç’kuptim kishte vegimi që pati, ja, njerëzit e dërguar prej Kornelit, pasi kishin pyetur andej e këndej për shtëpinë e Simonit, ia behën te dera, ¹⁸ thirrën dhe pyetën a mos ishte aty mik Simoni që quhet Pjetër.

¹⁹ Ndërsa Pjetri gjithnjë po mendonte lidhur me vegimin, Shpirti Shenjt i tha: “Ja, po të kërkojnë disa [dy] burra. ²⁰ Çohu, pra, e shko me ta pa farë dyshimi se unë i kam dërguar.” ²¹ Pjetri zbriti te njerëzit dhe tha:

“Ja, unë jam ai të cilin kërkoni. Për çka keni ardhur?”

²² Ata iu përgjigjën:

“Kapiten Korneli, njeri i drejtë dhe që beson në Hyjin, për të cilin dëshmon mbarë populli hebre, qe porositur prej një engjëlli të shenjtë të të thërrasë ty në shtëpinë e vet për t’i dëgjuar fjalët që ke për t’i thënë.”

²³ Atëherë Pjetri i ftoi brenda dhe i përbujti.

Të nesërmen u çua dhe shkoi me ta. Disa vëllezër prej Jopës e përcollën Pjetrin. ²⁴ Ditën e dytë arriti në Cezare. Korneli i priste; kishte grishur edhe farefisin e disa miq të ngushtë. ²⁵ Kur Pjetri arriti, Korneli i doli para e, duke rënë ndër këmbët e tij, e adhuroi. ²⁶ Pjetri e ngriti në këmbë dhe i tha: “Çohu në këmbë se edhe vetë jam vetëm njeri!” ²⁷ E, duke biseduar me të, hyri brenda, ku gjeti të bashkuar shumë njerëz, ²⁸ të cilëve u tha:

“Ju e dini mirë se një hebre e ka të ndaluar shoqërimin me të huaj ose t’u hyjë në shtëpi, porse vetë Hyji më mësoi se s’është e lejueshme të quhet i ndytë ose i papastër asnjë njeri. ²⁹ Prandaj, kur më grishët, erdha pa kundërshtuar. Tani dëshiroj të di pse më keni grishur.”

³⁰ “Para katër ditësh ‑ iu përgjigj Korneli ‑ pikërisht në këtë kohë, thosha në shtëpinë time lutjet e orës nëntë, kur ia behu një njeri në petka të shkëlqyeshme, zuri vend para meje ³¹ dhe tha: ‘Kornel, u vështrua lutja jote dhe u kujtuan lëmoshët e tua para Hyjit. ³² Dërgo, pra ndokënd në Jopë dhe grishe Simonin e quajtur Pjetër. Ai është mik në shtëpinë e Simonit lëkurëtar, afër detit.’ ³³ Menjëherë dërgova njerëzit për ty dhe ti bëre mirë që erdhe. Ja, pra, të gjithë jemi bashkuar para Hyjit për të dëgjuar gjithçka Zoti të ka urdhëruar.”

Predikimi i Pjetrit në shtëpinë e Kornelit

³⁴ Atëherë Pjetri mori fjalën e tha:

“Tani me të vërtetë po e marr vesh se Hyji nuk i mban kujt krah, ³⁵ përkundrazi ‑ në çdo kombësi i pëlqen ai që e ka frikën e tij dhe që e zbaton drejtësinë. ³⁶ Ai u dërgoi Fjalën e vet izraelitëve dhe ua shpalli Ungjillin e paqes përmes Jezu Krishtit që është Zotëria i të gjithëve. ³⁷ Ju e dini çka ka ndodhur në mbarë Judenë, duke filluar nga Galileja, pas pagëzimit që predikoi Gjoni, ³⁸ se si Hyji Jezusin prej Nazaretit e shuguroi me Shpirtin Shenjt e me pushtet; atë që e përshkoi vendin duke bërë mirë e duke shëruar të gjithë ata që kishin rënë nën pushtetin e djallit, sepse Hyji ishte me të. ³⁹ Ne jemi dëshmitarë për gjithçka që bëri në mbarë krahinën e Judesë e në Jerusalem. E vranë “duke e varur në shtyllë”! ⁴⁰ Hyji e ngjalli të tretën ditë dhe bëri që të dëftohet i gjallë ⁴¹ ‑ jo mbarë popullit në përgjithësi, por dëshmitarëve prej Hyjit të paracaktuar ‑ neve që bashkë me të kemi ngrënë e kemi pirë pasi u ngjall prej të vdekurish. ⁴² Ai edhe na urdhëroi t’i predikojmë popullit e t’i japim dëshmi se Jezusi prej Hyjit është caktuar Gjykatës i të gjallëve e i të vdekurve. ⁴³ Për të bëjnë dëshmi të gjithë profetët: në fuqi të Emrit të tij i jepet falja e mëkateve secilit që beson në Të.”

Paganët marrin Shpirtin Shenjt

⁴⁴ Ndërsa Pjetri ende po i thoshte këto fjalë, Shpirti Shenjt zbriti mbi të gjithë ata që po dëgjonin predikimin. ⁴⁵ Besimtarët e rrethprerë që kishin ardhur me Pjetrin, u çuditën kur panë se edhe në paganë u ndikua dhurata ‑ Shpirti Shenjt. ⁴⁶ Sepse i dëgjuan duke folur gjuhë të ndryshme e duke madhëruar Hyjin. Atëherë Pjetri tha: ⁴⁷ “Vallë a mund ta ndalojë kush ujin të mos pagëzohen këta që e morën Shpirtin Shenjt sikurse edhe ne?” ⁴⁸ Dhe urdhëroi të pagëzohen në emër të Jezu Krishtit. Atëherë iu lutën të qëndrojë me ta disa ditë.

Kapitujt